自從同Miss喺一齊，我就忽然變得好受歡迎: 第264章 新生命
上到病房Miss Cheung面容紓緩咗好多，可能因為身處醫院，心情比較放鬆，有咩事都可以即刻搵到人幫手。
「你啱啱落機就陪我嚟醫院，一定好肚餓，不如你去食啲嘢先。」Miss Cheung臉上勉強擠出笑容，好似講每一個字都有啲吃力。
我擰擰頭：「我喺飛機上面食咗嘢，而且我想陪住你。」
Miss Cheung微笑點點頭，除低咗手上隻訂婚戒指：「你幫我keep住先，一陣生嗰陣唔可以戴，生完你先再幫我戴番。」
我接過戒指，啱啱戴就除，好似唔多老黎咁，但係我又唔可以堅持要Miss Cheung戴住。
Miss Cheung見我一臉憂心，輕拍我手背：「放心，生BB好平常，亦係每個女人甘願為心愛男人而經歷嘅事，陳醫生係好叻嘅產科醫生，我一路做檢查又完全正常，所以絕對唔會有事。」
我輕擁Miss Cheung，從佢間中緊縐嘅雙眉，我可以清楚佢正忍受緊越嚟越大同密嘅陣痛，我喺呢個時候冇理由仲反而要佢擔心我，於是我輕吻Miss Cheung額頭：「你唔會有事，我一定唔會俾你有事！」就算冇咗個BB，我都唔可以冇咗Miss Cheung。
Miss Cheung攬住我條腰，喺兩心相連嘅情況下，靜待我哋嘅愛情結晶品誕生。
等待永遠係最難捱，尤其係痛緊嘅Miss Cheung，我都唔好過，望住心愛嘅人咁辛苦，但係又乜都做唔到，亦乜都唔敢做，其實生B咁慘，生出嚟又要養，咁做乜仲要生呢？
由天光到天黑，當聽到陳醫生終於喺檢查完後話「差唔多10度，可以入產房預備生。」我同Miss Cheung都鬆咗口氣。
幾個護士三兩下手腳就將Miss Cheung推咗入產房，我緊握住Miss Cheung隻手，從手上傳嚟嘅力度我可以感受到佢有幾痛，因為佢都揸到我好痛。
「好，深呼吸，用力…推！」陳醫生開始為Miss Cheung打氣，我咁大個仔，都未試過有呢刻咁激動，即使隔住塊布睇唔到生育過程，但係我都忍唔住渾身顫抖，好唔得過滿頭大汗、出盡力嗌緊嘅Miss Cheung幾多。
因為見過女人生B過程會導致失去性趣呢個都市傳說，我唔敢繞過塊布去睇個BB出嚟嘅情況，我鍾意B女啫，唔係鍾意睇生B喎，淨係想像都知會有幾核突。
望住Miss Cheung，我開始覺得為咗舒服啲而中出係好唔啱嘅事，將會為我咁樣受苦嘅人，加拿大仲有三個，佢哋唔單止冇抱怨，仲爭住嚟受苦，而我除咗企喺側邊睇住，乜都唔識做。
阿B嘅喊聲將接近休克嘅Miss Cheung同為咗逃離殘酷現實而處於出神狀態嘅我拉咗返嚟，當護士將個仲帶有少少血跡嘅阿B交到Miss Cheung手上時，我見到兩行淚水從Miss Cheung雙眼湧出，而我亦覺得視線有啲模糊。
「恭喜你哋，個BB女好健康。」陳醫生把聲喺耳邊響起。
「多謝醫生！」我向陳醫生道謝，然後轉身攬住Miss Cheung同阿B：「多謝你，辛苦晒你。」
我錫咗Miss Cheung一啖，亦都錫咗BB個額頭一啖，Miss Cheung個咀有啲乾，而BB就有啲血腥味，BB個樣同Miss Cheung好似，完全係所謂嘅美人胚子，第時長大後只要唔好變咗似我，就一定溝死仔。
因為要做檢查同清理，而Miss Cheung辛苦咗成日亦需要好好休息，護士轉頭就喺Miss Cheung唔太情願下抱走咗阿B，而我就等陳醫生處理埋啲後續手術後陪Miss Cheung上番病房。
未上到房Miss Cheung已經瞓著咗，連我都有啲脫力感，何況係由頭辛苦到尾嘅Miss Cheung，原來呢個就係我當年出生嘅過程，真係辛苦晒阿媽。實習都係啱嘅，嚟緊經歷多幾次後我應該會表現好啲，唔係淨識得手足無措咁企喺側邊發夢。
我仔細幫Miss Cheung抺乾臉上嘅汗同淚痕，Miss Cheung太攰，攰到全程都冇醒過，我見佢瞓得咁腍，就落去醫院餐廳食嘢，經過日幾嘅時間，B又生完，放鬆情緒後，我終於有番嗰種幾日冇食過嘢般嘅空腹感。
醫院啲嘢唔係特別好食，兼且記掛住Miss Cheung同阿囡嘅情況，我求其食完就上番房，途中有打過俾周穎報告好消息，因為硬係想搵人分享下。
「係囡嚟，好似Miss，好彩唔似我。」我發現自己原來幾興奮。
「只要係Miss生，仔囡你都鍾意㗎喇，係呢，改咗名未？」周穎有啲醋意咁問。
「我對你哋個個都一樣，你生嚿叉燒我都錫晒你，至於名…未諗喎。」呢方面通常長輩負責，冇通知阿媽就令到我都唔記得咗。
「咁你快啲諗喇，唔係點去攞出世紙，我呢幾日開始有少少佗B感覺，個肚亦都開始遮唔到，所以我想搬去Chloe度住。」周穎應該係擔心阿媽知道，阿妹同小琪就早知唔講啫。
「都好，有個照應，照顧起上嚟又方便啲。」我諗緊係咪都要搬埋過去。
「你影啲BB想過嚟睇下，我諗Chloe同Joyce都好想睇。」係喎，唔趁細影多啲相，第時阿囡結婚就會話我冇相俾佢整片。
上到房Miss Cheung當然未醒，我聽姑娘講話阿囡已經送咗去嬰兒房，我隨時可以去探視。
彷彿有感應咁，Miss Cheung一聽到阿囡嘅消息就彈咗起身：「係咪可以探BB呀？」
「係，你放心，姑娘話BB好健康。」我見Miss Cheung滿臉關切，就行去床邊安慰佢。
「我都想去探BB。」Miss Cheung用哀求眼神望住我，驚我唔帶佢去咁。
雖然我見Miss Cheung生得咁辛苦想俾佢再抖下，但係見到呢個樣我又點捨得逆佢意：「好吖，我去攞張輪椅推你去。」
喺嬰兒房嘅阿囡瞓得好甜，咀角泛起一絲同Miss Cheung如出一轍嘅微笑，嚟到呢個世界係咪真係咁值得開心我就唔敢肯定，但係仲係BB嘅佢無憂無慮又係事實。
Miss Cheung臉上充滿慈愛，望住阿囡嘅表情比起望住我時更溫柔，感受到Miss Cheung巨大嘅母性磁場，我都有啲眼濕濕，或者我仲未有身為人父嘅覺悟，但係Miss Cheung明顯已經從女神升格咗做靚媽咪。