自從同Miss喺一齊，我就忽然變得好受歡迎: 第248章 補救
「咦？你塊臉做乜咁黑嘅。」一上車，June就問。
「係我唔小心，結果都係中咗Miss Lee招。」我將頭先嘅事一五一十講俾June知。
「事實上你咩都冇做過，係俾人屈啫。」June嬲到大力拍落軚盤。
「唔係，你之前已經提過我，我都仲係咁唔小心，而且我唔敢講自己完全冇歪念，只係唔敢做，如果唔係根本唔會俾Miss Lee有機可乘。」對住June我可以好老實。
「你識得咁諗就夠，而家首要係想辦法補救。」June始終係女仔，比較細心，亦都識得分輕重，如其繼續沉溺喺自怨自艾，倒不如集中精神落去解決方法。
「我頭先試過即刻再搵Miss Cheung，不過佢冇聽我電話，連Whatsapp都block埋，唯有先等佢下咗啖氣。」分隔兩地，我就算想即刻搵Miss Cheung當面解釋都好難。
「Miss Cheung以為你呃佢，梗係好嬲，而且仲要一早警告過你，你都唔聽，短時間內你都唔使寄望佢會睬番你住。」June詳細分析件事。
「咁點算好呢？最衰Miss Lee deleted晒啲messages，我冇辦法知道佢哋之間講過乜，都唔知點同Miss Cheung解釋好。」胡亂猜測只會令我同Miss Cheung間嘅誤會越嚟越深。
「呢方面你交俾我，我最近識咗個IT師兄，成日吹到自己乜都掂，你啲messages都只不過係啱啱刪除，應該搵得番出嚟。」June自從變靚咗之後社交圈子連升十級，佢話搞得掂應該唔係作大。
「咁就拜托你，雖然大概都估到Miss Lee會講咩內容，但係以防萬一，都係睇番原文好啲。」而且啲messages裡面仲好似有相同video，我係冇同Miss Lee搞過嘢，但係都要知道佢點屈我，唔會用AI換臉咁老土啩？
「我哋分頭行事，你照返工先，我去搵師兄幫手，如果順利，你放工嗰陣就有結果，到時我哋再商量下一步點做。」我不其然對June另眼相看，更加慶幸當初冇乘機嗒埋佢，唔係今次就冇咗個好幫手。
June放低我後就去咗搵IT師兄，我將手機交低俾佢，連密碼都俾埋佢，同June friend咗唔算好耐，但係我對佢有種絕對信任，覺得佢唔會跣我。
雄叔對June突然話有急事唔返工冇點多言，最近呢個情況經常發生，因為太受歡迎，成日都有人嚟舖頭搵June，有時推唔到或者唔想推，June就會曠工。
我冇乜心機做嘢，滿腦子都係Miss Lee究竟點屈我，同Miss Cheung嬲成咁唔知會唔會做啲咩嘅諗法，好唔容易先捱到放工，June亦都適時出現，帶咗個好消息俾我。
「上車先講。」June喺舖頭門口向我招手。
上到車，June將手機交番俾我：「搞掂咗，retrieve番晒啲messages出嚟，我冇睇過，你睇咗先。」
_________________________________________________________________
「張馨頤，我話過今次唔會再輸俾你，而家你個男朋友仔果然衰咗喺我手上。」
「你係李慧心？點解你會用子龍個Whatsapp send嘢俾我！」
「你覺得呢？」
連續有幾個Whatsapp電話打嚟，都被拒接。
「子龍呢？你俾佢聽電話。」
「佢啱啱同我搞完，而家攰到瞓著咗，我見得閒，咪早啲通知你我哋嘅事。」
「我唔信子龍會同你一齊。」
「係咩，咁我影張相俾你睇下。」
跟住係張我飲大咗瞓著嘅相，應該係當日Miss Lee送我返屋企時喺車上面影，臉紅紅都咪話唔似搞完嘢。
「我哋之間嘅事，點解你要拉埋其他人入嚟，當年你已經拆散過我同Allen一次，點解今時今日仲要再傷害我同子龍？」
「我傷害你哋？咁當年係邊個扮晒純情搶咗我男朋友，事後仲要喺我面前扮好人？」
「你講咩呀？我哋公平競爭，話咗結果係點都會繼續做好朋友，如果唔係你同Allen背住我做埋嗰啲嘢，件事都唔會搞到不可收拾。」
「點都好喇，總之今次我就點都唔會認輸，你喺香港咁遠，就睇下箍唔箍得住你男朋友仔。」
「李慧心，你唔好以為影張相我就會信晒你，我對子龍好有信心。」
「係咩？咁我送多條片俾你欣賞，你睇完後睇下係咪仲可以咁有信心。」
條片只有約三分鐘，一開始係Miss Lee好享受嘅樣，然後冇耐就影咗去身後郁動緊嘅男性身體，無可否認，驟眼望落去身形同我的確有少少似，但係睇耐啲就會發現舉止有好明顯分別，而且比我略高同瘦。
條片始終冇影到男仔個樣，以我同Miss Cheung咁親密嘅關係，佢冇理由會認錯人，除非佢睇咗兩眼就火鬼滾冇睇落去，以Miss Cheung性格，的確好有可能發生。
「點呀？仲有冇嘢講呀？你即管親口問下你個子龍，睇下佢點解釋，不過我哋今晚玩到咁攰，我唔知你幾時先可以搵到佢。」
_________________________________________________________________
以上就係所有訊息，本來Miss Lee未必可以成功令Miss Cheung同我鬧翻，係衰在Miss Cheung搵我嗰陣，我一開始為免佢多心而隱瞞咗件事，令到原本嘅懷疑變成確鑿嘅證據。
我遞手機俾June睇，佢睇完後邊點頭邊話：「睇落又真係幾似你，加埋前面你幅瞓覺相，Miss Cheung會誤會係唔出奇。」
「都係我衰，如果Miss Cheung一打嚟我就講事實，應該就可以識破Miss Lee嘅鬼計。」呢啲咪一子錯滿盤皆落索囉。
「都唔怪得你，Miss Lee不愧係讀心理學，對你同Miss Cheung嘅心理都捉得好準。」June停一停，認真話：「所以你以後對女朋友一定要誠實，只要問心無愧，其他有心人就好難入到位。」
「我而家梗係知喇，不過直到而家Miss Cheung都唔肯聽我電話，又send唔到message俾佢，都唔知點算好。」我乜都俾Miss Cheung block晒。
「咁你搵其他人幫你聯絡Miss Cheung咪得囉。」June提出嘅都係一個好辦法。
而合適人選只有周穎，但係我唔係太想搵周穎幫手，因為我同佢都係啱啱好番，又出現另一個女仔嘅話，我連佢會唔會信我都唔咁肯定。
況且激嬲Miss Cheung嘅係我，要氹番佢亦唔應該假手於人。
「我想自己同Miss Cheung解釋，同埋親自氹番佢。」呢個係我最後決定。
June點頭同意：「都有道理，咁你等Miss Cheung下咗啖氣睬番你，先慢慢同佢講清楚。」
「我唔想等，我想即刻去搵Miss Cheung。」我望向遠方嘅天空。