我以為自己要孤獨一世，直到你出現: 第七十章-我的生日（下）

「個蛋糕你親手做架？」我改為攬住 Chris條腰問佢

「吓！你唔中意呀？」 Chris好擔心咁問

「點會唔鍾意呀，個蛋糕咁靚～」面對住小熊維尼蛋糕，再加上托住蛋糕既人，簡直就係完美既配合

我見到Chris有少少污糟，隻手指都包左膠布，一定係整蛋糕既時候受傷啦，佢真係為咗我做咗好多野

「多謝你呀Chris」我錫咗Chris一啖



「個願先啦先啦～」我匿埋眼，雙手合十，許咗個願望，我希望Chris會永遠都係我身邊，一直都陪住我

「得啦～」我擘大眼，將啲蠟燭吹熄

我同Chris一人一啖都係食唔晒個蛋糕，而係側邊既小柒一直都虎視眈眈，梗係唔可以比佢食啦，話晒都係我生日喎，況且狗都唔食得呢啲嘢既

唉，雖然有Chris比驚喜我，但係生日都要番工，好似有啲頹廢，而且公司又趕緊進度，唯有番工啦

「呀賢～生日快樂呀！」呀俊係背後拎出一個雪芳蛋糕，蛋糕上面要插着左支蠟燭，估唔到佢又幾鬼馬，仲以為呢個情節淨係可以係戲入面先見到



「多謝你呀俊！」

我同呀俊一路坐低一邊係到講，我都話呀俊老婆好錫佢架啦，呀俊生日帶咗佢去食五星級酒店自助餐，仲送咗個模型櫃俾佢擺模型添，唔知今晚Chris會比咩驚喜我呢

我一番到屋企，就喂飽小柒，幫佢執埋屎，又走咗去沖涼，仲特登用咗大量既沐浴露令自己香噴噴，話晒今日都生日，點可以唔gel頭呢，住型啲呢～

我換好晒衫坐梳化上面，一路睇電視一路等Chris番黎，反而小柒今日好乖，一直係我身邊陪我睇電視，唔知隻衰狗係咪知我今日生日，所以特別乖呢

「呀賢～等等我啦」Chris一返到黎就急急腳衝左入廁所



好快Chris好快出咗黎，佢著背心格紋連身裙，仲襯咗黑色皮鞋，好可愛呀！

「行得啦～」Chris着完鞋之後講

「嗯」我拖住Chris出門口

「係呢，我地今晚去到食飯呀？」我一邊行一邊講

「跟住我黎啦～」當我諗住行去小巴站既時候，Chris突然拖住我行去另外一邊

我冇睇錯呀？係Tesla呀，車前面仲有個司機微笑歡迎我地，估唔到Chris會安排司機車我地去食飯

「就係呢到呀？」我地黎到尖沙咀一間好靚既酒店，唔係真係呢到呀？！

「係呀，我地行啦～」聽到之後我都有少少唔敢相信，我仲諗緊既時候，Chris就拖住我入咗去



Chris係門口同員工確認booking之後就帶我哋去個位到坐低啦，呢到真係好正呀，環境優美，燈光仲有少少情調，而且出面仲有好多野食，有我最鍾意既牛扒呀～

我好心急咁行出去，攞住兩隻大碟，係咁叫Chris幫我夾啲食物落隻碟到，幾乎兩隻碟都裝滿晒

「你食慢啲啦，傻仔～」

「嗯...但係...真係...好..好...食呀嘛」我一邊食一邊講，實在太好食啦

過咗一陣，我終於食晒個兩碟野，但係Chris去咗咁耐都仲未番既？佢話佢去攞甜品，15分鐘都應該攞得晒啲甜品啦～

「呀賢～」Chris攞住隻碟番黎，直接上面有兩件蛋糕仔，碟上面仲有用朱古力寫既字

「呀賢 Happy Birthday 」



「多謝你呀～」

「你睇吓中唔中意？」Chris係個袋度攞到一個盒出黎比我

「嗯，好中意呀！」一打開就見到一對手額，一銀一金，估唔到我會收到咁好嘅禮物，有咁好既女朋友真係三生有幸呀！

我地戴上情侶手額，順便叫咗侍應幫我地影相，我地面貼面，露出笑容，就係咁我地影咗張影即有相～