自從同Miss喺一齊，我就忽然變得好受歡迎: 第263章 第一次求婚
喺飛機上時間過得好快，我反覆思量點樣向Miss Cheung求婚先最有誠意，諗諗下機上廣播就話已經進入香港範圍，叫啲乘客坐定定、戴番好安全帶。
落機後我用最快時間趕到去Miss Cheung屋企，呢段等返香港時期中最難捱嘅就係擔心Miss Cheung突然生咗，咁我就陪唔到佢入產房，因為預產期早咗一、兩星期聽講係好平常嘅事。
㩒咗兩下鐘，Miss Cheung就打開門，望住腹大便便嘅Miss Cheung，一種前所未有嘅感動悠然而生，比起加拿大三女個肚，Miss Cheung起碼大成幾倍，就嚟生得係唔同啲嘅。
「子龍，終於見到你喇，呢幾日BB有啲作動，我幾驚等唔切你返嚟。」Miss Cheung個樣同我一樣咁開心。
我慌慌張張扶Miss Cheung去梳化坐番低，見佢撐住條腰行步路都有啲辛苦嘅樣，我有啲自責未能喺Miss Cheung最需要我嘅時候陪喺佢身邊。
「我都好擔心趕唔切。」我隨手幫Miss Cheung按摩條腰。
「而家就好喇，萬事俱備，你想要仔定女呀？」呢個問題Miss Cheung同其他女仔都問過我，我清一色都係答「冇所謂」。
但係去到就嚟生嘅呢刻，我已經認真諗清楚：「生女喇，最好似足媽咪，咁第時實好受歡迎，贏在起跑線。」
「生女係好，我又可以幫佢扮靚，不過我就想生仔，似你嘅話實好得意，你唔喺身邊時又可充當替身陪住我、保護我。」Miss Cheung仰頭思考，即時將為人母，佢仍然係又靚又可愛。
氣氛咁和諧，我趁機喺褲袋攞隻戒指出嚟，單膝跪喺地下，以標準動作向Miss Cheung展示我最真摯嘅誠意：「Miss，你可唔可以嫁俾我？喺阿B嘅見證下，我承諾往後餘生，都會將最好嘅俾晒你，令你成為呢個世界上最幸福嘅女人！」
Miss Cheung望住我，眼裡充滿驚喜同感動，甚至有啲淚光閃爍，良久，Miss Cheung先至下定決心咁搖搖頭：「我好開心你向我求婚，但係我覺得未係時候，所以我唔可以應承你住。」
B都有埋仲未係時候？「咁你咪變咗未婚媽媽囉？」雖然呢個唔係重點，但係我冇諗過Miss Cheung會拒絕我，一時唔知點反應。
「有咩所謂？加拿大仲有三個未婚媽媽等緊你添。」Miss Cheung掩咀失笑。
唔通呢個就係Miss Cheung拒絕我嘅背後原因？「Miss，周穎佢哋都知道我會向你求婚嘅事，你唔使擔心佢哋會唔開心喎。」其實Chloe同邱雅琳係唔知嘅，勉強只可以話會估到。
「唔係呢個問題，子龍，今次有咗係意外，我之前講過，你畢業後決定好前路，無論係留喺加拿大定返香港發展，我都會嫁雞隨雞，所以喺你未畢業前，我唔想因為BB呢件事，而打亂咗你嘅人生，令你放棄自己前途，提早結婚安定落嚟。」Miss Cheung果然不愧為老師，講嘅說話無懈可擊，唔知佢係咪平時輔導過太多未婚學生，所以一出口就一針見血。
有個咁為自己著想嘅另一半，我仲有咩好講：「就算唔結婚住都可以訂婚啫，咁當訂婚得喇啩。」我抱住跌落地都要揦番拃沙嘅心態問。
Miss Cheung見我咁有誠意，終於點點頭，伸隻右手出嚟俾我，微笑話：「咁好喇，我睇你今晚唔幫我戴戒指都唔會心熄。」
我手震震托住Miss Cheung柔若無骨嘅嫩手，將戒指戴咗落隻中指度，好彩size啱啱好，如果唔啱戴就尷尬。
戴完戒指，例牌都要錫下，我坐喺Miss Cheung身邊，溫柔咁一下一下錫佢個咀，可能因為有咗，Miss Cheung個胸睇落升咗一、兩cup，係史無前例咁大，適逢其會，我忍唔住探手入衫搓咗幾下。
「呀！」唔係平時因為舒服而發出嘅呻吟聲，聽落有少少痛咁，唔通Miss Cheung谷胸谷得太勁，揸下都痛？
我鬆手望向Miss Cheung，佢仍然係一副痛苦表情，我有揸得咁大力咩？
「Miss，對唔…」我未道完歉，Miss Cheung已經少有地插口。
「我好似…生得，你幫我去房攞埋…個生仔袋，就係擺喺床邊…藍色嗰個斜孭袋，我叫車。」Miss Cheung幾經艱難先講完。
我飛身入房，一眼就認出個生仔袋，出番嚟Miss Cheung已經叫咗車，咁快手，佢一定實習過好多次。
我抱起Miss Cheung，用最快速度落到樓下，門外已經有架的士停咗喺度，我哋一閂門就開車，連地點都唔使問。
喺車度Miss Cheung挨住我，不停張大口深呼吸，人哋話生仔係十級痛，咁而家起碼都有三、四級啩，我一手攬住Miss Cheung膊頭，一手按住佢個肚，心裡面不停同個B講：「嗱，你唔好出嚟住呀，乖乖地等去到醫院先呀。」
好唔容易嚟到醫院，一入到去已經即刻有護士上前安頓好Miss Cheung並將佢送去見醫生，因為Miss Cheung全程捉實我隻手，所以啲護士冇多問就俾我陪喺身邊。
產科醫生係一個起碼五十歲以上嘅女醫生，講唔上靚，但係個樣好慈祥，令人莫名有好感，始終生仔係開心事，一般又唔會太辛苦，所以做耐咗個人自然會比較和善。
「Angel，你而家覺得點呀？我之前同你講嘅過程，你覺得去到邊個位？」醫生把聲都溫柔過人，令我諗起過世嘅嫲嫲。
「陳醫生，我覺得宮縮情況只係初期，應該未生得住。」Miss Cheung有氣無力咁答。
陳醫生幫Miss Cheung仔細檢查，然後點點頭：「可能BB仲想留喺靚媽咪個肚裡面多陣，你上病房休息下先，我一陣再去睇你。」陳醫生突然轉向我：「你就係BB爸爸？」
「係，我係。」冷不防俾人咁問，我口窒窒咁答，好彩陳醫生唔係問我係咪Miss Cheung老公，唔係都唔知答「係」定「唔係」好。
「聽Angel講你一直喺外國，今次你返得嚟好合時，剛好可以見證新生命嘅誕生，你陪Angel上房先，起碼仲有七、八個鐘頭先生得，有咩特別情況記住即刻通知護士。」陳醫生冇介意我只係一個死𡃁仔就搞大人個肚嘅表現，令我對佢產生極大好感。