自從同Miss喺一齊，我就忽然變得好受歡迎: 第282章 大結局(下)

「名份只係其他人用嚟確認我喺你心目中地位嘅方法，對於我嚟講，只要你對我好，其他人嘅睇法完全唔重要，娶Miss Cheung係你一直以嚟嘅心願，如果我咁都接受唔到，根本冇資格同你一齊。」周穎嘅一番說話令我既感動又心酸。
 
「真係委屈咗你，如果我可以做到啲咩嚟補償，你即管開聲同我講，雖然我而家諗唔到有咩兩全其美嘅方法，但係我一定會盡力做到最好。」除非移民去個有一夫多妻制嘅地方，唔係仲有咩可以做？
 
「唔緊要，我都話冇所謂，我決定同你一齊嘅第一日，就知道Miss Cheung先係你最愛，我可以分到你部份嘅愛已經好足夠，你唔需要覺得欠咗我啲咩咁，因為咁嘅話只會令我哋嘅關係出現不必要嘅裂縫。」周穎做咗阿媽後思想成熟咗好多，我真係自愧不如。
 
思穎同念穎用好奇目光望住我哋兩個大人，好似思索緊點解阿爸、阿媽個樣會變得咁凝重，果然遺傳咗阿媽嘅學霸基因，咁細個就鍾意思考問題。
 
「Miss Cheung過緊嚟喇，你快啲收拾心情做好求婚準備喇。」周穎嘅笑容好燦爛，睇落似係我介意多啲。
 


「阿穎，你對我咁好，我仲成日令你唔開心...」諗起之前激嬲周穎，又想同Magnolia發展嘅自己，我實在唔知講咩好。
 
「你仲講呢啲，念穎，過番嚟媽咪度，唔好阻住爹哋。」乜原來我係抱緊念穎咩，周穎唔講真係唔知喎。
 
「咦？阿Wing做咩急急腳走咗去，我仲啱啱有啲嘢想問佢添。」Miss Cheung望住周穎背影，作勢想叫住佢。
 
「Miss，你唔好搵阿穎住，我有啲嘢想同你講。」我伸手截住Miss Cheung。
 
「哦，你有咩同我講呀？」Miss Cheung轉向我問。
 


「Miss，之前我問過你幾時先可以娶你，你話等我畢業後，今日我正式畢業喇，所以我覺得係時候為我哋嘅關係再行多一步。」我單膝跪地，喺衫袋攞出一早預備好嘅求婚戒指：「張惜頤，你可唔可以嫁俾我？」
 
Miss Cheung伸手揞住咀，一臉愕然咁望住我，連懷裡面嘅惜頤都感受到氣氛嘅轉變，睜大雙眼靜靜望住唔知做乜跪咗喺地上嘅我。
 
彷彿下定決心，Miss Cheung點點頭，雙目滲出喜悅嘅淚水：「我之前拒絕你，並唔係因為唔想嫁俾你，而係希望你可以諗清楚，今日係你踏入人生另一階段嘅大日子，亦係你正式成為大人嘅一刻，我話過，只要你仲想娶我，我一定會嫁俾你。」
 
「我想娶你，呢個係我由認識你開始至今嘅心願，從來都冇變過。」我堅定地對Miss Cheung表態。
 
「張子龍，咁我都可以話俾你聽，嫁俾你亦係我由始至終嘅心願。」Miss Cheung講完伸出右手，中指上仍然戴住我之前送俾佢嘅訂婚戒指。
 


我企番起身，戰戰兢兢將戒指戴上Miss Cheung纖幼嘅無名指。
 
「拍拍」掌聲響起，第一個拍手嘅竟然後Miss Cheung懷裡面嘅惜頤！隨著惜頤小手傳出嘅微弱擊掌聲，轟天歡呼同掌聲從四周圍觀嘅人緊接傳嚟，我將Miss Cheung同惜頤擁入懷中，接受所有人嘅善意祝福。
 
「咁開心，一定要幫你哋影番張大合張。」石克隆從人群走出，舉起相機要幫我哋影相。
 
「咪住，要影就所有人一齊影，呢個時刻唔係淨係屬於我哋。」Miss Cheung向我提議。
 
我點點頭：「阿Wing、Chloe、Joyce，你哋都過埋嚟，仲有阿爸、阿媽、阿妹同小琪，你哋都過埋嚟，我哋一家人影番張大合照。」
 
我身為今日主角，大合照梗係企中間，左邊依次係抱住惜頤嘅Miss Cheung、抱住思穎同念穎嘅周穎、抱住愛寶嘅Chloe同抱住慕琳嘅邱雅琳，右邊就係阿爸、阿媽、阿妹同小琪。
 
石克隆喺對面幫我哋揸機影相，身後分別企咗瑜姐姐、June、Amy同稍遠嘅Magnolia。
 
我哋彷佛身處兩個唔同嘅世界，係呢邊望過對面，見到嘅係幾個有緣無份嘅人，喺嗰邊望番過嚟，就係一班歷經艱辛，最後仲能夠齊齊整整嘅一家人，或者歷經艱辛係講緊其他人，我只係製造艱辛俾佢哋嗰個。


 
閃光燈下拍低嘅呢幅畫面，永遠係最美好嘅一刻，將來我哋中間可能有人會離開，有人會加入，但係喺現在呢個時間點，一切都係如此美好。
 
將來嘅事冇人可以預料，珍惜現在，先係我哋唯一可以做、同埋最應該做嘅事。