我以為自己要孤獨一世，直到你出現: 第七十六章-真相
———————————
Chris
今日約咗人，收工之後就出咗旺角，同佢都有一排冇見啦，我同佢約咗係以前讀大學果陣成日都會去既火鍋店。去到火鍋店門口已經企滿人，估唔到仲係同以前一樣都係咁多人，我一到就拎咗飛先，咁樣佢到就差唔多可以入得去食
過咗一陣，已經輪到我個Number，但佢仲未到只可以入住去先，當我坐低之後就WhatsApp下佢，睇下佢到邊先～
「你到未呀？🙈🙈」
「係門口啦」
見到個message之後就即刻望去門口，見到有一個女仔拉開門入嚟餐廳，佢同大學果陣唔同咗好多呀，果然出到黎社會完全唔同晒，爭啲唔認得佢添
「喂！Bella，好耐冇見啦」
「Chris！！」Bella一見到我就攬到我實一實，估唔到佢仲係咁熱情呀
Bella嚟到之後，我地就好快手落單
「嘩！做咗空姐真係唔同啲喎～」我掃描一下Bella既身材對住佢奸笑
「頂你～食野啦」Bella坐底咗之後，就拎起筷子夾起一塊牛肉就放落個爐
「仲好講，等你呀」我夾起舊響鈴放落個爐兩三秒後再攞返出黎
我同佢一邊食住野一邊講返以前讀大學既事。估唔到我地咁耐冇見，但再次見面時完全冇尷尬，仲係同以前咁好傾
「係呢，最近有冇拍拖呀？」佢細細聲咁樣講，好似怕會提起我既傷心事，因為當年同Ex分手既時候都係Bella係身邊陪住我，陪住我渡過果陣時間，都難怪佢再問我會感情事時會咁樣
「都係咁囉～」提起感情事就諗到我同呀賢既關係，我地之間男女朋友關係又唔係，普通朋友又唔係，所以都唔知要點樣同佢講成件事
「咁即係點呀？有定冇呀？」Bella用好八卦既視神望住我，就好似知道我有野隱瞞住佢咁
「其實我同一個男仔既關係唔知點」我慢慢將我同阿賢嘅事講咗比Bella知，但係就冇講我地上床既野，廢事嚇到Bella啦
「咁奇怪既？有冇個男仔既相睇呀？好靚仔傢？」Bella好八卦咁問
「咪咁樣囉～」我係電話度搵咗呀賢其中一張相俾佢睇
「都幾正常，又唔係好靚仔，不過...」Bella拎咗我部手機，望咗一段時間
「但係咁熟口面既？係邊度見過呢...」Bella皺眉頭係到思考緊，但係正常佢應該冇見過呀賢個喎，唔會咁啱又係咩中學同學掛
「呀！我諗到啦，我對上一次飛日本個陣時見過佢呀！」Bella擘大眼睛好激動咁講，大聲到周圍既人都望過黎
「吓，你會唔會係認錯人啦？佢應該冇搭過飛機個喎」我用疑惑既眼神望住Bella，會唔會係佢認錯呀，呀賢邊有錢去旅行姐.....
「um....你肯定佢冇第二個？」Bella面色一沉好認真咁問我
「應該冇，佢冇同我提過....」Bella突然咁樣問令到我好不安，同時搞到我都有啲膽怯
「但係我好肯定冇認錯人呀.....」Bella開始講起佢見到呀賢既情景，逐一逐一講我知，佢越講我就越驚訝，直頭有啲唔敢相信，但係Bella既語言好肯定.....
我地最後冇再討論呢件事，我地食完飯之後就各自各搭車返屋企。係搭緊小巴返屋企既過程時，我將Bella同我講既野再加上呀賢之前奇怪既行為，好似啲事都被解釋得一清二楚
Bella話坐係呀賢隔離既女仔高高瘦瘦，好靚女仲好氣質，Bella講呀賢同個女仔既關係一定非比尋常，仲有呀賢之前無啦啦請假一個星期，話唔定呀賢真係去咗日本，加上佢之前送比我既公仔....
我番到屋企就達咗梳化到，聽到廁所有灑花嘅水聲應該係呀賢沖緊涼，佢出到黎應唔應該問佢呢？但係如果佢直接承認咗，咁我又點呢...到時我同佢變到點樣
「噹！」係呢個時候呀賢既手機響起有訊息既聲音
當我望過去，咦？！個號碼開頭係+1xxxxxx咁奇怪既！呀賢有外國既朋友咩，我拎起手機撳咗入去見到個Icon！居然係呀賢同另外一個女仔係迪士尼既城堡面前影相，佢地兩個仲笑得好開心添，我再諗起之前Bella話聽到佢地兩個用老公仔同老婆仔互相叫對方，當我見到呢張相仲有諗起Bella講既野，好似都係度逼我知道，呀賢係出面有另一個女仔......
我手震住撳入信息入面
「呀賢，爸爸手術成功咗啦😁😁」
「佢身體佢再好返啲我就番黎架啦😘😘」
個女仔同呀賢究竟係咪男女朋友關係？而我只係一個意外？呀賢係咪因為呢一個女仔離開咗，而呢一排都心不在然，好似一直都等緊一個人咁
如果呢個女仔返到嚟，係咪象徵着我將會失去呀賢？究竟我要點做先可以留得住你呢？我唔想你係我身邊離開呀，難得呢排我地先慢慢變得親密
我最後做咗一個決定，我想偷多啲時間，我想將呀賢留係我身邊，我將個女仔既信息刪除，再將佢既號碼將入黑名單，我知道我咁樣做好賤，但係...我想呀賢可以係我身邊，我真係唔想放手呀
「咦你番黎啦～」呀賢沖涼出嚟時，我已經將手機放返原位，好似一切都冇發生過
當我沖完涼返上床之後，我緊緊地攬實呀賢，因為我怕唔攬實就會失去。
呀賢對唔住，我知道你等緊佢，但我都一直都等緊你，我以為自己同你有機會，只係時間既問題，但經過今日之後我先發現原來我一直都冇機會，希望你知道之後唔會嬲我，唔會憎我。呀賢，我只係想攬你多一陣