自從同Miss喺一齊，我就忽然變得好受歡迎: 第262章 為人父母
媲美黑社會大佬嘅氣勢由坐喺大班椅嘅中年大叔鋪天蓋地向我湧至，未開口，我已經覺得自己如待宰羔羊咁無助。
「我個女嘅事，你諗住點？」Chloe阿爸真名秦漢濤，語氣平和，但就係俾人一種壓迫感。
「秦生，我會好好照顧Chloe，俾最好嘅生活佢。」我雖然怯怯地，表面都扮晒有為青年。
「最好？哈哈哈！」秦漢濤雖然發出笑聲，但係完全感受唔到佢有半分笑意：「你嘅事我好清楚，你所謂嘅最好，係幾分之幾嘅最好？」
連Chloe都搵人跟我，佢老豆點會唔喺見我前check清楚我個底：「我認為只要當事人覺得滿意，就係最好！」
「啪！」秦漢濤大力拍落辦公枱面，震到成張枱啲嘢東倒西歪，門外仲即刻走咗兩個彪形大漢入嚟，睜大雙眼啤實我，一副只要一有任何指示，就即刻賣我單嘅樣，對住呢啲專業殺人機器，我連架式都冇擺，大家都唔係同一level。
秦漢濤怒目啤住我，即使只係同佢對視，我都覺得對眼有啲熾熱，成個世界好似停頓咗咁，我甚至連大氣都唔敢透一下。
直至啤到大家都有啲想眨眼，秦漢濤先轉身望向窗外，揮手示意兩個保鏢出番去。
「我唔會俾阿寶嫁俾你，你亦都唔使旨意可以入贅我哋秦家，阿寶仲細，仲未知道身為秦家人嘅責任同義務，你真係對佢好，呢幾年就令佢開心啲。」秦漢濤嘅說話充滿威嚴同不可抗拒嘅力量：「至於我外孫，你唔使擔心，我會陪養佢成為秦家未來打天下嘅重要一員。」
秦漢濤冇俾機會我再講任何嘢，就搵人送咗我走，一離開座大廈就見到喺外面滿臉擔憂嘅Chloe。
Chloe一見我就拉我上車，叫司機揸車離開：「阿爸同你講咗啲咩呀？」同時摸匀我全身，似乎想睇下我仲係咪冇穿冇爛。
「你阿爸叫我對你好啲。」我如實作答，只不過唔係講晒所有嘢。
「真係？佢冇迫你離開我或者做任何強人所難嘅事咩？」Chloe睜大眼一臉唔信。
我諗咗諗，起碼呢幾年佢同意俾啲安樂日子我同Chloe，至於將來，就等時辰到先算，冇必要呢刻就擔心定：「唔算啩，起碼短時間內唔會有任何改變。」
Chloe聽我咁講，突然明白晒所有嘢，攬實我，將頭湊到我耳邊：「我知道我哋冇可能永遠喺埋一齊，但係呢段留喺你身邊嘅日子，我到死都唔會忘記。」
我將Chloe打橫抱上身，一手輕撫佢柔順嘅秀髮，一手放喺隆起嘅肚皮上面，感受肚裡面血濃於水嘅羈絆。
喺不可知嘅將來，終有一日Chloe會離我而去，盡番佢身為超級大富豪個女嘅責任，而家我除咗要好好對佢之外，冇咩嘢可以做。又或者我仲可以發奮圖強，白手興家，成為一個令秦漢濤另眼相看嘅人？
喺返香港之前，我去咗探阿爸，講咗佢無端端做咗阿爺嘅事佢知：「阿爸，你都係時候醒番喇，好快你就有成班孫仔、孫女要湊，淨係阿媽一個搞唔掂，而且你仲要飲心抱茶，我已經決定娶Miss做老婆，嗱，唔好話我冇預先通知你呀，呢單嘢連阿媽都唔知，我淨係話俾你一個聽。」
阿爸照舊冇乜反應，但係唔知點解，我感覺間房嘅氣氛唔同咗，用言語好難形容，就好似阿爸唔係昏迷，而係坐喺度聽緊我講嘢咁。
「阿爸，嚟咗加拿大都好少探你，而家轉番出多倫多大學，我會多啲嚟探你，對上一次我哋兩仔爺嘅對話，已經係未移民加拿大之前，你喺加拿大發生過咩事，我完全唔知，我呢幾年嚟嘅艷遇，你都只係有一件冇一件咁聽下，幾時有機會，我哋一齊擗下酒傾下心事。」講講下有啲唏噓，如果阿爸醒唔番，當年喺機場送機嘅一幕就會變成我哋嘅最後一面。
「我當你應承咗喇，等我喺香港返嚟，你就好醒喇，唔係等你啲孫出晒世，我帶佢哋嚟嘈醒你㗎，自然醒幾時都舒服過俾人嘈醒，你自己諗清楚嘞。」我拍拍阿爸隻手，用力捉咗一下先離開。
出到房周穎、Chloe同邱雅琳都喺度，佢哋聽我話走前要嚟探下阿爸，就一鍋蜂跟埋過嚟。
「跟住到我同Joyce！」Chloe打尖拉住邱雅琳入病房，佢怕醜唔敢自己一個，所以拉埋邱雅琳陪伴。
Feel到咁溫馨嘅氣場，阿爸遲早會俾我哋溫醒，周穎頂住開始唔係幾遮到嘅肚行埋我身邊，依偎喺我胸口：「你今次返香港係實習，到我生嘅時候你就係專業人士，要好好照顧我同BB。」
「你唔怪我陪唔到你慶祝新年咩？」我用手指將周穎啲頭髮不停打圈。
「我唔會因為短暫嘅分別而唔開心，因為我哋以後仲有好長時間會喺埋一齊。」周穎睇落真係完全唔介懷，可能因為仲有Chloe同邱雅琳陪住佢。
我哋靜靜享受對方喺身邊嘅寧靜時刻，直到Chloe同邱雅琳出番嚟。
「到我喇。」周穎見Chloe臉紅紅咁走番出嚟，就離開我去探阿爸，有咁多個靚女爭住探，阿爸都應該算艷福無邊。
雖然差唔多過咗成年，但係當坐上飛機嘅時候，上次嘅旅程就好似只係幾星期前嘅事，不過同上次忐忑不安嘅心情唔同，今次嘅心情係充滿興奮。
我喺加拿大用呢幾個月措嘅錢買咗隻白金戒指愛嚟向Miss Cheung求婚，我希望今次返香港可以同Miss Cheung註埋冊，為著呢點我已經上網去婚姻註冊處網站預約咗日期，係我返香港嘅三日後，趁住未到農曆年假。