我以為自己要孤獨一世，直到你出現: 第六十六章-開始要忘記
「喂，呀俊快啲過黎睇下」我show我平時係屋企幫小柒影既相比呀俊睇
真係同呀俊一齊開工既時間開心好多，有個人陪我吹下水，都冇咁悶
「嘩！隻狗仔好頂癮喎～你同Chris養架？」呀俊講得好細聲，可能係因為驚其他同事知道我同Chris既事
我地兩個輕輕鬆鬆，吹下就收工啦，我同呀俊講拜拜之後，就急急腳咁走趕搭巴士，因為實在太掛住小柒啦～
我一打開門就見到滿地下都係棉花，我跟住條棉花路行到入我間房，已經見到小柒咬住我係秋葉原夾番黎既小熊維尼，好開心咁左fing右fing，見到我仲望咗我一眼，就繼續開心fingfing，我立刻沖過黎去！
「喂！小柒，放口呀！」我大叫同用力扯小熊維尼番黎
幾經辛苦終於搶番番黎啦，但係小熊維尼已經比小柒咬到爛晒，入面既棉花都已經跌晒出黎，壯烈過身，唉......我對你唔住呀！冇好好保護你呀！
「汪！汪！」小柒見到第二隻小熊維尼就即刻衝過去
我阻止佢衝過去，快手快腳將小熊維尼收入衣櫃入面，出面淨係剩番我最討厭既蛋黃哥，小柒即管同我咬爛佢啦～
望住呢隻手上呢隻小熊維尼，突然諗起當時Cindy係日本迪士尼樂園買比我既情境，唔得！我唔可以再諗起佢，我答應過對Chris好，咁樣做會對佢好唔公平，我將小熊維尼收入最高果格，費事再比我見到，就會諗起唔應該再諗既人
「呀賢～我番黎啦」Chris一番到黎就大叫
「Chris，救命呀！」我即刻執起小熊維尼既屍骸，擺出一副可憐既樣向住Chris
「汪....」我擰轉頭睇，嘩！我養咗隻咩狗呀.....
小柒擺出一副無辜嘅表情，仲擔拖鞋去Chris面前，仲要嗲咗佢幾下，簡直係影帝上身呀！估唔到呢隻狗居然識呢啲技能
我同Chris講番隻小熊維尼慘死嘅經歷，Chris一路聽一路大笑
「睇黎要好好教你啦～」Chris指住小柒講
我同Chris不斷上網搵教學片睇，我地由最基本既比手手開始睇起，過咗一陣，我同Chris都有把握，可以做好第一步
「小柒，hand～hand」我伸出手示意，小柒望左我一陣，之後賴左我手口一下，屌，佢以為我隻手有野食呀！
「到我啦，hand～hand」Chris一伸出手，小柒就立即放隻手上去，正一狗公！Chris隨即攞狗餅比小柒，小柒即刻食到舔舔脷
有啦！我可以親自煮野食比佢，等佢聽我話比佢知我係佢米飯班主！上網search咗一段時間，先發現原來狗食野仲腌尖過人啦，有咁多材料，屋企應該冇，睇黎要落街買啦
「賢，不如我地落去買晚餐？我有啲餓呀」挨係我旁邊既Chris問我
「好呀好呀，你換衫先啦，我等你呀」我就襯呢段時間，我同小柒用狗玩具黎一場拔河大賽
點知小柒完全冇理到我，仲跑左上梳化坐係我旁邊，大鑊！Chris換完衫出到嚟，見小柒又跑上梳化，忍唔住眉頭一皺，佢唔鐘意小柒上梳化，因為怕佢腳會污糟同時怕小柒會訓係佢旁邊
「三小柒，快啲落嚟啦，你媽咪會嬲你傢」見佢唔明我講咩野，我唯有用誇張既肢體動作，示範一次比小柒，示意佢要跳落嚟，但個衰狗居然好似睇表演咁只係望實我做完，而自己冇任何反應動作
唉，隻衰狗呀，居然咁樣對我呀，最後我直接抱佢落嚟
「Chris，可以行得啦」向前一望就見到Chris忍笑忍到就黎頂唔順既樣
我地終於出咗門口，買完飯之後我地繼續Sweet sweet咁行去惠康
「Chris，多謝你，你唔鐘意狗，但我帶咗小柒返屋企」Chris擰轉頭，輕輕拍一拍我
「呀賢，其實Ok傢，我會慢慢去適應，只係要多少少時間」Chris對住我笑一笑
「多謝你呀」我忍唔住攬實Chris，佢對我真係太好啦
「我知道你好鐘意狗想養好耐，既然你同小柒咁有緣，我當然唔會反對啦, 你想做既野我都會支持你」聽到Chris咁講，我將佢攬得更實
「我地要快啲買完食材返去呀，啲飯盒都凍曬啦」Chris拖住我一齊開始揀材料
而家咁既生活可唔可以一直維持下去呢... ...之前Cindy既出現令我好似仲有人會關心，我以為自已搵到一生最愛，但最後......令到我對於而家既幸福，好似患得患失咁......
「賢，諗咩諗到咁入神呀，我叫你都聽唔到既」
「冇呀，只係諗緊一陣幾點帶小柒落去散步啫」我對Chris笑一笑
買完之後我地就快快行返屋企，因為我都好驚再有公仔出事呀
我地一打開門，已經見到小柒係門口fing曬尾巴咁等緊我地。係我一直理想既生活呀！拖住女朋友之後，返到屋企會有隻狗仔迎接我地番黎
「Chris，你食野先啦，我整埋啲野食比小柒先食呀」我諗住拎野入廚房就開始整晚餐比三小柒食
「哇! 我都未食過你整既野，居然係隻狗先試你整既野食」Chris擰轉面背對住我，扮呷醋
我即刻放低手上既野，跑過去攬住Chris
「煮比女朋友食既野，當然要好好計劃完先整啦，點可以咁隨便傢」我眨一眨我精靈既大眼睛
「你咁講即係諗緊煮野比我食啦，我等你煮既野傢呀」Chris 即刻笑返，仲要係一個滿意既笑容
「當然會整啦，女朋友想幾時食我就幾時整」我大力拍一拍心口
「咁我都幫手一齊整啦，咁快啲整完就一齊食晚餐啦」Chris講完就立即往廚房行去
「Chris，等埋等埋」我行過去錫咗Chris一啖，之後就開始兩個人一齊跟住YouTube 教學整三小柒既晚餐... ...