自從同Miss喺一齊，我就忽然變得好受歡迎: 第281章 大結局(中)

Amy行開後，喺身後出現嘅係Magnolia：「我聽朝就上機，專登過嚟同你道別。」

「咁快？你今次返香港未必會再過嚟，唔四圍玩下先走。」我心底裡係想Magnolia留喺加拿大多一陣，雖然我俾唔到啲咩佢。

「我一個人有咩地方好去，除非你肯陪我喇。」Magnolia用挑戰眼神望向我。

我好想應承，但係身處四周嘅Miss Cheung等人令我feel到好強大嘅無形壓力，壓到我一句說話都講唔出。

「同你講笑咋，唔使咁認真喎。」Magnolia替我解圍：「係呢，你有冇10鈫喺身？」



「有，做咩呀？」我唔明Magnolia突然咁問咩意思。

「唔好問，你俾我先。」Magnolia催促。

我攞咗10鈫加紙俾Magnolia，佢接過後珍而重之咁放入袋，然後微笑話：「多謝，希望你滿意我呢段時間嘅兼職女友服務，將來有機會，隨時可以再搵我。」Magnolia講完冇俾機會發言就轉身離開。
 
望住Magnolia遠去嘅背影，有啲惆悵、又有啲無奈，我明白Magnolia選擇以呢種方式結束我哋關係嘅心意，但係唔太想接受咁樣嘅結局。
 
每一樣事情都會有始有終，每一段關係都冇保證可以開花結果，Magnolia、Amy、June，三個曾經出現喺我生命，爭少少就走埋一齊嘅女仔，喺今日各有選擇，為不確定嘅未來，行出咗心中認為最適合嘅一步。
 


「戇居居企喺度做乜？嗰邊齊晒人等緊你影大合照。」石克隆從後大力搭落我膊頭。
 
「克仔，點解你會放Amy走嘅？」我抓緊機會問石克隆。
 
「Amy冇話你知咩？我覺得呢個決定對我同佢都係最好。」石克隆用慣性瀟洒笑容回應。
 
我望望遠處嘅Amy，望望石克隆，一時唔知講咩好，石克隆望望我，望望遠處嘅周穎，亦都冇再多講任何說話。
 
返番Miss Cheung幾個身邊，首先遇到嘅係邱雅琳，慕琳同佢媽咪一樣咁乖，見到我即刻要我抱，我抱起慕琳，錫咗佢臉珠仔一啖，然後對邱雅琳講：「你嚟咗加拿大後唔係成日陪到你哋，辛苦咗你哋兩母女。」
 


邱雅琳搖搖頭：「梗係唔係喇，你對我哋已經好好，你咁忙，又有咁多負擔，仲要抽時間陪我哋，辛苦嗰個係你至啱。」
 
對邱雅琳主要係愧疚，專登放低晒所有嘢過嚟搵我，又俾唔到啲咩佢，而家仲要佢寄人籬下，幸好Chloe對佢好好，不過將來嘅事冇人知，而且連Chloe都有可能離開我：「你真係決定繼續留喺加拿大？如果你想可以返香港先，如無意外我出年就會返去。」
 
「咁我等埋你吖，我唔想喺冇你嘅地方生活。」邱雅琳對我從一而終，由我正式同佢一齊以後就冇變過。
 
「你對我咁好，我唔會辜負你，無論去到邊，只要你願意跟住我，我都願意照顧你。」無論如何，對自己好嘅人，就應該好好珍惜。
 
邱雅琳一臉感動咁望住我，我將佢攬實身俾咗個溫暖嘅擁抱佢，然後先將慕琳交番俾佢，迎上行緊過嚟嘅Chloe。
 
愛寶同佢媽咪一樣咁古靈精怪，一見到我就扁咀想喊：「你睇下你係咪樣衰吖，嚇到個囡想喊。」
 
「佢扮喊之嘛，次次都係咁，我樣衰你又痴埋嚟。」明知Chloe係講笑，我笑番佢轉頭。
 
「咁食得魚翅多都要食下粉絲，唔係點覺得魚翅矜貴。」Chloe就係鍾意同我鬥咀，而我亦係鍾意佢呢點。


 
「你幾時食番魚翅記得通知我，等我自動消失。」愛寶仲扁緊咀，我忍唔住篤咗佢塊臉一下。
 
「希望呢個時刻永遠唔會來臨，因為我漸漸覺得粉絲原來好食過魚翅好多，又環保。」Chloe忽然眼神一黯，我明白佢意思，亦都有啲傷感。
 
手指上嘅痛楚將我帶回現實，愛寶用佢啱啱出緊嘅門牙喺度咬我隻手指，諗起Chloe同愛寶都唔能夠永遠留喺我身邊，第時想俾隻手指佢咬都未必有機會：「將來嘅事將來先算，我哋好好珍惜喺埋一齊嘅時間，免得有日後悔。」
 
「你係至好講，成日掛住出去滾。」Chloe回復正常，話番我轉頭。
 
「喂，都話冇滾咯，煲粥咩，成日滾嚟滾去。」我梗係心虛喇，啱啱先同Magnolia藕斷絲連完。
 
「講緊咩咁開心呀？」周穎忽然喺Chloe身後出現。
 
「Wesley話一陣返去煲粥俾我哋食喎。」Chloe即刻改口，然後轉向我：「你睇下Wing姐姐一個抱兩個幾辛苦，仲唔快啲幫手。」 
 


我上前抱起思穎...唔係，可能係念穎，老實講我即使身為老豆，其實唔係好分到兩個囡嘅分別，今日佢哋仲著埋同一套衫。 
 
「煲粥好喎，啲BB又可以食。」周穎冇為意我哋頭先嘅話題，就算聽到我亦都唔覺得佢會深究。 
 
Chloe抱住愛寶借開少少，俾周穎上前，我抱住雙胞胎其中一個：「只要你哋想食，我以後日日煲俾你哋食都冇問題。」
 
「唔一定煲粥，只要係你煮，咩我都鍾意食。」周穎情深款款同我講。
 
我從來唔會懷疑周穎嘅說話：「應該話你想食咩，就算我唔識煮，都會努力去學。」
 
「嘩！你哋咁肉麻，我去搵Joyce吹住水先，一陣影相叫我。」Chloe怕咗我哋咁，抱住眼超超嘅愛寶行開。
 
「你今日唔係有好重要嘅嘢要做㗎咩？」周穎微笑問我。
 
我今日打算向Miss Cheung求婚，求咗咁多次，今次佢應該唔會再拒絕我啩：「對唔住，俾唔到咩名份你哋。」如果我同Miss Cheung結婚，周穎佢哋就永遠只係冇名份嘅第三者。