自從同Miss喺一齊，我就忽然變得好受歡迎: 第233章 聖誕party
同Miss Cheung過咗幾日只羡鴛鴦不羡仙嘅夫妻生活，令我覺得呢一年嘅等待絕對係值回票價，只要最後可以同Miss Cheung喺番一齊，就算再辛苦，要等再耐都係值得嘅。
快樂嘅時光總係過得特別快，今晚就係平安夜，亦都係同周穎約定好去Chloe屋企開party嘅日子。
Miss Cheung對於去聖誕party都好正面，仲話令佢諗番起以前讀書時嘅青葱歲月，當然我有話俾佢聽Chloe、石克隆同王小富都會去，到時仲會有好多其他年青人。
Party當日，我先同Miss Cheung去咗幾個環境優美嘅地方拍下拖，然後返屋企接埋周穎一齊過去，小琪同阿妹都會去，不過小琪有男朋友Ryan車，阿妹就跟咗石克隆哋。
周穎同Miss Cheung係首次喺加拿大見面，兩個女仔都好雀躍，一見面就雞啄唔斷係咁傾偈，完全冇我插口嘅份，只好做個好司機，我估平時周穎都會搵下Miss Cheung，不過應該唔多，而家就有種久別重逢嘅感覺。
唔使幾耐車就去到Chloe屋企，出乎意料嘅，Chloe今次所講嘅party，並唔係我以往去過嗰種萬人空巷，而係只得我哋成班熟人一齊開嘅私人派對。
當去到現埸，其他人都到齊晒，最唔熟嗰個就係小琪男友Ryan，但係都見過幾次，其他嘅就全部係熟人，分咗幾堆各據一方，石克隆同Amy、Betty、阿妹一堆，Chloe同小琪、Ryan一齊，王小富就同邱雅悅兩姊妹，而我就一拖二，身邊帶住周穎同Miss Cheung，成個大廳加埋十零人，負責招呼嘅工入仲多過賓客。
全場個樣最意外嘅就係我同Miss Cheung，其他人好似都一早知道呢個安排，人多人少本來我冇乜所謂，只不過咁少人，某啲事就會變得顯眼，呢個就係我嘅擔心。
「咦？Miss，你覺唔覺得王小富側邊嗰兩個女仔好眼熟，好似喺邊度見過。」果然周穎好快就有發現。
「係喎，拖住王小富嗰個應該係佢女朋友，另外嗰個女仔…呀！咪嗰次子龍住院時，間醫院個護士。」Miss Cheung諗咗諗就醒起邱雅琳嘅身份。
周穎同Miss Cheung同時用疑問眼神望向我，我一時反應唔嚟，只係反射性咁答：「係呀，嗰兩個女仔係姊妹嚟，拖住王小富嗰個係家姐，另一個瘦啲嘅係細妹，兩個都係嗰陣醫院啲護士。」
「咁啱喺加拿大都撞到嘅，原來王小富個女朋友係姑娘嚟，睇唔出佢咁叻仔。」周穎笑住同Miss Cheung講。
「我真係老喇，你哋個個都拍晒拖，諗起初入學讀中一嘅時候，只不過係一班稚氣未消嘅小朋友，子龍同石克隆成日幫王小富出頭，周圍同人打交，阿Wing你就日日嚟同我告佢哋狀。」Miss Cheung忽然感慨起嚟，冇諗過當年嘅小朋友會變咗佢男朋友。
「好似唔係好耐之前發生嘅事，嗰陣真係好傻。」周穎亦都俾Miss Cheung搞到緬懷起過去嚟。
我見周穎同Miss Cheung冇特別介意邱雅琳嘅存在，心裡面鬆咗口氣，唔係怕俾佢哋知道我同邱雅琳嘅關係，而係我一直隱瞞咗我哋之間嘅事，到今時今日至講番容易令人產生誤會，點解要隱瞞呢？
我哋三個不知不覺行咗去Chloe度：「Miss，呢個就係同你提起過嘅Chloe，亦都係今次party嘅主人家。」
「Hello！Miss，你當我係妹仔咁使得㗎喇，我呢啲做細嘅，乜都會睇你同Wing姐姐兩個頭。」Chloe扮晒乖咁向Miss Cheung請安。
Miss Cheung俾Chloe逗到笑咗出嚟：「你講嘢咁得意嘅，咩姐姐妹妹咁。」
「Miss你唔使太在意Chloe講嘅嘢，佢喺外國長大，成個鬼妹仔咁，好多時講嘢都會有啲奇奇怪怪，一時譯唔番做中文。」周穎喺側邊同Miss Cheung解釋，趁機摸下Chloe個頭，真係當佢係妹妹咁。
「係嘅，阿Wing姐姐講得啱，我乜都唔識，有咩做得唔啱Miss你一定要提點我。」Chloe繼續扮晒乖。
「你叫我Angel得喇，唔好再叫Miss，叫到我老晒。」Miss Cheung對Chloe印象唔差，好快就同佢熟咗，呢件都係值得興幸嘅事。
「係嘅，Miss…Angel姐姐。」Chloe畢恭畢敬咁話。
喺旁邊挨住Ryan嘅小琪，掩住咀喺男朋友耳仔邊唔知講咩，引到Ryan想笑又唔敢笑，個忍笑樣好灰諧。
「Angel姐姐，我介紹埋另一位姊妹俾你識吖。」Chloe突然講咗句嚇我一跳嘅說話：「Joyce，你過一過嚟吖。」
見到Chloe擪手嘅邱雅琳點點頭行過嚟，然後好有禮貌咁向周穎同Miss Cheung打招呼：「兩位姐姐，我係Joyce。」
喺呢個咁嘅時候，我唔敢望周穎或者Miss Cheung，雖然我覺得佢哋係望緊我。
「喂，克仔，上次你咪話有嘢搵我傾嘅。」我選擇好冇用咁逃離現場。
「點呀，你個樣咁驚嘅。」石克隆見我忽然一臉惶恐咁走過去，微笑問我。
「克仔，你過一過嚟。」我冇理會石克隆身邊幾個女仔嘅詢問眼神，搭住石克隆膊頭行埋一邊，然後將邱雅琳單嘢講咗俾佢聽。
「吓？你未將Joyce同你嘅嘢講俾Miss同周穎聽㗎咩？你又話佢哋唔介意，溝親女都會同佢哋講嘅。」石克隆清楚原委後奇問。
「係就係咁講，但係你知我咁濫…即係如果單單都講，我唔知佢哋兩個幾時會頂唔順，冇辦法唔講嗰啲就話啫，Joyce本來分咗手冇諗住會見番，所以就冇特別提起，到喺加拿大喺番埋一齊，又發覺講出嚟會牽涉到以前喺香港隱瞞嘅過去，咁咪…拖住先。」講講下我都覺得自己幾唔啱。
「唉！呢啲嘢我都幫你唔到，最多暫時扮住同你傾偈轉移視線。」石克隆表現無奈。
「佢哋係咪仲講緊我呀？」我冇望番去Miss Cheung嗰邊，叫石克隆幫我𥄫下。
「一邊傾一邊望過嚟，應該係講緊你啩。」石克隆一臉同情咁望住我。
「坦白從寬，拒抗從嚴」，唯有一陣搵個機會，向周穎同Miss Cheung坦白番成件事喇。