自從同Miss喺一齊，我就忽然變得好受歡迎: 第266章  後宮

我輕手輕腳放開Miss Cheung，出房𥄫下好夢正甜嘅阿囡，七姐見我咁快出番嚟，好似有啲訝異。

我伸手篤咗阿囡塊面一下，軟腍腍滑不留手，跟住擺隻手指落佢隻手仔度，阿囡即刻有嘢揸手咁捉住，然後突然掹大眼望向我。

可能我個樣比起Miss Cheung太大落差，阿囡扁一扁咀就想喊，嚇到我面都青埋，Miss Cheung啱啱先瞓著，聽到阿囡喊實彈醒。

或者我個驚樣太滑稽，阿囡竟然轉喊為笑「𠹳𠹳」咁笑咗兩聲，咁細個就識玩男仔，第時大個女一定不得了。

見阿囡咁可愛，又雙手前伸想人抱咁，我忍唔住伸手抱起咗佢，阿囡成身捲埋匿喺我懷中，好安心咁再次瞇埋眼瞓番。



兩年多前嘅一次陰差陽錯，將我同Miss Cheung連結在一起，十個月前嘅一次翻雲覆雨，孕育出懷裡面嘅小生命，將來再會遇到咩我唔知道，我只知道呢兩個女仔，絕對會成為我生命中最重要嘅兩個人。


因為唔捨得放低阿囡，結果我抱咗佢入房，瞓喺我同Miss Cheung之間，可能太舒服太有安全感，阿囡竟然一夜瞓天光，第二朝起咗身仲冇喊，只係伸手搞醒我同靚媽咪。
 
好彩得阿囡叫醒，唔係我就趕唔切整早餐俾Miss Cheung食埋先走，Miss Cheung見阿囡咁乖，就喺我預備早餐期間餵咗佢食奶先。
 
阿囡好似知道我就嚟走，飲完奶冇瞓番，一直陪我哋食完早餐，到我出門口時，仲眼碌碌望住我同Miss Cheung嘅告別畫面。
 
有啲嘢無論經歷幾多次，都冇可能習慣，我依依不捨吻別Miss Cheung同阿囡，再見佢哋已經要一年後，到時阿囡都唔知仲認唔認得我，返過去後要多啲同兩母女facetime，keep住更新佢哋情況至得。


 
冇太多離別說話，我向七姐拜託多幾句，就出發去機場，回程嘅時候永遠比較傷感，但係喺加拿大迎接我嘅係另一次重聚，唔係，係三次重聚。
 
今次返加拿大搵咗石克隆接機，本來我係諗住自己坐車返屋企，但係石克隆堅持要接我，話想第一時間聽下我啲求婚、生B同湊B經歷。
 
我將所有事一次過話晒俾石克隆知，佢聽完後點點頭：「Miss Cheung都講得啱，等你畢業後先再諗幾時娶，娶邊個好啲，又唔使太早限定咗前路，出面啲公司有部分唔鍾意員工太早結婚，覺得佢哋冇planning，又或者認為佢哋會俾家庭綁住。」
 
我又冇諗到咁長遠：「我決定娶Miss Cheung㗎喇，婚都訂埋，雖然對其他人唔公平，但係我更加接受唔到唔娶佢。」
 
「有時啲嘢唔一定盡如你意，凡事唔好講到咁盡好啲，唔係到時盞自己痛苦。」石克隆莫測高深咁話。


 
我本來仲想反駁，但係諗深一層，我又的確冇必要限死自己，或者到時係Miss Cheung唔肯嫁俾我呢，不過只係咁諗諗都覺得個心揦住揦住：「你呢？我以為你已經決定咗娶Amy？」
 
「Amy肯嫁我先算喇。」石克隆突然眼神黯然咁話：「其實最後同自己一齊嘅，係咪都會唔係最愛嗰個呢？」
 
好少見瀟洒嘅石克隆咁感性，我一時唔知佢講緊自己定潤緊我，石克隆暗示Amy唔係真心鍾意佢？定佢唔係最鍾意Amy呢？
 
我忽然諗，我同Miss Cheung一齊後仲可以同其他咁多女仔發生關係，其實我係咪真係好似自己以為咁鍾意Miss Cheung？否則我又點可能不停做一啲明顯傷害緊佢嘅事，相比起嚟，縱容及包容我嘅Miss Cheung同周穎佢哋先可以講話最愛我。
 
或者有一日，當我搵到一個願意放棄晒一切，只對佢一個好嘅人，我先有資格講「最愛」呢兩個字，而呢個人係咪會係Miss Cheung呢？
 
我同石克隆各有各心思，一時靜咗落嚟冇講嘢，直到返番市區，去緊Chloe屋企石克隆先再開口。
 
「望見你班女個肚越嚟越大，有時都幾羡慕你夠膽咁早生，到我結婚嗰陣，你啲小朋友分分鐘已經可以出嚟養家。」石克隆將話題轉向我啲仔女。
 


腦裡面浮現阿囡個Q樣，有啲難想像佢大過咗會變成點，當我仲食緊人哋啲囡時，冷不防要擔心番自己個囡會唔會俾啲好似我咁嘅渣男搭上，都係生仔好，感覺上少樣嘢擔心。
 
「先辛苦同後辛苦嘅分別啫，我夠羡慕你冇家庭負擔，隨時回復單身又得，搵過第二個又得。」我真心羡慕石克隆，起初大家逢場作興冇乜所謂，關係加深後就唔可以再到處沾花惹草。
 
「你咁講唔係仲諗住加建後宮呀？你想學以前啲皇帝咁後宮佳麗三千咩。」石克隆有少少認真咁話我。
 
我冇咁嘅能力，不過試多幾種唔同女仔就幾有興趣，但係呢啲都係以前嘅事，當架車駛入Chloe屋企，遠遠望見企喺落地玻璃同我揮緊手嘅三個大肚婆，我就只好返回現實。
 
周穎本來得三個零月身紀，個肚應該係最細嗰個，但係而家睇落偏偏係最大，冇錯，產檢嗰陣已經知道咗係雙胞胎囡囡。
 
除咗Miss Cheung因為喺香港，我又驚多問會俾Miss Cheung懷疑我介意生男定生女外，我已經知道Chloe陀仔；邱雅琳就陀女，即係我將會係1個仔4個女嘅爸爸。
 
為免尷尬，周穎同Chloe都休學一年，換言之如無意外我會係家庭中最早畢業嗰個，養妻活兒嘅責任自然落喺我身上。
 
雖然只係分開咗半個月，Chloe都搞咗個小型party歡迎我，所譯party，其實亦只不過係大食會，咁大肚婆食量大嘛，玩太癲又危險。


 
食完送三個女仔上房時，Chloe指示我去咗走廊另一邊嘅房間，而唔係佢平時間房，原來喺呢段離開嘅日子，Chloe喺屋企另外裝修咗一間特大房間同周穎、邱雅琳一齊住，房裡面有四張大床，每張床邊都有一張BB床，BB房應有嘅設備呢度都應有盡有，有錢真係好，做咩都又快又妥當。
 
望住身邊嘅三條女同呢間大房，我腦裡面不其然泛起兩個字：「後宮」。