我以為自己要孤獨一世，直到你出現: 第四十一章-暗示

「呀賢，你今日得唔得閒呀～」Cindy一訓醒就問我

「得呀，做咩呀？」我望住係我胸口既咁靚既Cindy，緊係咩都答應佢啦～

「陪我整皮革呀～」Cindy露出笑容咁講

「好呀！」我好爽咁答應咗佢，我都好奇皮革究竟係點整架啦？

「咁我煮早餐比你食呀～」Cindy講完之後就起身行咗出去啦



「嗯，好好味呀！」我狼吞虎嚥咁食個早餐，而Cindy依舊都係笑住咁望住我

食完早餐之後，我同Cindy黎到皮革工作室，上到去成個環境好舒服

咁啱我地黎既呢個時段得Cindy一個人學整，之後個導師叫我地搵個位坐底等一等，而Cindy行開左去廁所

「呢個先生要唔要一齊學呀？今日冇咩人可以即場join，可以整個陪女朋友喎」個導師行過黎問我

「原來可以咁，好呀，我都想試下」淨係等好似悶左啲，兩個一齊整都唔錯呀。仲有...係咪多數陪女仔上黎既都係男朋友，所以個導師就直接咁問我呢... 我都想可以做到佢男朋友呀



「小姐，呢個係你既材料。先生，呢一份係你既」導師將我地要用到既工具同材料準備好，放到我地坐位面前

「呀賢，點解你都一齊整既？」Cindy不可思議咁整住我

「唔話比你知」

「你諗住整咩呀」Cindy皺皺眉頭望住我

我地一步一步跟住導師既指導，用菱斬打窿，穿皮線，再慢慢縫線，呢一切都好新奇，原來都幾好玩



Cindy望住我笨拙咁穿線，忍唔住笑我，當Cindy用菱斬打窿攰時，我就幫埋佢打。係呢一 刻，我終於明白點解情侶咁鐘意一齊整手工

「Cindy ，你諗住整咩呀，好似咁複雜既」好彩有一齊整，如果唔係就等到我on99啦

「我整緊鎖匙包呀」咁奇怪既，通常都係整銀包，點會整呢啲野架

「你整比邊個架？」佢都唔用鎖匙包既，唔知係整比邊個呢？

「一個係我心目中好重要既人～」Cindy一講完就對住我陰陰嘴笑

「係咪你爸爸呀？」一定係佢爸爸話哂都係兩父女呀嘛

「唔係呀！」Cindy反咗一下白眼，繼續專心咁縫線

「佢係我最需要幫手既時候出現」Cindy擘大隻眼望到我實一實，個口仲好似仲想講埋下一句咁



「係咪你啲姊妹呀？」唔係親人，就係姊妹架啦

「都話唔係呀～」Cindy好似嬲左我，佢將張櫈移開一米，想同我保持距離

「Cindy～做咩移到咁開呀！」我將我張櫈同時移到佢旁邊

「Cindy，唔好嬲啦」我輕輕撞下佢膊頭

「哼～」Cindy已經唔係好想埋我，點算呀.....有啦！

「你睇下～」我用手指將眼皮向後拉，係呀希之前示範過，話咁樣係超人喎，當時我都笑咗一下，今次都一定得姐

「好低能呀～」Cindy笑咗出黎



「咁你係咪唔嬲啦」

「係呀，唔好再整啦，好樣衰呀～」Cindy打左等一下，佢就繼續專心整緊個鎖匙包，而我都繼續整我嗰個好易整嘅掛飾

我地整左成個下晏，走果陣都以為7點幾，Cindy小心翼翼咁將佢嘅鎖匙包包裝好拎係手，收到嘅人真係幸福，Cindy用咗成個下晝為佢整呢份禮物

返到屋企之後食完飯，我同Cindy繼續係張床到睇Netflix

「乜你咁蠢架！我都咁樣暗示你啦～」戲入面個女主角好嬲咁講

「姐係點呀～」男主角都好似唔知點咁，屌！擺明個女主角鍾意你啦，表白啦！

係喎！Cindy講「一個係我心目中好重要既人～」對住我陰陰嘴笑，唔通係我？！「佢係我最需要幫手既時候出現」肥仔果件事，係海旁出現仲有幫咗佢解決呢件事就係我！！！

「Cindy ，我出一出去好快返！」換番衫攞銀包鎖匙就出發



「的士～」我伸手出馬路不斷係咁fing 

「咦？！先生乜係你呀，係咪今日整既皮革有問題？」個導師咁啱打開門

「我有樣野好心急要整架～」我條氣都未抖順，一邊抖氣一邊講

「但係我地閂門啦喎」個導師尷尷尬街咁講

「求下你啦！」我90度鞠躬希望可以顯示我既誠意啦