自從同Miss喺一齊，我就忽然變得好受歡迎: 第249章 回港
「即刻？你唔係唔記得Miss Cheung而家喺香港啩。」June見我一臉堅定，終於知道我嘅想法：「你想飛番香港搵Miss Cheung？」
我點點頭，打鐵趁熱，我唔知Miss Cheung有幾嬲先會完全唔理我，亦都唔知道喺我哋鬧翻嘅呢段期間會唔會俾人乘虛而入，如其等，不如任性地為Miss Cheung走一轉，至少可以令Miss Cheung感受到我嘅誠意。
只係仲有一個問題，就係飛番香港嘅機票錢……
「既然你決定咗，咁我作為你個friend都會支持你，如果有個男仔肯為我做呢啲傻事，我應該都會幾感動。」June悠然神往咁話。
「除咗精神上嘅支持，唔知我仲可唔可以問你借啲水腳。」我厚顏無恥咁問，其實我可以問石克隆或者Chloe借，佢哋分分鐘唔使我還，只不過今次嘅事我唔想俾佢哋知，同June有借有還感覺上亦冇欠落咁多人情。
「借錢就唔好喇，有啲傷感情，不如當借糧，你返嚟先做番夠鐘數俾舖頭喇。」June似乎有啲明白我嘅顧慮。
我返到屋企即刻上網check機票，最快後朝就有機，我講咗個價錢俾June知，佢轉頭就過咗機票錢加二千鈫加幣旅費俾我，加埋平時措落嗰啲，總算解決咗錢方面嘅問題。
再嚟就係周穎、Chloe同邱雅琳方面，之前應承咗佢哋復活節會抽時間分別招呼佢哋三個，而家就惟有搵個藉口扮留喺Waterloo。
因為Chloe同邱雅琳一齊住，我通常都係無分彼此咁開三人會議facetime傾電話。
「吓？你又話復活節會抽時間陪我哋去玩嘅！」Chloe一聽到我話復活節要留喺Waterloo溫書同返工，立刻一臉失望咁話。
「因為我想考好個試，確實夠分轉出Toronto，而且亦都想賺多少少錢，咁暑假就可以請你哋去玩豪啲。」呢個係我一早諗好嘅藉口，信服力叫勉強足夠。
「錢咋嘛，我出咪得囉…」Chloe未講完，已經俾邱雅琳用眼神截住咗，佢咁醒目，當然明白男人唔想下下靠女友嘅心態：「咁我哋入去探下你吖。」
「唔好喇，我唔想分心，而且時間上未必分配到。」我見Chloe臉色變得有啲難睇，就跟住話；「復活節後考埋試，好快我就會出番去，跟住日日都喺Toronto，到時補番數俾你好冇？」
邱雅琳好似知道我有難言之隱，搶喺Chloe發難前幫口：「我哋女仔就話戀愛大過天，但係男仔反而會以事業…學業為重，講到底都係為我哋好，我哋做女友嘅要體貼男友。」
Chloe俾邱雅琳咁講一講，似乎諗起啲乜咁，改變態度話：「咁又係，希望你第時唔好變到我阿爸咁掛住做嘢，冷落屋企人。」
「絕對唔會，你放心。」我今次為女咋嘛，都唔係真為學業。
然後就到周穎，本來我係屬意用同一個藉口氹周穎，以周穎咁善解人意，應該唔會有任何異議，但係考慮再三，Chloe同邱雅琳事後就算知道我實質係返咗去香港搵Miss Cheung，最多係Chloe會扭下計，邱雅琳甚至可能冇乜所謂，而周穎知我咁大件事都瞞佢，後果就有啲難以預料。
我打俾周穎後閒話家常咗兩句，就將俾Miss Lee屈、同埋決定返香港追番Miss Cheung嘅意向講咗俾周穎知。
「你咁做都啱，因為Miss Cheung而家一定好傷心，分隔兩地就算俾你氹得番，都始終𧶄啲，雖然你哋只係分開咗幾個月。」周穎果然係明白事理嘅人。
「多謝你支持我，我原本仲有啲擔心你唔信我。」我鬆咗口氣，衷心感激周穎嘅理解。
「唔會喇，經過上次件事，我覺得我哋彼此間應該絕對信任、同埋多啲為對方著想，而且今次你又咁誠實。」周穎語氣輕快咁話。
兩個人一齊要走嘅路好長，即使經常只係發生少磨擦，日積月累下都會變成決裂嘅導火線，互相諒解確實好重要。
其實每次出問題，個始作俑者都係我，聽周穎咁講著實內心有愧：「你對我已經好好，係我做得唔夠好。」
「我都有做得唔好嘅地方，總之以後我哋都要做好啲，唔好再為無謂事嗌交，每日都要更愛惜對方。」周穎溫柔咁提醒我：「你今次返香港一定要好好氹番Miss Cheung，唔好再令疼愛你嘅人傷心。」
「我知道，返嚟後我更要對你好啲。」我真心承諾。
周穎冇為我哋要短暫分開而唔開心，只係不停鼓勵我，為我打氣，亦都完全冇懷疑我同Miss Lee係咪真係有嘢，呢點令我係擔心氹唔氹得番Miss Cheung嘅當下，得到唔少安慰。
因為只係個零星期，我冇專登喺離開前走轉Toronto，做戲做全套，話咗要喺Waterloo用功讀書同打工，就要扮到底，而且我嘅心思而家集中晒喺Miss Cheung身上，佢仍然block咗我，唔知嬲嘅程度到底有幾高。
第二日照常返工，我比平常更努力做嘢，以報答June答應借糧嘅恩惠，咁亦都可以令我暫時放低煩擾嘅心情，雄叔當然唔知真相，June用嘅藉口係我有啲好重要嘅家事要趕返香港搞，Miss Cheung同我關係咁密切，話係家人都唔算講大話，不過睇雄叔佢哋個樣同語氣，好似覺得我返香港係要爭家產咁？
放工後June車我返屋企冇耐，就再過嚟車我去機場，都幾唔話得，喺Waterloo我冇乜行李，事實上亦都冇需要帶咩，手信就更冇必要，專登買啲咩禮物又幾困難。
June陪我喺機場等上機期間，一直不停開解我，其實我係擔心，但係又未至於太擔心，始終而家可以直接返香港搵Miss Cheung，我有十足把握可以氹番佢。
相反喺呢件事上面，June嘅大力支持同幫忙令我好感動，有時望住佢長髮飄飄嘅瓜子口臉，會有啲怦然心動嘅感覺，以前話嫌棄佢個肥look同性格，現時改咗look，friend埋後發現June都唔差。
不過諗還諗，我比較鍾意我哋而家嘅關係同相處，June當然唔知我喺咁時候仲有心情諗無謂嘢，見我若有所思就拍下我膊頭：「唔好諗咁多，Miss Cheung係大人，唔似我哋咁會一時衝動做錯決定，況且你都專登返去搵佢，一定搞得掂。」
我大力點頭，再三多謝June後轉身入閘，一個人在途上嘅感覺麻麻，而且心情又有啲鬱悶，十幾個鐘都唔易捱。