自從同Miss喺一齊，我就忽然變得好受歡迎: 第267章  生B大會

「嗰張床係留俾Miss Cheung嘅。」周穎指住入房後第一張比其他三張略大嘅床，然後順次序介紹：「跟住係我、Chloe、Joyce，你有冇其他意見？」
 
安排得咁好，仲專登突顯埋Miss Cheung嘅大婆身份，我仲可以有咩意見：「呢間房佈置得咁完美，連瞓邊張床都set好埋，我點會有意見，不過你哋瞓埋同一間房，唔驚嘈到大家咩？」我腦中泛起一個B喊，其他三個即刻跟住喊嘅可怕情景。
 
「咁咪好囉，熱鬧啲，夜晚仲可以一齊起身餵奶。」Chloe一臉興奮咁話。
 
你未試過就梗係講得輕鬆，喺香港一個阿囡都搞到我冇覺好瞓，你嗰頭揞咗一個瞓，轉頭俾第二個嘈醒，成晚循環再循環嗰時你唔慌唔熱鬧。不過你哋係主力，我只不過係輔助，又唔適合俾太多意見。
 
「你放心喇，Chloe特別安排咗間隔音好好嘅房喺隔離俾你，如果你想喺度陪我哋嗰陣，就可以喺嗰邊瞓，我哋仲可以分別去搵你。」邱雅琳講到呢度突然臉紅紅冇講落去，我當然明白咩事喇。
 


既然隔音好，即係兩邊都唔會嘈到大家，咁喺我房發生嘅事，自然都唔怕「嘈」到呢邊：「安排得咁周到，真係要讚下你。」我轉向Chloe，由衷感激佢嘅細心。
 
Chloe滿臉得色咁回望我，周穎見到覺得好得意咁，掩咀偷笑，邱雅琳則繼續為頭先講多咗嘅說話而紅晒臉。
 
場面好溫馨，如果唔係個個大住個肚，真係想嚟多次4P！
 
幾個女仔嘅情況暫時算係穩定落嚟，我係時候擺番啲精神去學業同返工，我冇日日都喺Chloe為我安排嘅後宮留宿，因為咁係唔多集中到精神嘅，而且唔扑得啫，手口並用都好多嘢玩，仲要3個女仔喺晒度，唔好話讀書，唔虛耗過度都執番身彩。
 
喺強叔多番誠意邀請後，我迫不得已去見過「我個仔」，毫無疑問，一望就令我諗起Patrick，強叔仲係咁叫個𡃁仔叫我做契爺，小朋友我已經有一個，嚟緊仲有四個，好彩強叔只係叫佢叫我做契爺啫。
 


隨著日子過去，我順利完成咗大二，喺大三開學之前，三個女仔卒之各自送咗份大禮俾我，仲要係同時一齊生，照計時間上係應該有先後之分嘅，結果唔知係咪三個住埋一齊太close，幾個BB夾埋一齊同時出世。
 
我記得嗰日係啱啱放暑假冇耐，剛啱諗住返工前去探下三位後宮佳麗，點知一去到就見到三個女仔話肚痛，起初Chloe仲話係頭先早餐食錯嘢，但係邱雅琳畢竟係專業護士，痛住視察咗周穎同Chloe情況後，果斷咁話：「我諗我哋三個係作動！」
 
對於生B程序，Chloe一早安排好晒，㩒下房裡面個通話器，一大班護士即刻喺五分鐘之內上到嚟，眨下眼就將三個大肚婆送咗去最近嘅高級醫院，有錢係好辦事啲，唔使好似Miss Cheung嗰次咁自己call車。
 
五星級生仔體驗喺去到醫院後延續，三個外籍產科醫生連埋佢哋嘅專業團隊已經喺待產房候命，即時同三個女仔做檢查，並一致認為廿四小時內就生得，因為周穎陀B未夠十個月，又係雙胞胎，服侍佢嘅醫生係睇落最有料嗰個，Chloe對我好係一件事，難得對周穎都咁好，可惜聽佢阿爸上次嘅語氣，最後Chloe會離我而去。
 
醫生護士並冇離開病房，一直喺度耐心照顧同等候，呢點令我有啲唏噓，錢原來真係好重要，我首次感受到金錢嗰種驚人威力。
 


望住心愛嘅人受苦但係乜都做唔到嘅傷感情緒再次浮現，生B對於女人嚟講係一件好痛苦嘅事，對於我就只不過係一次愉快嘅中出，中出咗咁多次先瀨嘢其實我已經算好幸運，有啲人第一次就唔小心中咗咪仲慘。
 
唔得，我唔可以好似上次Miss Cheung咁用靈魂出竅嚟逃避現實，我先行埋去周穎身邊，幫佢抺下額上面嘅汗水：「對唔住，令到你咁辛苦。」
 
周穎大口呼氣，痛到答唔到話，淨係不停擰頭，睇到我都幾心痛，好耐冇試過咁近距離認真望住周穎，其實佢仲好細個，即使話佢只係讀緊中學，都唔會有人懷疑。
 
我安撫咗周穎一陣，就去睇Chloe，佢成個未成年少女咁，喺度發緊小姐脾氣，見到我仲即刻話：「點解我要咁辛苦幫你生仔？」
 
「我都想問下你，乜你唔係專登要生㗎咩？」我苦笑，你自己想生，教埋邱雅琳，誘導埋周穎，仲好意思問「點解」。
 
「你竟然夠膽駁咀！張子龍你好嘢，我諗住你哋男人注重傳宗接代，先將第一次俾咗你。」Chloe有啲語無倫次，我估佢嘅第一次係講生B啩。
 
大肚婆係不可理喻嘅，而且仲係生緊B嗰隻：「好喇，係我唔啱，我去反省下先，一陣再返嚟睇你。」我放低大吵大鬧嘅Chloe，去搵邱雅琳。
 
邱雅琳見我行埋去，都未到已經對我強顏歡笑：「我冇事，你睇下阿Wing同Chloe。」


 
「我啱啱睇完佢哋，而家嚟睇你，你哋三個對我嚟講都咁重要。」我錫落邱雅琳略乾嘅咀。
 
邱雅琳默默回望我，喺痛苦表情中透出一絲安慰：「我知道你對我好就夠，其他都唔重要。」
 
「唔係，你嘅心情都好重要。」我搖搖頭：「你甘願為咗我受生BB嘅折磨，我唔可能對你置若罔聞。」
 
邱雅琳居然眼濕濕，其實我對佢真係唔算好，邱雅琳為咗我放棄一切走嚟加拿大，為免影響我一直唔敢搵我，到撞番後仍然時時顧念我感受，甚至希望幫我生B。
 
我陪咗邱雅琳比較耐先換人，三個一齊生令我失晒預算，即使有過Miss Cheung嘅經驗，都有啲應接不暇，而且Chloe又嘈喧巴閉。
 
做老豆係唔容易㗎喇，仲要一砲三響。