自從同Miss喺一齊，我就忽然變得好受歡迎: 第247章 中伏
雖然June已經提醒過我，但係經過幾個月Miss Lee都冇乜動靜後，我不其然放下防備之心，當番佢係一個正常嘅Professor，冇再事事提防住佢。
而Miss Lee亦都冇對我有任何奇怪舉動，直到放復活節假前，理應係我最後一次見佢，完成埋所有project手尾嘅時候，Miss Lee話請我食飯，我都冇推佢。
如果Miss Lee話去佢屋企食飯，我一定會警覺有問題，但係佢冇，只係車咗我去downtown一間幾好情調嘅餐廳食晚飯。
「多得你幫手，我啲博士論文先可以早咗咁多完成，呢餐你隨便叫嘢食，當係慰勞你。」Miss Lee打扮高貴，比起平時嘅套裝，多咗幾分成熟迷人嘅魅力。
「係你俾機會我幫手啫，可惜我唔打算繼續修讀心理學，唔係寫落個profile度，對讀上去應該好有幫助。」起初幫Miss Lee手，除咗為學分，都有少少係因為佢嘅外表，只係冇機會亦都冇膽量發展落去。
「將來嘅嘢好難講，話唔定有日你會重新讀番心理學，呢個始終係你興趣嚟。」Miss Lee微笑話，美艷程度絕對比得上Miss Cheung。
「到時你已經係Doctor，記住俾我跟你做研究生喎。」讀碩士或者博士，都要有個Doctor照住，就好似而家Miss Lee跟Dr Malcolm一樣。
「冇問題，話晒你係張馨頤男朋友，睇在咁多年舊同學份上，實會照住你嘅。」Miss Lee提起Miss Cheung時仍然保持住笑容，同當日嘅唇槍舌劍形成強烈對比。
「係呢，其實你同Miss Cheung之間嘅事…」既然Miss Lee講起，我借啲意問下。
「都係好多年前嘅事喇，相信件事嘅經過張馨頤都同你講咗，初初見番嗰陣係有啲氣上心頭，所以先有上次嗰番對話，後嚟冷靜落嚟諗清楚，先覺得自己咁大個人仲放唔低當年嘅事實在好蠢。」Miss Lee解釋：「諗通之後我冇再嬲張馨頤，有機會你都幫我同佢道歉，畢竟以前我哋曾經係好姊妹，為咗個男仔鬧翻真係好唔值得。」
「你識咁諗就好喇，等我呢排仲下下…」我停一停，將「提防你」三個字吞番落肚：「膽心你哋會因為對方而唔開心，而家一天都光晒。」
「唔好講呢啲唔開心事，你好快就要出番Toronto，都唔知仲有冇機會再見，不如就順便幫你踐埋行。」Miss Lee舉起酒杯：「祝你早日同張馨頤拉埋天窗！」
講到咁遠？「多謝你先，我都祝你早日攞到博士學位，做埋終身教授！」我舉起酒杯祝賀Miss Lee，喺加拿大全部Professor皆以終身教職為目標，我估Miss Lee都一樣。
有個咁靚嘅Miss陪食飯係開心事，飲飽食醉後都成十二點幾，好在就嚟放假，嚟緊幾日又唔使上堂，唔係頭先飲咁多聽日未必起到身返學。
Miss Lee雖然飲得較多，但係比我仲清醒，我放棄幫佢揸車嘅提議，上車冇耐就醉意、睡意來襲失去知覺。
再醒番時架車已經停咗喺屋企門外，如果唔係Miss Lee叫醒我，我分分鐘可以喺架車度瞓到第二朝。
我再三多謝Miss Lee招待後腳步不穩咁行番入屋，一撻落床就再次昏睡，直到第二日十一點幾先醒到，去浴室沖咗個涼總算清醒番啲。
電話響起，攞起手發現原來係June打嚟：「你得未呀，我過緊嚟接你，十分鐘後就到。」
係喎，見放假應承咗雄叔呢幾日返多啲工：「我換件衫就得，你嚟到照舊响「安」通知我。」
「咁一陣見。」June掛斷電話。
咦？有幾個missed call嘅，打開一睇，全部都係Miss Cheung打嚟。
尋晚攰得濟冇打俾Miss Cheung，一定係佢擔心我有咩事，所以打嚟搵我，不過我不嬲都冇日日打俾Miss Cheung，唔通反而係佢有事搵我？
電話一接通就傳嚟Miss Cheung把聲，香港係夜晚，未至深夜，但係Miss Cheung都好攰咁：「子龍，你尋晚去咗邊呀？我搵咗幾次都搵唔到你。」
我諗咗諗，猶疑緊好唔好話同Miss Lee出去食飯，雖然Miss Lee諗通咗啫，Miss Cheung唔知諗通未喎？「尋晚同啲同學出咗去飲嘢，返嚟攰得劑瞓著咗，唔好意思，今朝先發現你打俾我。」
「唔緊要，我擔心你有事啫。」Miss Cheung語氣平靜，聽唔出有任何唔妥：「係呢，李慧心仲有冇搵你幫手呀？」
「冇喇，開學做埋啲手尾後就再冇同我聯絡過，我記得Miss你吩咐過我㗎嘛，我梗係同佢保持距離喇。」經過尋晚，Miss Lee應該唔會再搵我，遲啲有機會先慢慢幫佢哋修補關係。
Miss Cheung突然靜咗落嚟冇出聲，我「喂」咗兩聲，忍唔住問：「Miss，你係咪攰呀？攰就早啲瞓，我今晚返完part time再打俾你。」
「你點解要呃我？」Miss Cheung忽然再次開口，簡單幾個字卻令我瞬間全身冰冷。
「Miss你講咩呀？我冇呃你呀。」講到呢度我立刻停咗口，Miss Cheung話我呃緊佢咩呢？唔係尋晚同Miss Lee食飯單嘢呀？咁好小事啫。
「咁你尋晚同李慧心一齊，做咩要瞞我。」Miss Cheung果然係講呢件事，早知頭先老實講佢知，而家反而令到Miss Cheung加深誤會。
不過始終我同Miss Lee冇發生過咩事，仲有補救機會：「對唔住呀Miss，尋晚我的確係同Miss Lee一齊，不過只係佢多謝我幫佢手做project，請我食飯，除咗食飯之外，我哋之間咩事都冇發生過，佢仲話想同你言歸於好。」
「如果係咁就好喇，我俾多次機會你，你哋究竟係咩關係？」Miss Cheung嘅語氣有種講唔出嘅強硬，似審緊犯嘅法官。
我心裡面火速諗番尋晚嘅經過，食完飯Miss Lee咪車我返屋企囉，冇其他事發生過呀：「Miss我唔明喎，你覺得我哋可以係咩關係？」
「唉！我以為自己已經俾足夠空間你，我知道你仲年輕，好難叫你喺呢個時候專一只對住我一個。」Miss Cheung嘅說話聽落令人感到當中有種難言嘅悲傷：「我只係要求你唔好同李慧心一齊、同埋唔好呃我，點解你咁都做唔到？」
「我冇同Miss Lee一齊喎，Miss Cheung你係咪有咩誤會呀？」我儘最後努力辯解，咪住，Miss Cheung點解一口咬定我同Miss Lee有嘢呢，除咗尋晚，我平時都冇試過同Miss Lee有任何做project以外嘅交流，而尋晚嘅事亦都只有我同Miss Lee兩個當事人知情，唔通係Miss Lee搞鬼？
「我對你好失望，我警告過你，我亦都話咗會嬲死你。」Miss Cheung掛斷電話，同Miss Cheung一齊之後，佢從來都冇試過cut我線，今次係第一次，亦都有種係最後一次嘅感覺。
我揸住電話發咗好一陣呆，直至屋外傳嚟不斷嘅响「安」聲，我先至醒番，更加靈機一觸，打開電話裡面嘅Whatsapp。
仆街，我同Miss Cheung嘅對話框裡面，竟然有十幾條deleted咗嘅messages，一定係Miss Lee趁我尋晚喺車度瞓著咗嘅時候，用我個電話同Miss Cheung唔知講咗啲乜，係咪衰呢，都話唔好貪方便唔轉電話，用死touch ID㗎喇，用face ID Miss Lee咪開唔到我個電話囉！