我以為自己要孤獨一世，直到你出現: 第四十章-Again PTBF
「呃～呃....咳..咳....呃～」我聽到廁所傳來聲音，即刻跑過去睇下發生咩事，之後就見到Cindy對住個馬桶嘔緊呀！！！
「你見點呀？」我立即走到佢身邊痞低
「呃～呃～呃」Cindy已經唔得閒理我，不斷係到嘔呀！我掃一掃Cindy個背脊，等佢可以舒服啲
「呀賢～」Cindy挨住我，嘴角仲有啲污漬
「冇事啦～冇事啦～」我攞起紙巾抹走佢嘴角啲污漬
我一手抱起佢上床，我再出去倒杯暖水放係床邊，而Cindy休息左陣就斷斷續續咁飲哂，之後佢就迷迷糊糊訓著左～
一起身見到Cindy塊面仲係紅卜卜，睇黎佢尋晚真係飲唔少，下次都係叫佢去會好啲，但係我用咩身份唔比佢去呢......男朋友？
都係唔諗咁多啦，我抽返Cindy枕住我既手出黎，我係枱面搵到memo紙同筆
「下次唔好飲到咁醉呀！！！」之後將memo紙貼係Cindy個頭到，就當懲罰下佢
「我今晚唔番食飯」我貼多咗張memo係Cindy左面
「你乖乖地等我番黎啦」我再貼多咗張memo紙係Cindy右面
Cindy瞬間貼到滿面都係memo紙，見到都忍唔住笑出黎，我攞起手機拍低佢呢個樣 ，遲下攞黎笑下佢都好，比佢個飲醉會變成點
我係衣櫃面前諗左好耐，今日着邊套衫好呢，又要去Chris屋企扮佢男朋友，又要出入地盤咁多灰塵，但係我又冇時間換衫喎...最後揀左着到靚靚仔仔咁樣落地盤啦
「喂，乜著到咁靚呀～」我一番到架步，就已經比呀俊笑
「屌你啦～」你估我想既咩......
收工之後，我係Chris屋企附近燒味舖，買咗乳鴿同叉燒加餸，上次就咩都唔識要Chris準備埋，今次都要做返次稱職既一晚男朋友啦
「咦？！你落咗黎既」一行到樓下，就見到Chris係樓下門口等緊我
「係呀～預到你幾時到咪落黎等下你」Chris好主動過黎拖住我隻手一齊搭lift上去，我地上次仲係尷尷尬尬咁，而家Chris 拖住我隻手變到好順其自然
「呀女，你落去咁耐先上返黎既～ 」一打開門，伯母見到我就好熱情咁由廚房走出黎
「係呀，伯母，Chris等埋我先上黎呀」我望一望Chris，佢尷尬笑左笑，原來佢已經係樓下等左我好耐，而唔係預啱時間落去
「伯母，我買左燒味加餸呀，唔知你地啱唔啱食」我將買左既燒味拎入廚房
「乜咁客氣，上多幾次黎食飯咪得囉～你出去先啦，好快食呀」伯母每次見到我都笑到見牙唔見眼，睇黎佢真係好想我多啲上黎食飯
「原來你間房係咁既」由廚房出到黎發現Chris唔係廳度，已經入返自己房，反正冇咩事做，我就行左去Chris間房參觀下，反正我都好少見到女仔間房
「係呀，我搵緊野呀，你坐係床等等我啦」Chris間房唔算大間，但感覺好舒服。有衣櫃有床，仲有...蛋黃哥床單，蛋黃哥公仔？！佢張床就好似蛋黃哥小世界咁樣，呢pat野有冇咁大吸引力呀，唔怪之得屋企張維尼大帝床單最後變咗做蛋黃哥啦....
我揀左個靚位坐落張床，就係啱啱好用屎忽遮住隻蛋黃哥，廢事見到呢一pat野，令我諗起陣亡咗既小熊維尼
「Chris 你仲有個細佬咩，冇聽你提過既～」我見到電腦旁邊有張兩個男仔小朋友搭着膊頭影既相
「你講乜野呀！其中一個我黎呀～」Chris擰完頭，望一望我好嬲講完之後擰轉咗面
「哇，估唔到喎，點解而家咁靚女既」我見Chris嬲爆爆既樣，即刻氹返啱啱講既野
「算你啦～」Chris聽到我咁講即刻笑返
「呀賢，食得飯啦～」伯母係出面大叫
等齊人就開始食飯，今次仲多個女人，呢個女人應該就係Chris要搬走既原因啦
唔諗咁多啦，對面住既生炒骨～清蒸石斑～蒜蓉炒白菜仔～好似好好食咁，都係專心食飯啦！
今日食飯既氣氛比上次好好多，Chris不時會夾餸比我，或者同我傾兩句
「係呢，呀賢你究竟係做咩架？」伯母又係必問題目啦，睇黎上次問唔到佢都未放棄喎
「呀媽！」今次Chris同上次一樣諗阻止伯母繼續問
「唔緊要啦，Chris～」我拍一拍Chris隻手示意佢唔洗擔心，交比我就可以
「我係做工程師架～」工程師呢一個銜頭肯定冇死啦，唔通我答佢做緊學徒咩......
「咁咪搵好多錢囉～」果然真係！啲呀媽都係擔心個男人養唔養得起個女
「媽，你唔好成日問呢啲問題啦」 Chris有啲不滿咁同伯母講
「咩呀，呀媽都只係八掛一下啫」
最後伯母都係繼續問我各種問題，為左Chris唔會比佢呀媽煩住，我將我要答既野都包裝過先答，根據伯母嘅表情睇嚟佢都幾滿意，今晚真係做咗一個盡責嘅一晚男友啦
食完飯之後就開始食飯後水果
「呀賢 sorry，我呀媽咁多野問」Chris有少少唔好意思
「唔緊要啦，扮要扮到底呀」
「呀賢呀，我煲左涼茶，你地拎支返去飲啦」伯母拎左支野出黎遞比我
「媽，我地要走啦」Chris講完就拉住我住我出門口
Chris一直拖住我，直到去到車站先至依依不捨放手
我都搭上巴士，返去搵我女神～