自從同Miss喺一齊，我就忽然變得好受歡迎: 第235章 不能說的秘密
由於心情影響，餘下落嚟嘅party我大部份時間都心不在焉，有幾次想去搵周穎好好傾下，都被佢刻意避開，或者喺佢氣上心頭嘅呢刻，同佢講咩都冇用。
Miss Cheung反而冇乜嘢，好似真係唔介意邱雅琳嘅事，但係有咗周穎嘅反應，令我知道無論邊一個，都有觸到底線而爆發嘅機會，如果我再自以為是咁諗住所有人都會包容我嘅一切過失，終有一日會失去身邊一切。
雖然我哋人唔多，但係全部都係熟人，所以個個都玩得好盡興，即使我同周穎，表面上都展現出愉快神情，只係心裡面諗緊乜，就唔係其他人可以知道。
Party維持到過咗凌晨十二點，踏入聖誕節後約個零鐘先結束，Chloe因為飲大咗，由邱雅琳護送住返房休息，王小富同邱雅悅都跟埋去，而缺少呢個主導全場嘅主人家後，氣氛好快就冷却落嚟。
「我要走先喇。」石克隆同我講：「Amy話唔可以太夜返屋企。」
「咁我哋都走，Miss飲咗幾杯酒有啲攰，周穎又…」我見Miss Cheung挨住周穎閉目養神，好似好攰咁。
「你車Miss返酒店先，我跟石克隆車走，唔使你專登兜我。」周穎將Miss Cheung交俾我，起身想同石克隆走。
「唔得，我車得你嚟，梗係要車番你走。」我仲諗住趁一陣嘅車程好好氹番周穎。
「唔使喇，你睇Miss幾眼瞓，你快啲車佢返酒店先喇。」周穎一口拒絕。
本來我仲想講多幾句，但係見周穎個樣好堅決，夾硬嚟可能會令佢更加反感，唯有先等佢下咗啖氣。
Miss Cheung上咗車後就一直瞓，到我放佢上床都冇醒過，我幫Miss Cheung換好睡袍，用濕毛巾稍為抺咗下臉，就準備除衫去沖涼。
「你唔使去氹番阿Wing咩？」我以為已經熟睡嘅Miss Cheung忽然話。
唔知幾時，Miss Cheung挨住枕頭坐咗起身，睡眼惺忪咁望住我。
「咦？Miss你幾時醒咗㗎。」我唔係唔想去搵周穎，只係唔想抌低醉醉地嘅Miss Cheung。
「你幫我抺臉嘅時候就醒咗喇，只係懶得掹大眼，你仲沖涼，去氹番人哋先喇。」Miss Cheung見我猶豫不決咁，就再開聲催促。
「但係Miss你好似唔係幾舒服。」Miss Cheung塊臉紅撲撲，發燒咁款。
「我只係有少少酒氣攻心，抖陣充個涼就冇事。」Miss Cheung露出笑容：「阿Wing見到Joyce之後就悶悶不樂咁，梗係有啲嘢放唔低，你趁早去解決件事，唔使佢亂諗嘢。」
我坐去Miss Cheung身邊：「Miss，其實你係咪真係唔介意Chloe同Joyce嘅事？喺我心目中，你同阿Wing係最重要，就算要我放棄晒其他人都冇所謂。」
Miss Cheung聽我咁講，拍拍我個頭：「Miss知你對我好，但係同唔同一個人一齊係重大決定，唔應該俾第三者影響，如果唔係對當事人就好唔公平。」
「咁即係點呀？」我唔係太明Miss Cheung嘅意思。
「即係你唔使擔心Miss，去氹番阿Wing先喇。」Miss Cheung微笑錫咗我一啖。
雖然唔係百份百明Miss Cheung嘅諗法，但係佢嗰方面似乎暫時唔使擔心，咁剩番落嚟就係周穎嗰邊：「咁我出一出去就返。」
「唔使急，你都陪咗我咁多日，今晚就放你一晚假，你聽朝先返嚟煮早餐俾我食就得。」Miss Cheung補充：「Miss力紀大，呢幾晚好似將全年嘅運動濃縮起嚟一次過做晒咁，你都要俾我抖番晚。」
我點點頭，用力攬咗Miss Cheung一下先起身離開。
因為心急趕返屋企，又驚周穎瞓咗，大半個鐘嘅車程我廿零分鐘就踩完，返到去見屋企仲著住燈，即係佢哋仲未瞓。
入到屋第一個見到嘅係阿妹，佢有啲意外咁話：「阿哥你做咩返咗嚟，你唔使陪Miss咩？」
「冇，有啲嘢想搵阿Wing，佢瞓咗未呀？」我急急地咁問阿妹。
「阿Wing未返呀，佢話唔想返屋企住，叫石克隆車咗佢去兜風。」阿妹簡單嘅幾句說話，卻令到我個心沉咗一沉。
同石克隆去咗兜風？一直潛藏喺我心底，最唔想諗起嘅擔心剎那湧現。
「哦，咁…咁我走圥。」我冇理阿妹接下嚟嘅說話，就怱怱走番上車。
啱啱撻著車，我就發現根本唔知可以去邊度搵石克隆同周穎，攞電話出嚟想打俾佢哋，又怕佢哋唔聽或者扮唔係喺一齊。
最後我就望住個電話，呆呆咁坐喺架車度等咗個幾鐘，然後先終於等到石克隆架車喺眼前出現。
呢個幾鐘對我嚟講好似過咗成個世紀咁長，我差啲以為自己變咗做「望妻石」，喺呢段時間我諗咗好多唔好嘅嘢，甚至已經作出咗最壞嘅打算。
周穎打開車門落車，好快就發現停喺車道外嘅我，回頭同車裡面嘅石克隆講咗幾句，就走過嚟上咗我車。
「你喺度做咩呀？我仲未嬲完你㗎喎。」周穎語氣雖然唔多友善，但係已經變番平時嘅佢，而唔係頭先喺party度嗰種冷冰冰冇表情嘅可怕模樣。
「你仲嬲緊咩？但係你個樣好似冇乜嘢咁嘅。」我壓抑住心裡面波濤翻湧嘅情緒，保持平靜咁話。
「冇乜嘢？你就想喇，今次你隱瞞我呢單嘢，我遲啲先慢慢同你算賬。」周穎咬牙切齒咁話：「Miss點呀？好番啲未呀？」
儘管周穎講嘅說話仲係毫不留情，但係明顯心情已經回復，喺呢個時候只要我扮下死狗，件事應該就可以解決。
但係我偏偏冇咁做，反而講出咗啲絕對唔應該講嘅說話：「算賬？咁你隱瞞我嘅事，到時係咪又可以一齊算埋呀？」
聽出我語氣中嘅不善，周穎有啲奇怪咁問：「我有咩隱瞞你呀？」
「你同石克隆啲嘢囉，佢一次又一次救你，同你之間究竟發生過咩事，你又打算隱瞞到幾時？」我將心裡面一直隱藏嘅不安悉數爆發咗出嚟。
周穎目瞪口呆咁望住我，明顯冇諗過我會忽然攞佢同石克隆以前嘅嘢嚟講，本來恢復番正常嘅眼神，漸漸轉回冰冷。
周穎用比頭先喺party更冷漠無情嘅語氣話：「你以為我同石克隆之間發生過咩呀？」