自從同Miss喺一齊，我就忽然變得好受歡迎: 第234章 驚魂未定

「大家都到齊，我喺度宣佈party正式開始。」Chloe把聲忽然喺身後響起：「首先，我哋請今晚最有份量嘅人出嚟跳第一隻舞，有請Angel！」
 
歡呼聲同掌聲響起，人唔多，但係氣氛尚算熱鬧，我轉身望向舞台上面，唔知幾時Chloe已經帶住Miss Cheung上咗台。
 
Miss Cheung笑笑口望過嚟，向我伸出右手，舞我就唔識跳㗎喇，不過都唯有頂硬上，而且對住Miss Cheung於心有愧，我點敢拒絕伊人嘅邀請。
 
著住白色長裙晚裝嘅Miss Cheung好靚，跌膊低胸收腰下嘅佢艷絕全場，比起周穎嘅粉紅長裙、Chloe略嫌老成嘅蕾絲V領黑色晚裝、或者邱雅琳嘅黃色透花長裙都高出一線。
 
我上台接過Miss Cheung柔嫰嘅手，將佢拉埋身，用喺電視上學番嚟嘅笨拙技巧抱住Miss Cheung條腰起舞，喺周圍嘅人目光裡面我一定跳得好肉酸，相反Miss Cheung可能以前同富二代男友去得ball多，舞藝精湛過人，帶到我都好似識跳咁。
 


「對唔住呀，Miss，我之前冇講Joyce啲嘢俾你知。」我把握機會，先向Miss Cheung請罪。
 
「係囉，點解你唔講呢？我都話過你咩都可以做，但係要話我知㗎嘛！」Miss Cheung睇落似扮嬲多過真嬲。
 
「因為…我驚你嬲。」其實主要都唔係驚嬲，而係一開始冇講，到想講嘅時候就發現已經唔知點開口好。
 
「事後先俾我發現，你覺得我會嬲啲定冇咁嬲呢？」Miss Cheung一心二用，跳到出神入化都仍然可以教訓我。
 
「我知錯喇，下次發生咩都即刻話你知先。」我隨住Miss Cheung嘅舞步，漸漸跳到個形。
 


「知錯就好喇，遲啲再慢慢交代件事我知，今晚係我第一次喺外國地方同心愛嘅人過平安夜，你再唔開心番啲我就真係嬲喇。」Miss Cheung眼神閃爍，微笑望實我。
 
Miss Cheung呢個含情脈脈嘅樣真係好吸引，如果唔係有咁多人睇住，我真係想攬住Miss Cheung錫個飽。
 
跳咗十零分鐘後，Miss Cheung拍拍我膊頭：「好喇，你仲有咁多人要應付，我就同你跳到呢度先喇。」Miss Cheung講完放開手，退到台邊落番去。
 
我戇居居咁企喺台上，見Chloe喺度推周穎上台，就行去向周穎伸出手：「我可唔可以同你跳番隻舞？」
 
周穎本來唔想上台，見我邀請佢，就勉強伸手俾我拉上台。
 


「我哋都上台跳舞喇。」Chloe拉住邱雅琳上埋台。
 
其他人見狀，就各自各同partner上台跳舞，石克隆、王小富、小琪都有伴，阿妹同Betty本來都諗住上埋嚟，但係見Miss Cheung一個人喺台下休息，就過去陪佢傾偈。
 
「我唔係想專登唔講Joyce啲嘢俾你聽。」搞掂咗Miss Cheung，跟住就到周穎。
 
「我喺醫院嗰陣就知你哋有嘢喇，不過既然你唔講，我就冇問，費事搞到我成個小女人咁。」周穎冇Miss Cheung咁好聲氣。
 
「我同Joyce本來喺香港分咗手，但係後嚟佢山長水遠走到嚟加拿大搵我，我真係唔忍心再拒絕佢。」我用最短嘅說話講述我同邱雅琳嘅故事。
 
「我知吖，你心軟，個個都唔忍心拒絕吖嘛。」周穎鼓起泡腮，想甩開我隻手。
 
我當然唔會俾周穎走，呢個時候打死都捉實唔放：「阿穎，你唔好嬲喇。」
 
「唔嬲？以前喺香港都算，嚟到加拿大你仲係咁，你有咗我同Miss都唔夠，Chloe都算喇，嗰陣我未嚟加拿大，你一個人咁寂寞，而家又多個Joyce，你究竟要多幾多個先夠吖？」周穎從來冇試過咁話我，甚至冇表現過咁激動嘅情緒。


 
我望住淚水喺眼眶滾動嘅周穎，有一種將會失去佢嘅可怕感覺，手一震，竟然俾周穎𢫕甩咗其中一隻手，嚇到我即刻大力捉實佢另一隻手。
 
「係我唔啱，但係你唔好離開我，我唔可以冇咗你。」我將周穎擁入懷中，雙手緊緊攬實佢。
 
我唔知旁邊石克隆佢哋知唔知我同周穎嗌緊交，只見佢哋都喺好遠嘅台邊跳緊舞，似乎或多或少感受到我同周穎發出嘅強大氣場。
 
周穎喺我懷入面微微顫抖，應該喊緊，我輕拍周穎背脊，試圖安撫佢，當我同其他女仔一齊嘅時候，原來周穎心裡面一直唔好過，或者唔止周穎，每一個同我一齊嘅女仔都一樣，明知道鍾意嘅人抛低自己，去咗另一個人身邊，又點可能當冇事？
 
以為所有人都可以好似Miss Cheung咁，由得我喺出面玩真係好自私嘅想法，就算Miss Cheung亦有低線，當有一日跨過咗呢條線，我可能會連Miss Cheung都失去埋。
 
諗下都驚到打冷震嘅可怕念頭，令到我或多或少有番啲反省，冇錯，我已經得到太多，唔好好珍惜，到變得一無所有先後悔就太遲。
 
懷裡嘅顫抖慢慢平伏，我低頭時剛好迎上周穎仰高嘅俏臉，剛啱喊完嘅佢楚楚可憐，令到佢咁傷心嗰個簡直唔係人。
 


「對唔住，我頭先一時失控，而家冇事喇。」周穎嚟咗個一百八十度轉變，講咗番令我懷疑自己聽錯嘅說話。
 
「要講對唔住嘅應該係我至啱，如果我可以早啲同你交代清楚，就唔會搞成咁，你都係專登為咗我過嚟加拿大嘅，作為回報我俾你嘅只有傷心。」我深感後悔，如果我有啲定力，冇同Chloe一齊，就唔會發生後嚟撞番邱雅琳嘅事，亦都唔會去到而家咁地步。
 
「總之我冇嘢喇，難得今日係平安夜，Miss又喺度，我哋玩得開心啲，好冇？」周穎語氣平淡，冇咗激動，同時亦都冇咗感情。
 
今次我冇再捉得緊周穎，喺我未反應到嘅情況下，周穎離開我，落咗台。
 
當我想追上時，Chloe同邱雅琳攔咗喺我面前：「喂，男主角，終於輪到我哋喇啩。」
 
我見周穎行咗去Miss Cheung度，為咗唔想俾其他人知道頭先發生嘅事，只好暫時放低周穎。
 
呱呱叫嘅Chloe同含羞答答嘅邱雅琳好似對我講咗啲嘢，但係我冇留心聽，只係喺度擔心緊周穎。
 
我終於知道，原來喺我心目中，周穎係除咗Miss Cheung外最重要嘅人。