我以為自己要孤獨一世，直到你出現: 第七十一章-暫別

我同呀賢道別錫咗一啖既同時，我靜靜地將張信用卡擺落佢衫袋度，雖然我唔可以係身邊照顧到佢，但希望佢可以拎住張卡玩得開心啲，可以開開心心玩埋剩低既日子啦

我擰轉面離開，就黎行入離境大堂既時候，突然之間好想望多佢一眼，我就擰轉面，見到佢露出笑容仲向我揮揮手，好似話比我知唔使擔心佢咁，我都點頭微笑回應佢，之後就行入離境大堂，我怕我再唔入去，我會唔捨得呀賢

上到飛機之後我靠住窗口，望住出面既雨水，距離同呀賢離別只係過咗半個鐘，但我已經開始掛住佢，呀賢...其實我真係好唔捨得你... ...

「我上到機啦✈️✈️」我諗佢都準備離開機場，冇我係佢身邊唔知佢會唔會唔適應

「放心啦，我會照顧好自己同埋會乖乖地等你番黎架啦😘😘」見到佢咁講，我都安心啲



「咁就乖啦🥰🥰」

「你睇下我icon」我轉左WhatsApp icon等佢會有更多安全感，知道我心入面有佢

冇耐之後見到呀賢都轉左WhatsApp icon，係我地係迪士尼影既相，見到佢咁樣做，令到我感受到佢對我既重視，冇因為我既突然離開而嬲咗我。

但爸爸果邊唔知道究竟係點樣，我只係收到細姨打電話黎淨係話爸爸有事入咗醫院要我即刻返去，但又唔講清楚係咩情況，但好少要我咁急要我返去，今次一定係好大件事先會咁急，如果唔係咁樣我一定會陪埋呀賢返香港先再過去，佢喊住口打電話比我叫我快啲番去，一定係有大事發生先會咁樣

「小姐，麻煩你扣好安全帶」過咗一陣有個空姐過黎同我講，飛機都應該差唔多起飛



來日本既時候係手拖手，但而家就只係得我一個，突然諗返起第一次嬲呀賢既情景，仲有佢第一次叫我做老婆仔既心情，有佢係我身邊真係令到我生活變得開心好多，雖然個衰人會昅啲空姐

「飛機要起飛啦，我去到美國再搵你啦😘😘」

「好呀😍😍」

臨飛之前，我襯仲可以發信息就send WhatsApp 比呀賢，佢好快覆番我，睇黎佢一直都望到電話實一實喎

係飛緊既過程當中，雖然已經好攰但一直都訓唔著，因為太擔心呀賢，佢會唔會唔識路，會唔會同人溝通唔到，同時又擔心爸爸究竟係出咗咩事會入咗醫院？呢兩個人都係我心命之中最緊張既人，同時都係最錫我既人



係飛機上既時間過得好慢，我唯有拎notebook出嚟，打開我同呀賢一齊睇既果套劇Netflix ，雖然答應咗要等埋佢先一齊睇，但我諗佢知道我自己睇咗先都唔會嬲我既，平時有佢同我一齊睇，但而家我一個人睇好似套劇都變到有啲悶，睇睇下不知不覺訓著咗，當我訓醒既時候已經差唔多要落機。

一落到機，就攞行李行出機場，截咗架的士去直接趕去醫院

去到醫院，已經見到細姨係醫院門口等緊我，佢既樣好躊躇緊張，見我行過嚟就即刻拉住我去到爸爸既病房

係出面既大玻璃已經見到爸爸係張病床上面，身上插着左喉

「細姨！爸爸而家點呀？」見到爸爸咁既情況，比我預期中差太多啦，冇諗過會嚴重到咁樣

「你爸爸...佢...前...果..幾日中風....」細姨講講下忍唔住喊咗出嚟

「吓，點解會咁架？」爸爸之前都好健康架

「醫生話佢平時食埋啲膽固醇過高嘅野，所以導致咁樣」



「爸爸呀！」我行到去爸爸床邊，緊緊地捉住佢隻手，淚水忍唔住流出嚟

「原本你爸爸唔比我通知你，但而家佢幾日就要手術，所以我先要你快啲返黎」

「爸爸你要加油呀」我握住爸爸隻手默默地講，

我搵地方坐低咗，等自己冷靜落黎，細姨因為太攰而返咗屋企休息同時幫我拎行李返屋企先

等待既時間真係好折磨人既心，特別係係最需要人支持既時候得我自己一個，如果呢個時候有呀賢係我身邊陪住我就好

「Chris?等咗咁耐，不如食少少野先？」我抬頭見到一個男人將三文治遞比我

「你係....？」