自從同Miss喺一齊，我就忽然變得好受歡迎: 後記

張子龍嘅故事，喺呢個位終於暫時完結，雖然有些情節未及詳細交代，有些支線本來係想寫多啲，甚至最後出場嘅Magnolia，無可避免俾人一種趕收工嘅感覺。

講起Magnolia，起初嘅背景應該係更接近個人經歷裡面嘅一段感情，所以原本諗住會有更多篇幅，不過因為種種原因，改為而家嘅設定。

好多謝一直追看至今嘅咁多位，或者個故嘅情節有時唔係寫得咁好，甚至有所謂暴走嘅情況發生，而且主角更加絕對唔算係一個好男人，但係仍然得到多方支持，衷心感激。

周穎同石克隆嘅前事，Amy同石克隆之間發生過嘅嘢，張子龍與Miss Lee、June、Magnolia幾位女配角嘅支線，有機會都會用番外篇形式補寫。

至於張子龍同幾位女主角嘅故事會唔會延續落去，暫時都係一半半機會，因為寫落去難免會發生一啲令到Miss等人唔開心嘅事，倒不如喺呢個位停落嚟。



最後講少少張子龍對各人嘅感情，Miss Cheung係永遠嘅第一位，雖然中途同過好多人發生關係，但係如果只可以揀一個，一定係揀Miss Cheung。

周穎係第二，其實相比Miss Cheung，周穎同主角更為合襯，而Miss Cheung對主角嘅完全包容，某程度上亦冇周穎咁接近現實。

邱雅琳從認識主角到一齊，分開又再重逢，本身想寫一個正常啲嘅愛情故事，唔係Miss Cheung或者周穎咁先性後愛。

最後Chloe呢？原先安排咗好多伏線俾佢，以一個超級富二代嘅身份，喺好多事上面其實Chloe都參咗一腳，主角嘅一舉一動亦從來冇逃出過佢嘅監控，但係佢最後係唔會留喺主角身邊，至少唔係以女朋友身份留低。

咁多個女角又係抱住咩心情同主角一齊？喺主角視線範圍外又有啲咩發生過喺佢哋身上？呢個又係番外篇（如有）先會提到嘅事。



最後再講多次「多謝！」多謝你哋咁有心睇埋呢篇後記，一直以嚟我好少回覆留言，因為我認為咁樣會影響咗原本想寫嘅情節，但係我有仔細睇每一則留言，無論係正面定反面，都令我獲益良多。

畢竟「自從同Miss喺一齊」係我第一個認真寫、亦係最長嘅故，或者有人會話「甜故啫，有幾難寫呀？」但係對我嚟講，確實係唔容易嘅創舉。

期待不久將來可以喺呢度再見！