自從同Miss喺一齊，我就忽然變得好受歡迎: 第280章 大結局(上)
入到房，首先聽到阿爸中氣十足把聲，完全唔似啱啱從昏迷中醒轉嘅人：「你就搞錯，我明明聽到阿龍同我講話叫啲孫嚟叫醒我，仲話幫我搵咗幾個心抱。」
阿媽見到我如釋重負：「阿龍你嚟得啱喇，你阿爸一醒就語無倫次，係都話要我帶啲心抱同孫嚟俾佢睇，我真係搞佢唔掂，又搵你唔到，多得阿鳯話搵阿Wing幫手，先叫到你嚟，心抱我都…唉，但係孫就…」
「得喇，阿媽，你交俾我。」我望一望喺側邊忍緊笑嘅阿妹，再望向床上叉住手發緊脾氣嘅阿爸：「阿爸，你啱啱醒番，唔好咁勞氣。」
「咁你話俾我聽，我啲心抱同孫去晒邊？」阿爸充滿威嚴咁問，昏迷咗幾年一定措埋好多精力。
我喺心裡面嘆咗口氣：「阿爸你等陣，我去叫佢哋入嚟。」
阿爸即刻向阿媽擺出勝利者姿態：「你以為我呢幾年咩都唔知？我知得多過你呀！」
我向一臉狐疑嘅阿媽表示歉意，然後開門問出面三個女仔：「你哋有冇帶阿B過嚟？」
「有呀！喺出面保姆湊緊。」Chloe舉手搶答，然後轉向周穎同邱雅琳：「我都話要帶埋BB嚟。」
「最叻就你喇，你哋出去帶BB過嚟，阿爸話想見下佢哋。」其實我唔係阿爸親生，最多算係養仔，不過呢個係永遠不能說嘅秘密，我唔想阿爸啱啱醒番又激番暈。
阿爸見到三個靚女抱住四個BB當然開心到震，阿媽雖然嚇咗一驚，亦表現興奮，阿爸仲唔知點解可以咁醒：「咦？應該仲有一個，我記得仲有一把又成熟又溫柔嘅女仔聲同我講嘢。」
「嗰把聲係馨頤嘅，佢都幫你生咗個孫女，不過而家喺香港，等我畢業典禮嗰陣先會過嚟。」為免阿爸怪我搞Miss，我用番Miss Cheung中文名解釋。
「咁我都要去你畢業典禮，係喎，你個樣大個咗咁多嘅，你唔係話俾我聽你已經大學畢業啩？我有昏迷咗咁耐咩？」阿爸真係好嘢，一起身就掛住啲女，而家先發現最重要嘅問題。
我哋喺差啲俾人趕出醫院嘅熱鬧氣氛中，迎接阿爸醒番嘅好消息，瞓一瞓個仔就畢咗業，仲搵到幾個心抱、生埋一大班孫女，對所有人嚟講，都係一個完滿嘅結局，唯一遺憾，或者就係我喺最後時刻，傷害咗一個女仔嘅心。
直至畢業典禮，我先再見到Magnolia，但係我身邊除咗周穎幾個，連Miss Cheung都喺埋度，所以我同Magnolia只可以扮普通同學，點點頭打下招呼。
我突然覺得自己有少少受歡迎，因為除咗屋企人，石克隆、Amy、June、瑜姐姐都有出席，瑜姐姐係小琪通知佢嚟嘅，對於呢位由細睇到我大，掹住裙尾到上埋床嘅大姐姐，我有一種特殊嘅情意結，同佢一齊唔會令我有任何罪惡感，反而有種乜都可以同佢講嘅長輩感覺。
「你真係大個仔喇，仲爬埋我頭，生咗一堆囡，令我覺得自己好老。」瑜姐姐向我抱怨。
「瑜姐姐你一啲都唔老，仲好後生好靚，你幾時再飛？」著住空姐服趕過嚟嘅瑜姐姐，擺明就係制服誘惑。
「做咩呀，你仲得閒應酬我咩？」瑜姐姐笑到好曖昧：「兩個星期喥喇，今次留得有啲耐。」
唔得閒極都抽到一、兩晚見下啩：「梗係得閒喇，我會喺加拿大留多一年，你過親嚟記住搵我添呀。」
「一言為定。」瑜姐姐望向我身後，微笑話：「唔阻你太耐喇，好似仲有好多人想搵你。」
我望向身後，發現June望緊過嚟，見瑜姐姐行開先快步走近：「呢個就係你之前提過做空姐嗰個姐姐呀？都好靚女啫。」
「你都唔差呀，你今日真係有心，專登請假過嚟。」June畢業後一直喺Waterloo繼續進修，直至最近先喺Toronto附近搵咗份正職。
「我哋咁friend，點可以唔嚟賀下你，而且我畢業嗰陣你都有嚟，禮尚往來啫。」去June畢業禮係上年7月嘅事，當時仲遇到Miss Lee，發生咗啲唔知算好定唔好嘅事。
今日咁開心，都係唔好提嗰單嘢：「總之多謝你先，今日你男朋友冇陪你嚟嘅？」
「你講邊個男朋友先？」June大笑，跟住嘆咗口氣：「唉，始終覺得佢哋唔係好比得上我心裡面嗰個人。」
我唔敢問June所指係邊個：「得唔到嘅永遠係最好，個原因就係因為得唔到。」
June拍拍我膊頭：「我嚟緊一年會喺Toronto，你會招呼我㗎呵？」
「會，你上次幫我單嘢，我都未好好答謝你。」呢個係事實，亦係我欠June嘅。
「答謝？咁我期待你點答謝我。」June笑笑，一副氹咗我落搭嘅樣。
「最難消受美人恩」，一句套喺任何時代嘅男女關係中都適合嘅說話。
June之後跟住係Amy，佢一開口就令我好意外：「我同Terrance分咗手喇。」
「吓？點解呀？你哋唔係好地地㗎咩，係你定Terrance…」提出分手呢？我不禁問。
「係和平分手，大學四年，我哋嘗試過，亦都諗得好清楚，起碼喺離開校園之前，應該做個了結。」Amy聽落唔傷感，唔知石克隆又點呢？
「四年時間唔短，你唔覺得可惜咩？」雖然對於愛情，我冇資格俾太多意見。
「而家分手，就係浪費咗四年，繼續落去，可能就浪費一生。」女仔係感性啲，Miss Cheung佢哋又係咪準備喺我身上浪費一生？
「你有咩唔開心隨時搵我，無論將來點，你哋永遠都係我好朋友。」冇乜可以再講，我只可以咁講。
「咁講句多謝先，好朋友，本來我哋唔止係好…」Amy好似仲講咗啲咩，但係我聽唔清：「又有女仔搵你，咁我唔阻你。」