自從同Miss喺一齊，我就忽然變得好受歡迎: 第268章 外父相

結果第一個生得嘅係Chloe，一路生就一路咬住我隻手，不過佢算幸運，好快就生到，只係生出嚟發現竟然唔係仔，而係女嚟。

我有啲意外，又有啲心驚，唔通呢啲就係報應，我搞咁多女，而家就生番咁多女俾人…唔係，一定要從小好好教導佢哋小心阿爸我咁嘅渣男。

Chloe本身以為生仔，點知係女即刻發醫生晦氣，我喺側邊見到忍唔住幫下口：「生女咪重好，仔好難教㗎，你睇下阿囡同你成個餅印咁，我見到就開心，第時一定引死仔。」

見我大讚特讚，Chloe先順番條氣：「我咁辛苦幫你生，你要對我哋好啲呀。」

「一定喇，我唔對你哋好對邊個好，你哋兩個都咁可愛我簡直係三生有幸。」生完B嘅Chloe終於正常番少少。



Chloe後係周穎，周穎生嘅時候當然冇嘈嘈閉，不過佢要連生兩個，比起其他人就算唔係辛苦兩倍，都1.5倍，時間亦較長。

雖然已經係第三次，見到周穎滿臉汗水嗌到聲嘶力竭個樣仍然心痛，我捉實周穎隻手，俾佢借力同給予無限量支持，好唔容易周穎先嗶晒兩個B出嚟。

兩個B個樣好似，似到我唔係好分得到，不愧為雙胞胎，周穎左右手各抱住一個，一臉滿足，唔怪得女人要有一對波喇，原來係用嚟同時餵兩個B嘅。

由於早產關係，阿囡身型的骰，唔係好足磅，醫生話要留喺加護病房觀察下，周穎聽到阿囡好似有事咁，雙眼即刻紅晒。

「冇事嘅，你睇BB個樣幾淡定，你做媽咪更加要堅強啲，唔係點湊大兩個囡囡。」我安慰周穎，陪佢返Chloe所在嘅另一間產後病房。



周穎聽我咁講點頭同意，露出好耐冇喺佢臉上出現嘅倔強。

Chloe見到周穎好興奮，無視我立即同周穎討論頭先嘅生仔經歷，我乘機暫時退場，因為仲有一個女人等緊我。

唔知係咪想等埋我，邱雅琳見到我後頓時鬆咗口氣，而醫生亦都同時表示生得，夾得咁準真係辛苦晒邱雅琳兩母女。

考慮到我已經連踩兩場，而邱雅琳亦等咗咁耐，BB係咁多個之中生得最快嘅，接近嗰頭入產房轉頭就生咗嘅地步，見到最後呢個阿囡都似阿媽多過似我，我終於放下心頭大石，女仔嚟嘛，似我就大鑊喇。

「好似你，第時一定同你一樣，係一個溫柔賢淑嘅人。」我同抱住阿囡笑到四萬咁口嘅邱雅琳講。



「我覺得性格似你好啲，因為你比我更溫柔。」邱雅琳感覺生得冇周穎佢哋咁辛苦，可能夠快啩，俾人讚溫柔都係史上第一次，亦相信只有邱雅琳咁大方先讚得出口。

三個女人一個墟，由生得到生完唔使一日就完成晒，仲要係三個女人四個B，我覺得有資格放入健力士世界紀錄，四個囡同一日生日，第時慶祝起上嚟咪好方便。

望住幾個女人做賽後檢討，生B唔係好辛苦㗎咩？乜得佢哋咁興奮！我忽然有種難言嘅疲憊感，喺冇人察覺…或者正確啲嚟講係冇人理嘅情況下，默默退出病房。

我落樓下飯堂食咗個飯，然後去BB房睇下自己啲囡，周穎對雙胞胎身處嘅加護病房其實只係喺BB房隔離，所以我可以一次過探晒。

幾個BB版靚女都瞓緊覺，反而用盡力生佢哋出嚟嘅媽咪就好精神咁喺上面病房吹緊水，我不其然諗起喺香港嘅小Miss Cheung，唔知佢而家點，仲記唔記得我呢？

阿爸都係錫女嘅，異性相吸吖嘛，而且BB好少唔得意，仲要係自己個囡，又遺傳晒阿媽啲優良基因，我望住喺鏡裡面一副外父相嘅自己，唔怪之得啲人話阿爸唔捨得嫁女喇，呢個世界邊可能有人襯得上我班囡。

「我都話佢喺度㗎喇，佢咁咸濕，梗係落咗嚟𥄫女。」Chloe把聲喺側邊傳嚟，我一擰轉頭就見到三個坐喺輪椅，由護士推緊嘅靚女。

「我哋頭先突然唔見咗你，打你電話又冇人聽，Chloe就話你一定落咗嚟。」邱雅琳喺旁邊解釋。



係喎，頭先入產房熄咗電話都未開番：「我見你哋傾得咁興奮，又插唔到咀，咪落嚟先。」

「推我埋去睇下阿囡先。」Chloe冇追究我失蹤嘅事，揚手要睇囡囡：「嘩！同我細個一樣咁得意。」

「BB好可愛呀，你睇下佢瞓著咗都喺度偷笑。」邱雅琳見到自己個B都好興奮。

喺一旁嘅周穎臉露憂色，我當然明白佢心思，示意護士俾我接手：「我推你去探BB。」

喺嬰兒箱裡面嘅雙胞胎基本健康，只係因為磅數唔夠要觀察下，過幾日就可以離開嬰兒箱，周穎望到BB貼晒喉就即刻雙眼泛紅。

我從後攬實周穎，柔聲安慰佢：「BB想同其他姊妹一齊慶祝生日，先搶閘出世，其實完全冇任何問題，你唔需要擔心。」

周穎勉強點頭，女仔本身就母愛泛濫，何況真係成為咗阿媽：「我想快啲帶BB返屋企。」



Chloe同邱雅琳呢個時候都過埋嚟支持周穎，熱鬧氣氛將擔心情緒一掃而空。

周穎嘅擔心係多餘嘅，兩個星期後三個女仔就帶住四個B返番去Chloe屋企，我喺開學前除咗返工都陪喺隔離房，不過係真陪，因為周穎佢哋除咗康復中仲要照顧BB，特別係周穎，每次見佢左右手各抱一B餵奶，我都覺得佢好勁咁。

每個女仔各有專屬工人同陪月，只不過因為各人都想親力親為，所以旁人唔係好幫到手，連我都因為被嫌粗手粗腳而鮮少有得抱阿囡。

我唯一有絕對決定權嘅，就係幫囡囡改名，周穎雙胞胎叫思穎、念穎，Chloe個囡叫愛寶，邱雅琳囡囡叫慕琳。

對於我嘔心瀝血諗出嚟，自問有創意又有意思嘅名，三個女仔只係勉強收貨，乜好俗氣咩？我仲以為佢哋會鍾意添。

正式開始大學第三年，我忽然覺得所有嘢都唔同晒，除咗升任咗做阿爸外，喺學校亦回復番獨來獨往嘅宅男身份，兩、三個月後，啲人漸漸忘記咗我係周穎同Chloe條仔，只當我係一個普通學生。

對於淡出群眾嘅妒忌眼光，我並冇太多不滿，不過個天似乎唔希望我就咁黯淡落去，喺一日寫program寫到天昏地暗嘅時候，我遇見咗喺大學生涯裡面，最後一個對我有極深影響嘅女仔。