《雖然枝奶變壞但沒關係》: 第四集-千里送「娥」毛

「冇理由㗎冇理由㗎，我應該眼花，佢去咗台灣拍嘢㗎！我啱啱唔會見到姜B㗎！」娥講完就用膠布黐住傷口又跑咗出門口，佢拎漏咗袋入面枝奶，袋咗出街。
-
娥喺英皇道登上106巴士，沿途在修理着熄了的曙光......合情合理，娥當然見唔到姜B蹤影，佢喺西灣河文娛中心落咗車。
-
「太安樓燒夜店」。
-
時間已經係入夜嘅9點鐘，病毒6點開工關係，太安樓嘅食肆全部要做外賣。娥走過通道，一家三口各有各拎住豐富晚餐歸家，仲有三五成群嘅老鼠曱甴尋開心。娥行到一間串燒舖，聞到香氣撲鼻嘅沙嗲串燒，摸摸自己個肚。
-
「係佢喇！」
-




娥企喺垃圾桶旁邊，凝望住戴住黑色口罩，喺串燒舖門口燒緊串燒嘅一個男仔。娥鼓起勇氣，喺袋攞枝薑濤奶，踏步向前......
-
「BB豬，入面冇晒料，你快啲入去切雞子先！」
-
被着住熱褲嘅少女先入為主。娥照照玻璃鏡，照咗鏡唔知醜。唔好唔記得佢有個病！
-
少女燒串燒手法比男仔純熟，香味引發周邊肚子打鼓效應。男仔入咗去pack外賣、切雞子，娥唔知陣間點樣打開話題？一息間，娥去咗排隊買串燒，佢見男仔喺度切緊雞子就諗住買幾串雞子串燒試下男仔嘅手勢。
-
前面仲有三個人排就到佢，而男仔恰巧切完雞子出嚟繼續燒串燒。娥夢寐以求嘅時刻來臨啦！飛雲！
-




男仔：「小姐，要咩串燒呢？」
-
娥：「我要你。」
-
男仔：「Um...小姐真係識開玩笑，你意思係咪我頭先入咗去整嘅雞子串燒啊？」
-
娥：「三串thx，同埋要你。」
-
男仔：「好....咦，小......」
-




娥：「好嘢，你話要我！我個姜B！」
-
娥連問都冇問過男仔係咪姜B真人，一嘢攬住男仔。男仔一下嚟唔切反應，動彈不得，一串美味可口嘅雞子串燒由橙紅嘅爐頭跌落曱甴老鼠嘅家園。等緊外賣嘅街坊話「你係咪點錯相啊？」。
-
女仔行返出嚟，見到個畫面之後跌咗兜外賣落地，佢用仇視嘅眼神對住娥，而娥攬咗5秒仍然嬉皮笑臉。事頭婆聽到出面咁大聲，行出門口睇過。
-
「咩事啊你嘈喧巴閉，阻住我哋做生意，而家唔做你生意啊！躝屍趌路！」見慣風浪嘅事頭婆霸氣、中氣十足。
-
娥：「我個姜B.....」
-
咁啱喺隔離買緊冰嘅阿sir路過，好好彩㗎，平時去影沙龍扮幫老人家囉OT㗎。始終娥最怕就係佢哋，驚佢哋搶奶先行告退。
-
「阿Sir，冇你嘅事，你走啦！」事頭婆怒睥阿Sir。
-
【計劃失敗，未能把薑濤奶送出。】




【意外成功，上討論區熱門第一。】
-
「西灣河串燒鯖魚天后。」又有新名。
-
「你阿媽我成世人冇嘢叻，最叻係呢兩次。」娥好鍾意將一啲未圓滿嘅事完成，上次買奶就係最佳實證。
-
娥又搭車去西灣河「送奶」。77巴士經過某路口，娥見到欄杆上一塊banner「切勿醉酒駕駛，安全回家飲阿媽靚湯。」與對面燉湯店相映成趣。「我飲奶就冇事啦！」
-
【任務一，乘車至西灣河，任務達成。】
【任務二，搵「姜B」送奶。】
-
「是日東主有喜，休息一天。」
-
人哋打開門做生意唔係俾娥亂咁嚟㗎！
-




如果，命運能選擇，十字街口踏出的每步更瀟灑。「娥再沒勇氣向你講舊時」最大謬誤係，娥冇fact check過串燒舖男仔係咪真•姜B喎。
-
奶類製品應擺放在10度以下，否則變壞。烈日當空，娥又開枝奶嚟飲。同時，我為串燒男仔送上深切慰問，尋晚瞓得著嗎？
-
如果有人睇到呢度，而家整個讀者互動遊戲。問題係：娥由第一集去到呢刻total飲咗幾多枝奶？計到嘅下面留言吖。
-
（待續 To be continued）

IG：chingchingstory