自從同Miss喺一齊，我就忽然變得好受歡迎: 第250章 重遇故人
睇下片瞓下覺，好唔容易終於喺窗口望到熟悉嘅香港島，香港時間係晏晝12點零鐘，落咗機出得閘成點幾兩點，香港都係放緊復活節假，Miss Cheung應該喺屋企，於是我直接搭車去搵Miss Cheung。
去到Miss Cheung樓下，有啲百感交集，更有彷如隔世嘅感覺，原本以為再嚟到呢個地方係畢業後嘅事，估唔到世事總不似預期，忽然間早咗幾年返到。
而更加估唔到嘅，係我又見到Richard架車停咗喺度，嚴格嚟講我只係認得個車牌，因為架車已經唔係當年見到嗰架，而係最新款嘅電動波子。
我呆呆望住架車，一時唔知好唔好即刻上去搵Miss Cheung，萬一撞破人哋好事，我唔知接唔接受到，專登山長水遠走番嚟箍煲，結果發現自己條女已經俾人撬走，嗰種痛苦絕對係生仔咁十級痛，唔通呢啲就係報應？
繼續等落去，我懷疑自己會衝出馬路俾架車撞死算數，於是鼓起勇氣，入大廈㩒𨋢上樓。
𨋢門打開就傳嚟Richard同Miss Cheung把聲，我睄一睄見Richard正企咗喺Miss Cheung門口，下意識閃咗去走廊另一邊轉角位柄埋，然後聳高耳仔偷聽。
「你開門俾我入去先喇，我真係有好緊要嘅嘢要同你商量。」Richard苦苦哀求。
「你有咩要講就喺度講，我唔係咁方便俾你入屋。」Miss Cheung冇心軟開門，隔住鐵閘同Richard對話。
「有咩唔方便？我哋以前話晒係男女朋友，唔通你驚我會對你有不軌企圖？」Richard亦冇輕易放棄。
「嗰啲係以前嘅事，而家你有老婆，我有男朋友，唔應該做啲會惹人誤會嘅事。」Miss Cheung把聲好堅定。
「老婆係阿爸要我娶嘅，我哋都冇感情，當日結婚前我已經同你講過，你知㗎。」咦？呢part我冇聽Miss Cheung提過，雖然我都冇特別問。
「咁你都記得當日我同你講過咩，你走喇，我最近都有嘢煩緊，有啲咩遲啲約出嚟食飯先講。」跟住就傳嚟閂門聲。
Richard仲喺門外繼續擾攘咗一陣，先悻悻然離開，等𨋢時仲噏咗幾句令我想出去揼佢嘅說話：「以前就話係處，而家睇個樣都唔係喇，仲扮晒嘢，我就唔信食你唔到。」
Richard離開後，我呆呆企咗喺走廊，腦裡面不停反覆泛起Richard頭先嘅說話，睇嚟Miss Cheung喺香港都幾危險，仲要未計學校等其他地方啲狂蜂浪蝶，淨係一個死纏難打嘅Richard都夠我擔心。
自怨自艾咗陣，我先拖住沉重嘅步伐行去Miss Cheung門口，㩒咗幾下鐘。
冇反應，我再㩒多幾下，門突然被一下拉開，隔住鐵閘見到嘅竟然唔係Miss Cheung，而係Miss Yip！
「Angel都話冇心情…咦？點解會係你嘅？」Miss Yip本來黑口黑面，但當發現門外嘅唔係Richard而係我，表情轉為錯愕。
「Miss Yip你好，我想搵Miss Cheung。」一排冇見，Miss Yip打扮女性化咗好多，已經冇咗TB嘅影子，不過我見佢著住睡袍，心裡面有啲唔舒服。
話晒Miss Yip之前曾經搞過Miss Cheung，後嚟俾我拗番正冇耐，又因為Carmen事件而鬧翻，到而家我都唔肯定佢鍾意男定女，定或係兩邊都啱。
Miss Yip眼神複雜咁啤咗我幾眼，然後就閂門入番屋，我企喺門口唔知點好，等咗十零分鐘，門再打開，Miss Yip身穿套裝出現，打開鐵閘經我身邊離開。
「對唔住。」我望住Miss Yip背影講咗句遲咗好耐嘅道歉，Miss Yip冇轉身亦冇回話，停咗一停就繼續行去搭𨋢離開。
比起我預計嘅情況，今日算係幾熱鬧，我再次㩒鐘，今次終於見到朝思暮想嘅Miss Cheung。
Miss Cheung個樣有啲憔悴，但係穿著背心熱褲嘅佢仍然性感迷人，睇到我熱血沸騰，差啲唔記得咗自己返嚟係為乜。
「你眼甘甘望住我做咩呀？你再唔講嘢我閂番門㗎喇。」Miss Cheung語氣唔算惡，甚至似係撒嬌多過嬲。
「對唔住呀，Miss，我之前對你有所隱瞞係我唔啱，但係我同Miss Lee真係冇嘢㗎，呢方面我可以詳細向你解釋。」今日已經係第二次同人講「對唔住」呢三個字：「Miss，你要信我，我雖然成日做錯事，又唔夠專一，但係對你絕對係真心，所有嘢都係我唔啱，係我自以為有啲嘢唔講俾你聽，對我哋嘅感情反而係好，其實兩個人相處，最緊要係坦誠，尤其係乜都願意包容我嘅你，我更加應該咩都同你講，如果我一早識咁諗，就唔會發生今次嘅誤會。」
我一口氣講晒喺飛機上反覆思量過嘅說辭，我唔敢話可以即刻氹番Miss Cheung，但係希望起碼可以幫我爭取到個補鑊機會。
Miss Cheung側頭諗咗諗，好似喺度猶豫緊信唔信我好，我見事情有轉機，即刻話：「Miss，不如你俾我入去先喇，喺度俾人睇住晒唔係幾好。」頭先Richard喺度嘅時候已經有啲隔離鄰舍𥄫𥄫下，而家換咗個𡃁仔就更加多人借意倒垃圾行嚟行去。
「咁你入嚟先講。」Miss Cheung開鐵閘俾我入屋，嗱，我嘅地位明顯比Richard高幾班，佢死囈爛囈都係企門口，我幾句說話就可以登堂入室。
入到屋Miss Cheung刻意同我保持距離，我亦都冇猴急到一入嚟就攬實佢搏懵，以免造成反效果，我閂番門企喺門口附近，繼續遊説Miss Cheung：「我睇過Miss Lee sent俾你啲嘢，內容當然係虛構，個video嘅主角更加唔係我，只有張相係真嘅，不過我當時係飲醉喺車度瞓著咗，而唔係同Miss Lee搞完嘢。」
Miss Cheung望住我嘅眼神由起初懷疑漸漸轉為動搖，跟住伸手去攞起手機，但係停一停又放番低。
「Miss你係咪想睇番啲相同video？我手機有，雖然之前Miss Lee好奸咁delete晒，但係我已經搵啲勁人幫我還原番。」我睇穿Miss Cheung心思，亦都知道佢開始信我。
「好，你開俾我睇下。」Miss Cheung行近我，身上嘅香氣薰到我有啲亂性。
我打開Whatsapp遞俾Miss Cheung，任佢自由翻閱，Miss Cheung接過後仔細睇過晒，臉上不覺露出欣喜表情，但係好快就詐諦黑番臉：「就算Miss Lee講嘅嘢唔係全部屬實，你呃我都係唔啱。」
今次我確信可以出手喇，於是伸手攬Miss Cheung埋身，一解相思之苦之餘又扮下可憐：「所以我咪放低晒所有嘢，搭最早嘅飛機返嚟親身同你解釋，Miss，你對我嚟講係最重要嘅人，我唔可以失去你。」