自從同Miss喺一齊，我就忽然變得好受歡迎: 第245章 自我反省
今次離開Toronto返Waterloo，我冇搵石克隆或者Chloe車我返去，亦都冇自己揸車，而係選擇一個人坐長途巴，聖誕節假過得相當滿足，既有久違嘅Miss Cheung，亦同周穎經歷咗少有嘅起伏，唯一遺憾就係冇乜點陪Chloe同邱雅琳，或者復活節假要分番多啲時間俾佢哋，唔係就太過大細超。 嘗試下一個人在途上嘅原因係經過咗呢年幾、兩年嘅豐「性」生活，我發覺好少可以靜落嚟好好諗下自己嘅現況同將來，有種過得一日得一日嘅頹廢想法，趁住返Waterloo幾個鐘嘅車程，喺冇其他人打亂嘅情況下，係時候為將來稍作打算。 Miss Cheung臨走前嘅千叮萬囑仍然清楚記得，返到Waterloo第一件事就係儘快同Miss Lee撇清關係，印象中仲有幾個project要埋埋少少尾，之後就各不相欠，我唔知Miss Lee為咗同Miss Cheung鬥氣會去到幾盡，但係我知道自己對誘惑嘅抵抗力有幾低，本來我對Miss Lee就因為佢同Miss Cheung身份同氣質上嘅相近而有少少好感，佢再主動嘅話，我應該死咗九成。 如果唔係為咗Miss Cheung，對Miss Lee真係躍躍欲試，而家就唔同喇，萬一Miss Lee用番當年嗰招，影低罪證send俾Miss Cheung，到時就百口莫辯，加拿大同香港相差十幾個鐘機，即使Miss Cheung肯俾我氹我都唔知點去氹佢，等幾個月或者一年半載就乜都淡晒喇，分分鐘俾人乘虛而入溝走埋。 呢樣嘢真係諗起都打幾個冷震，絕對唔可以發生，難得身邊嘅女仔暫時都叫咗和平相處。喂，張子龍，夠開一枱麻雀仲想點，唔通真係要六國大封相或者措隊足球隊先安樂咩？ 讀完大學返香港搵Miss Cheung係一定，要周穎同邱雅琳一齊走亦唔係問題，始終香港先係佢哋嘅地方，屋企朋友都全部喺晒嗰邊，至於Chloe，佢咁有錢，去到邊都冇所謂，再唔係兩邊飛亦都難唔到佢，反而我一個返去，留低阿媽同阿妹喺加拿大就有啲過意唔去，仲有阿爸，係喎，都有一排冇探過佢，臨走都唔記得走轉醫院，死喇，咁不孝會唔會俾雷劈，下次出去拉晒啲女去介紹俾阿爸識先，講唔埋佢見個宅男仔咁受歡迎會開心到醒番。 望向車窗外嘅風景，感覺好唔真實同寂寞，平時有其他人喺身邊精神都集中咗喺佢哋身上，直至得番一個，先至可以將心思放番落自己度，喺遇到Miss Cheung之前，我從來沒試過感到呢刻嘅孤獨，就算屋企人全部移民晒剩番我一個，我仍可以活得自在，只係當重要嘅人越嚟越多，只要一靜落嚟，就會出奇地掛念，彷彿我已經再唔能夠享受一個人嘅樂趣。 我完全唔能夠想像，如果所有人離開晒，我仲可唔可以生存，為咗將佢哋留喺身邊，我一定要努力啲，成為一個值得被人珍惜、同埋懂得珍惜他人嘅人。 喺自我反省中，旅遊巴終於將我帶返Waterloo，再搭多半個鐘巴士返到租住嘅房仔，稍作執拾就梳洗上床瞓覺，聽日係新嘅學期，亦都係喺Waterloo嘅最後一個學期，留戀就冇乜，神奇地亦都冇喺度搞過啲咩出嚟，唔計大學啲點頭之交，比較有印象嘅女仔只有June同Miss Lee。 入番嚟就要開始番返學做兼職嘅日子，第一日上完堂就會去返兼職，成個聖誕假只出冇入，阿媽唔使我俾家用都要措下錢，喺呢個畢業可能就係失業嘅年代，咁多頭家要我養，公一份婆一份都養死我。 第二朝準時起身返學，Peter同義仔遲我一日開學，所以未起身，返到大學都係啲熟悉而陌生嘅面孔，讀同一科咪又係嗰啲人，不過我冇興趣同佢哋溝通啫，反正第一年又未使做group project住，我樂得做番個隱形人。 未落堂經已收到Miss Lee嘅多條message，叫我一有時間就過去搵佢，我估佢未至於第一日就出手，搵佢快手做埋之前啲手尾，之後就避之則吉。 落堂去到Miss Lee間房，佢睇落同平時冇乜分別，打扮都係嗰種長裇衫窄身裙，面上嘅表情分唔出喜怒哀樂，比起當日同Miss Cheung針鋒相對時嘅激烈變化，好似咩事都冇發生過咁。 「等咗成個聖誕假，你終於返嚟幫我手，大把嘢擺咗喺度等住你，快啲埋位喇。」Miss Lee指指另一邊枱面堆文件，微笑話。 我懷住滿惱子疑問開始做嘢，直到離開返工，Miss Lee都冇講過任何project以外嘅事，半點私人情感都冇流露，令我懷疑當日Miss Cheung同佢嘅吵吵鬧鬧只係我嘅幻覺。 雖然有啲失望，不過咁不失為一件好事，等我尋晚仲驚到發惡夢，怕自己瀨嘢添。 完咗Miss Lee呢面，就到June，如我所料，好耐冇喺舖頭出現過嘅June果然蒲番頭，老實講，佢家下個look係煞食嘅，淨係睇間舖頭喺我做咁耐都冇見過嘅坐無虛席就知咩事，仲要出面排咗條十幾人嘅長龍，中西老幼都有，一個個望住打扮性感嘅June流晒口水，講身材唔算太突出，但係著住背心短褲、有番幾分姿色嘅後生女，會有邊個男人唔鍾意？ 對於周圍嘅咸濕眼光，June似乎好享受，仲時不時走嚟廚房一副勝利者模樣向我示威，睇到雄叔同發哥搖晒頭，不過雄叔眼神中係帶有少少自豪嘅，同發哥嘅無奈唔同。 人客多咗要做嘅嘢自然亦多咗，我覺得以前June仲係肥婆嗰陣仲好，起碼唔使做到我咁辛苦，而且唔知點解我對變靚咗嘅June冇乜感覺，仲係會不時想起佢以前個肥樣，即刻咩興趣都冇晒。 好唔容易捱到放工，對於我成晚都對佢愛理不理嘅June嚟講，似乎係一個幾大嘅打擊，頭先見佢塊面越嚟越黑都知咩事，結果放工嗰陣June話要送我返屋企，叫咗發哥車雄叔走。 是福不是禍，是禍躱不過，喺離開Waterloo之前，除咗Miss Lee，同June之間嘅瓜葛似乎都要搞清楚。