我以為自己要孤獨一世，直到你出現: 第七十五章-重逢

今日又係輕鬆工作，一邊做一邊吹水，話咁快又收工啦，一收工執好曬野就即刻走，因為我諗住去惠康買卡邦尼意粉既材料再整一次比Chris食，失敗乃成功之母，有咗上次失敗既經驗，我今晚再試吓煮先～

當我番到屋企樓下，咦？！呢架GTR咁熟面口既，係邊到見過呢？唔通係佢？

「喂！呀賢～」係我仲諗緊之際，突然有把好熟悉既聲係我背後傳出

我擰轉面望，係Cindy～佢立即上前攬住我，但係我推開咗佢，究竟佢仲番黎搵我做咩呀？佢已經有第二個啦，仲以為我唔知道？

「做咩呀？你仲嬲我呀？」點解佢仲可以扮無野？佢係咪當我係傻仔呀！



「你都已經有第二個啦，仲黎搵我做咩呀？」我好冷淡咁回應佢

「你講乜咩？我淨係得你一個」仆你個街，點解仲可以講得咁有感情

「咁你做咩單剔我呀？」佢一定解釋唔到，我再show部電話比佢睇

「我唔見咗部電話呀！我有用新number再搵你架！你先係單剔果個呀！」咁既籍口都講出得！仲要惡人先告狀！

「你同條仔影果張相呢！你又點解釋呀？」我當真係唔見咗電話，但係張相你冇得抵頼啦！



「我同Bryant冇野架，你信...我啦....」Cindy講完之後開始喊

「乜你條新仔叫Bryant呀！係咁啦！」我擰轉身離開

「呀....賢...唔好...呀....」留番Cindy自己一個人係到喊

我一恕之下去惠康買完材料就番屋企，費事再見到佢眼冤呀！我番到屋企將材料攞入廚房，就坐係電腦枱面前一直打機，順便等埋Chris番黎～

「上呀！打佢老母～」我對住啲隊友大叫



「做咩咁燥呀～邊個激嬲你呀？」Chris啱啱打開門就問

「冇呀，咪係Cindy囉～」大撚鑊！一時之氣口快快講咗出黎

「吓，佢番咗黎？」Chris衝口而出，之後發現自從好似講錯野出暗住自己個嘴

點解佢會咁講同有咁既反應，但佢既反應好似係佢知道Cindy呢個人咁既，我明明無同佢提過架喎

「你知道邊個係Cindy？」我疑惑咁問佢

「唔知呀，我煮野食先！」Chris一講完就走咗廚房，好似心虛而避開我既問題

係我地食野既期間Chris不停同我講野，就好似唔想比機會我問佢問題一樣，食完野仲要好快手執碗，之後仲好快推我去沖涼

沖完涼返上床之後，Chris就去咗沖涼，係呢段靜落嚟既時間我係到諗，究竟Chris係咪有野滿住我呢，因為我好肯定冇同佢講過Cindy既事，甚至係Cindy呢個人，點解啱啱既反應Chris好似知道Cindy既存在咁樣



一講起Cindy，我就諗到今日同佢既情景，會唔會係有咩誤會呢？因為Cindy講緊野既時候，眼都冇眨過一吓，甚至用真誠既眼神望住我，完全唔似講大話，只是我當時好嬲聽唔入耳姐....

仲有我諗極都諗唔明，佢話有用新number打比我，但係我冇收到其他新number WhatsApp 喎，我諗極都唔明、難道係同Chris有關？睇黎我要認真問下Chris 知唔知咩事，始終佢既行為同反應都好奇怪

當Chris沖完涼出嚟之後，我就同佢一齊坐係梳化

「Chris，我有樣野想問清楚你，希望你可以認真答我」我捉住佢雙手，嚴肅地問佢

Chris好似被我既態度嚇到

「嗯，你問啦」Chris呆咗一陣，之後深呼吸，好似準備好我要問佢既問題

「Chris，你係咪知就Cindy呢一個人既存在」問完Chris問題之後，我既心跳得好快，我好怕佢會答知道