我以為自己要孤獨一世，直到你出現: 第六十七章-三小柒

「小柒～過黎食野啦」我用新買既狗兜裝住我同Chris為佢整既晚餐

今次我要好好展示一下主人既威嚴啦

「小柒！Sit ，hand hand」三小柒眼一直望住我手上既晚餐，而身體就跟住我既指示做，睇黎我主人既風範返曬黎啦

「等等…未食得住呀」小柒望住兜食物，流曬口水望都唔眨

「OK，可以食啦」小柒一聽到OK就狗衝去食，唔使五分鐘已經清曬，照咁睇嚟佢都幾鐘意我整既野食喎



我見時間仲早，所以就同Chris坐係梳化抖一陣先，等陣先同小柒去散步

「呀賢...」Chris 原本睇緊手機，但突然面向我

「嗯？咩事呀...」

「嘻嘻...都係冇野啦」當我望返佢既時候，Chris又欲言又止又冇講野

「不如我地而家落去散步啦」Chris突然提出早啲落去散步



「好呀！」我即刻起身，拎齊要帶既物品

「三小柒！我地去街街啦！」小柒一聽到去街街就即刻彈起身，跑到我地兩個面前，條尾瘋狂fingfing

我幫小柒帶好狗帶就出門口，而小柒一直保持本興奮狀態

落到樓下之後我等小柒冷靜返先再行，慢慢行行下小柒已經冇再向前衝

「Chris，你要唔要試下拖繩呀」當我諗住將繩遞比Chris時，佢拒絕左



「唔好住，我怕佢會拉住我走呀」Chris 耍手擰頭，咁佢驚都正常既，睇嚟再要再多D時間先可以

「賢，不如你等～等呀，我想去買少少野呀」

「好呀，我企係呢度等你呀」我同小柒企定定望住Chris行遠

「小柒，你要乖啲啦，你乖啲Chris先會唔驚你傢」我對住小柒講，而個衰狗望上望一望我，好似聽得明我講咩咁既樣

我一講完，小柒突然起身向前行

「小柒，你行去邊呀，我仲要等...」突然間小柒停低咗

頂！隻衰狗停左係個長腿靚女面前呀！

「狗仔～你好呀」長腿靚女痞低摸摸小柒既狗頭



「唔好意思呀，有冇嚇親你呀」我連忙同長腿靚女道歉，呢隻狗真係識揀人呀

「你隻狗好得意呀，叫咩名呀」

「佢叫小柒呀」個名真係唔係咁好意思講出黎呀

「個名咁得意既」長腿靚女聽到之後笑左出嚟

「呀賢？」我隱約聽到Chris叫我個名，一擰博頭，發現Chris一面鄙視咁望住我

我立刻拉住小柒行返去Chris既身邊，一行到過去就感受到一股殺氣

「啱啱係咩事呢？同過女仔咁好傾既」Chris既笑容中帶一種想打我既怒氣



「冇呀！啱啱三小柒拉住我過去渣！真傢！」Chris聽到之後望一望小柒，而隻衰狗一副事不關已既樣，望返我

「唉算啦，去散步啦」Chris拖住我，我拖住小柒，好似一家三口呀！

我同Chris既感情都越黎越好，每日放工番到屋企都會見到小柒fing住隻尾等我同Chris

Chris番黎就立即行過去嗲佢幾下，Chris一開頭都有啲唔習慣，但慢慢都習慣咗啦，反而係我越黎越唔習慣，因為明明係我執佢返嚟，但小柒成日都係望我一兩眼之後就走咗去訓覺lu

「Chris，係到睇緊啲咩呀？」我側邊挨住Chris既膊頭

「冇呀～係到睇緊點樣再訓練狗仔咋嘛」睇黎Chris真係想訓練好小柒

「小柒～」睇咗一陣之後，Chris就好有把握叫小柒入黎

「砰～砰」Chris用手指帶出手槍既姿勢向住小柒



小柒即刻趴係地下扮死，簡直係影帝上身，究竟你係咪人扮架？Chris即刻攞狗零食比小柒，小柒食到舔舔脷

「砰～砰」我都係學 Chris咁用手指帶出手槍既姿勢向住小柒

點知隻衰狗一啲反應都冇.....有啦！我係Chris攞咗啲狗零食比小柒食

「砰～砰」希望今次得啦

佢今次直頭理都唔理我，直接走埋去Chris，小㭍你呢隻死狗公！當初真係唔應該執你番黎到

「汪～汪」小柒仲開始走上去Chris既大髀上面

「唔好呀啦～小柒」 小柒不斷奶Chris塊面，Chris比小柒整好痕，不斷推開佢



「喂，Chris係我架！」我係Chris身上推開小柒，小柒仲係不斷衝向Chris

「算啦～由得佢啦」小柒係Chris身上坐低咗，而Chris就一直摸住佢個頭

小柒你呢隻死狗公，等我上網睇吓邊度有得閹咗你！