自從同Miss喺一齊，我就忽然變得好受歡迎: 第246章 異性好友  

「你究竟想點？」開車冇耐，June就惡惡地咁問我。
 
「我想點？我冇乜想點喎。」唔係完全唔明June嘅意思，只係我唔知點答佢啫。
 
「為咗你，我做咗我呢生人都冇諗過自己會做嘅事，你睇下我而家，你仲想我點？」June音量漸漸升高。
 
「不如話你想我點仲好喇。」我安撫June，始終佢仲揸緊車。
 
「我想你…」June突然停咗口，剛啱紅綠燈停車，佢轉頭望住我：「我想你同我一齊囉。」
 


「你真係想同我一齊？因為咩呀？你唔會話因為我靚仔啩？」我微笑問番June轉頭。
 
「因為…因為你關心我囉。」June始乎有啲動搖，語氣都不覺平靜咗落嚟。
 
「你會因為朋友關心你，就想同佢一齊㗎咩？」我繼續幫June釐清思緒，我認為June對我嘅感覺唔係愛情，我唔想佢搞錯。
 
後面嘅車不停响「安」，June不得以開車同專注番路面：「朋友？你趕走Patrick，唔係因為妒忌，想追我咩？」
 
「Patrick嘅事我可以同你好好解釋，不過喺解釋之前，我想你搞清楚自己嘅諗法，就算我真係想追你，你都唔係一定就要俾我追到㗎。」我忽然覺得自己由一個渣男升呢咗做一個正常人，以前係女都食嘅我，今日竟然冇食咗先算，甘心放過面前嘅靚女一馬，當然有少少原因係佢喺我眼中充滿昔日肥婆時嘅影子，你估我唔驚佢第時翻脹番㗎。
 


June靜咗落嚟冇出聲，仔細諗我講嘅嘢，我冇打擾佢嘅思緒，由得佢一邊揸車一邊諗清諗楚。
 
仲有差唔多五分鐘就到時，June終於再度開口：「冇錯，諗落你同Patrick又真係差幾皮，如果有得揀，我冇理由揀你唔揀Patrick。」
 
嘩！咁講又有啲hurt喎，話晒我係Patrick個事頭Chloe條仔：「咪係囉，你明白就好，你要知道而家自己變靚咗咁多，實會有好多狂蜂浪蝶埋身，如果你凡事唔深思熟慮，好容易俾人呃。」
 
「多謝你，唔單止令我立心變靚啲，仲令我對感情方面加深咗了解，以往我真係好傻，成日以取悅人哋而活，差啲連自己嘅真正心意都搞錯。」June發自心底感激我。
 
我見咁快就可以講掂June，心裡面有啲自豪，又有啲失落，雖然知道June對我嘅感情只係一時意氣用事，但係心底裡仍然有少少希望佢同我講話係真係鍾意我。
 


架車停落嚟後，June仲喺度不停多謝我，唔係發現自己唔係真鍾意我有咁開心呀？睇落現在嘅June又幾唔錯，唔單止瘦咗，性格都變好埋，以心理學嚟講，以前應該係佢受咗太多別人嘅冷嘲熱諷同嗇視目光，所以心理有啲扭曲，對人難免尖酸刻薄啲，而家今時唔同往日，身邊人對佢嘅態度就算未至於180度轉變，都起碼轉咗90度，心情好對人自然好。
 
經過今晚之後，June同我變咗世間罕見嘅異性好友，呢啲嘢我一直都以為做戲先有，現實係絕無可能發生嘅，估唔到咁都俾我遇到，而且June仲係我喺Waterloo嘅唯一朋友。
 
相處落嚟，我哋無所不談，雖然主要都係June同我分享佢啲熱烈追求者，但係我都有同佢講起Miss Lee嘅事，點解我唔同周穎佢哋講？我點敢同周穎講呀，俾佢知道我又發生呢啲複雜男女關係，盞佢亂諗嘢，至於Chloe呢，我都驚佢又搵Patrick出馬，邱雅琳好啲，但係佢太純，未必估到Miss Lee想點。
 
June雖然從良，以前畢竟係一個八…肥婆，對於女人間嘅事，總比我了解。
 
「我覺得Miss Lee係想先缷下你嘅心防，等你鬆懈落嚟先出手。」我哋friend咗後，都係June車我返屋企，呢段唔長唔短嘅車程，變成我哋討論男女關係嘅時間。
 
「我都係咁諗，但係佢乜都唔做，我又...」我欲言又止。
 
「你又有啲囉囉攣嚟？男仔本性都係花心。」June毫不留情潤我。
 
我冇介意，做friend就係咁先正：「又唔好咁講，我都係想快啲解決咗件事，乜事都唔發生係好嘅。」


 
「你係咪真係咁諗？定係你都有啲想發生少少事呀？」June繼續挖出我內心嘅不堪想法。
 
「如果Miss Cheung冇提過我，我真係會咁諗，而家仲邊敢吖，Miss Lee同Miss Cheung冇得比，永遠都係以Miss Cheung為先。」我老實回答。
 
「你識咁諗就最好，我就係怕你一時行差踏錯，先事先警告你，從你嘅語氣中，我聽得出Miss Cheung喺你心目中至高無上嘅地位，失去咗佢，你一定會後悔。」June語重心長咁話。
 
「我知㗎喇，係呢？最近你同Jonathan行得好埋喎，喺U撞親都見你同佢一齊，係咪好事近先？」我將話題轉去Miss Lee身上，自從變咗身，June一躍成為UW校花之一，不乏追求者之餘，甚至有得慢慢揀。
 
「Jonathan係幾好，不過份人幾悶，我覺得佢個friend Adrian funny啲。」June冇對我有任何隱瞞。
 
「轉得咁快，你之前唔係話Adrian口花花唔專一嘅咩。」我見過Adrian，矮矮地成日掛住講嘢，比起高大英俊嘅Jonathan𧶄咁啲喎。
 
「女仔就係鍾意呢啲壞男仔，你夠唔專一喇，咪一樣大把女。」June冷不防轉番去我身上。
 


我當堂冇聲出，講靚仔講家境我都唔及石克隆，周穎咪一樣揀咗我，咪住，點解我會將件事拉咗落石克隆度，唔通我始終都係放唔低佢同周穎以前嘅嘢？
 
再同June吹多一陣水就返到屋企，入番嚟Waterloo眨下眼就過咗兩個幾月，好快就到復活節假，之後就差唔多考試，我發現自己竟然有啲唔捨得漸漸熟落嘅June，呢個真係初識佢時從冇諗過有可能會發生嘅事。