《雖然枝奶變壞但沒關係》: 第五集-燒夜店給娥的好人卡
烈日當空被娥嘅心情徹底改變，一嚿大烏雲彷彿將香港吞下。落住大雨，娥狼狽返到屋企，第一樣嘢除口罩洗手洗腳，然後寫情信。
-
【那未來在下雨，但雨中有預言書。】
-
「姜B，恭喜你！今日在百忙中休息一天，是讓你定下來目標走更遠的路。我定能會吃到你親手燒的串燒、為你送上飲品。我知道昨天攬實你很突然，沒辦法，我的性格是改不掉的硬頸。」
-
下刪數百字，可見娥對姜B真誠嘅動容。娥去到疫情關係隔日開放嘅郵局寄信。仲以為娥親身去燒夜店送信，有少少跌眼鏡。
-
「買串燒，送雞子！」
-
疫情生意額下跌，太安樓各商戶推出優惠鼓勵顧客消費。燒夜店只休息一天，否則可能錄得虧蝕。男仔天都未光就準備食材，迎接整天嘅生意。未營業嘅早上，老闆捲起半閘通風通風，「請侯片刻」。
-
「老闆，我擺封信喺度啊。」郵差叔叔送信純熟，將娥封信迅速送出。
-
老闆忙於煮湯底，「啲字丁屎咁細隻」，叫男仔去睇下。封信地址係燒夜店，人名：「姜B」。男仔心知不妙，同老闆娘講調轉職務入去整車仔麵，「你整啲串燒方法最傳統。」
-
「喺入面煮嘢熱死你啊！」老闆娘善意嘅提醒又帶點涼薄。眼不見為乾淨，男仔煮麵。麵麵麵麵麵，娥食唔食到男仔煮嘅麵？如果食到，粗麵幼麵伊麵拉麵定係老闆娘嘅殺手鐧-手打面？食唔到我就恭喜燒夜店渡過平安日。
-
「娥要將你拯救，逃離串燒荒謬。」娥FF緊男仔會將回信寄返回郵地址：屋企。
-
「咦老闆，燒夜店個social media幾個禮拜冇update過，我幫你宣傳下串燒優惠吖？」
-
「是但你啦，仲有啱啱封信冇用就揼咗佢啦。」
-
男仔影完幅信嘅相，封信與蝦殼、爛菜融為一體。食完飯嘅男仔，用燒夜店嘅page宣傳。男仔upload咗張「好人卡」三個字嘅相做封面。
-
「唔好攬住我哋，攬住袋串燒返屋企啦！我哋燒夜店而家做緊優惠，只要消費滿$50，就送你一串雞子串燒！你唔快啲嚟買，好快就會少兩粒、少兩粒.......係買晒啊！到時唔好怨啊！大熱天時仲攬嚟攬去，去食宵夜啦，想攬嘅攬啲串燒啦！我哋燒夜店欣然為認真喜愛食物嘅你服務。」
-
一間串燒舖嘅PR，冇引起災難仲俾人讚靚抽。留言唔少人都話，我要食晒你啲雞子！
-
【抬頭望星空發夢，仍然自信，等到遠處，你為我寫那一封。】
-
冇社交網站嘅娥同樣冇社交，俾人抽水都唔知，喺度自我陶醉攬「姜B」。娥睇嚟開始發作，真係喺雪櫃攞枝奶出嚟攬住。
-
晚上，娥決定去搵「姜B」。「點會日日都有喜？如果今日都有喜，我食晒你啲鹵味！」娥嘅病活躍起來？鹵味喺隔離舖喎。娥當然記得袋住枝薑濤奶出去啦！
-
「曱甴啊啊啊啊啊啊！」一個等緊串燒嘅女仔見到有隻曱甴跑過，顯得驚魂動魄。對付澄澄故事台，用隻生嘅曱甴就OK。
-
「你唔搞佢，佢咪唔搞你囉。串燒都係，未夠時間唔搞佢，佢咪唔會唔juicy囉！」老闆娘的確燒得好食過個男仔。
-
有傳聞話動物嘅感覺比人類靈敏得多，能預知有事發生。言歸正傳，喺咁多人嘅時間下隻曱甴衝住去係有原因......
-
西灣河串燒鯖魚天后駕到！
-
喺咖喱汁翻滾嘅魚蛋、喺柱侯精華浸溫泉嘅牛腩雜、俾機打緊格仔嘅格仔餅......時間彷彿被娥停止。魚蛋彈咗落地、牛雜炆唔入味、格仔餅整short咗部機。娥呢刻好似日劇Doctor X行去手術室嘅盛大場面，等緊外賣嘅、揀緊水果嘅統統都要讓開，係爭幾個助手個畫面就完美喇。
-
「姜B呢？姜B喺邊度啊？」娥自言自語，又喺嗰關棘住咗。唔敢行過去嘅娥喺度東張西望，又俾老闆娘周到。
-
「又死過嚟做咩啊？姜B去咗台灣啊，你唔係買嘢食就飛去台灣搵佢啦！即係叫你隔離十四日啊！」聽返男仔講，原來老闆娘都鍾意姜B嘅。
-
娥再次失望而回，並喺不知情下收到一張好人卡，即係身邊嘅燒夜店個page啊。幸運嘅係，佢冇食到老闆娘嘅手打面。
-
「休息」
-
一日嘅工作比預期更早完結，皆因娥造就咗燒夜店嘅生意，所有食物售罄......娥竟然死心冇等佢收工。
-
娥：「趁我有半秒理性跳進雪櫃裏清醒，冷靜。」
-
男仔返到屋企。「喺燒夜店燒串燒遇到咁嘅事，十萬度攝氏誘發的火噴噴邀請，不懂反應。」
-
娥格硬塞自己入雪櫃嘅同時，男仔做全日最舒服嘅事-沖涼。
-
焫焫焫焫焫焫著，情愛似燃油炸藥。
-
燒夜店嘅宗旨：欣然為你服務。（西灣河串燒鯖魚天后除外）
-
翌日，燒夜店如常營業，雞子供不應求。祝生意蒸蒸日上！
-
完。如果繼續想睇呢個故嘅，就要集氣問澄叔喇。