中四那年，我因為五毫子而成名: 2.8 等待
儘管大家都只是無了期的呆等，大家還是很有耐性，沒有人說要離開。
「唉，呢件事之後一個會少左人叫外賣。冇人會想叫個外賣都比人擇名。」我伏在走廊的欄上說。
「其實叫外賣都算係我地嘅傳統，好多老師都知道我地會咁做，有啲仲會一齊叫啦。我真係唔明小息開電話叫外賣有咩問題？」Robin伏在我的旁邊慨嘆著。
看著下面的操場，忽然覺得這個校園很陌生。以前學校都不會管外賣，於是大家都約定俗成。小息完結前會叫好外賣，有同學負責收錢。中午的時候總是有熱心的同學拿著沉重的外賣從校門進來。我們會拿著飯盒，一齊站在球場旁邊觀賞球賽，是我們的共同回憶，在這裡生活過的證明。無法想像有一天，我們失去了飯盒會怎樣。
然而，這天快將到來。或許，飯盒將成歷史，而我還是不想接受這個現實。
我忽然想起我們製作的覓食指南，這會否是學校打壓的原因？畢竟叫外賣從來都是偷偷摸摸、鋌而走險的進行。
「我更加唔希望係我地份覓食指南連累大家，如果有一個人因為睇完而叫外賣，最後因為咁要記過，我會過意唔去。」我感到悲哀。
「叫外賣，唔係我地嘅錯，我地學校離餐廳咁遠，小食部又難食，同學真係有需要叫外賣，點解學校唔可以體諒下，或者劃分一個區域比同學名正言順的打電話？」Robin說。
「喂，Joyce，我仲以為你走左添，頭先去左邊啊？」Kitty的聲音把我叫醒，她旁邊還有Emily和Lily。
「一路起度啊不過行唔到過去搵你地。」
「呢位係？」Kitty偷偷笑著，我知道她在想什麼。Robin也轉過身來看她們。
「Robin，我朋友。」我說。
「Hi，Robin。」她們三個尷尬的說。
「Robin，佢地係我三個好朋友，Emily，Lily 同Kitty。」我把他們逐一介紹。
「Emily，Lily，Kitty，你地好啊。」Robin禮貌的說。
「Robin，你要唔要去搵翻你啲朋友？」我問。
「佢地去左打波，唔起到。」他失望的答。
「唔緊要啦，我地起度一齊等。」
等了大概20分鐘，陳主任和王老師出來了，後面跟著是那二十幾個被記名的同學，我們看不清楚前方發生什麼事，因為前面擠滿了人。
「各位同學，念在咁多為同學都係初犯，同埋都真誠咁反思自己嘅錯誤，而我地作為老師，都希望比機會同學改過。經過討論之後，我地老師決定唔會處罰任何一位攞外賣嘅同學。
「不過我地都想重申，學校係唔容許同學小息開手提電話，只有放學嘅時候先可以開電話作聯絡家長只用，呢一點所有同學都應該知道。所以，不論係負責打電話叫外賣、有份食飯盒定係負責攞飯盒嘅同學，你地都係有機會違反呢一條關於電話使用嘅校規。」
聽到主任對於外賣的取態，同學一片嘩然。
「吓？」
「食飯盒都違反校規，唔係掛？」
「有冇搞錯啊，食個飯姐。」
「咁樣姐係以後食飯冇得揀啵。」
陳主任繼續說：「聽我講埋先，我希望同學正視呢個問題。我地校方好尊重同學食飯嘅自由，我地亦都唔係唔容許大家叫外賣，只不過叫外賣唔可以係一個違反校規嘅理由。經過呢一事，我亦都相信同學唔會再為左叫外賣而以身試法。大家翻去都應該反思下，係咪一直以來都無視左呢一條校規。」
陳主任和王老師再次走進人群裡，向著我們這邊走。
「我有權，叫外賣。」我首先帶頭喊。
「我有權。」Robin跟著喊。
「叫外賣。」同學們一呼百應，聲勢浩大。
「打壓外賣無理。」遠處有把尖銳的女聲大叫。
「打壓外賣無理。」同學們都一齊附和，此起彼落，聲音足以傳遍校園的每一角。
一片謾罵聲中，陳主任和王老師走到我地面前，我禁不住鄙視著他們。
「唔好以為咁樣可以打壓到我地。」Robin目露凶光對著兩個老師說。
「甄同學、余同學嘛，我記得你地兩個。你地都記得要守校規啊，知唔知道啊？」王老師輕佻的說。
說罷，王老師和陳主任進入教員室，「呯」的一聲把門關上。
隨著兩位老師的離開以及被記名同學走出來，人潮亦慢慢散去。我們五人也慢慢下樓梯離開校園。大家心情都有點沉重，說不出一句話來。
回頭看看個校園，我感覺唏噓，我們回不去以前平淡的生活。
腦海裡總是揮之不去的叫喊聲：「我有權，叫外賣。」、「打壓外賣無理」……經歷這一場打壓外賣的行動，我們再回不去歌舞昇平的日子。
「我諗，以後都唔會再有人起度攞外賣，我地會好掛住啲飯盒。」Kitty忽然感性起來，她平常很少這樣。
「世間上好多野都有時限，就好似我地始終會畢業，總有一日唔會再食飯盒，唯有當呢一日黎早左。」Emily努力擠出笑容，或許她只是想安慰一下大家才提出一個讓自己好過點的想法。
可是，她連自己也騙不過。
她呼出一口氣接著說：「唉，咁樣諗都唔會好過啲。」
Robin好像突然想通了，握緊拳頭的看著我們幾個： 「我地唔可以比佢地打沉，我地要爭取我地應得嘅野。」
「我地仲可以點啊？」Lily問。
「我未諗到，不過我地唔可以咁快就屈服。」Robin微微低下頭說。
我們走到巴士站，Robin說：「我住隔離，我走喇。冇諗到第一日識你地就係經歷啲咁嘅事。Bye bye。」
「Bye。」我們說。