自從同Miss喺一齊，我就忽然變得好受歡迎: 第221章 最壞嘅打算
我同邱雅琳再攬多陣，錫多幾下後就離開天台，邱雅琳仲返緊工，幾唔捨得都唯有暫時分開，雖然我知道邱雅琳唔會再避開我，但係保險起見都問佢攞咗電話號碼，晏少少我就要返Waterloo，再見都唔知係幾時，剛啱重逢梗係想黐耐啲，不過個天似乎另有安排。
返番病房搵Chloe，只見佢好精神咁喺度玩緊手機，一啲都唔似要住院。
見到我Chloe即刻滿臉笑容：「點呀？見番前女友係咪好開心呀？」
其實我哋已經算喺番埋一齊，唔叫前任喇：「你快啲好番我仲開心喇。」
「你唔使咁好口，你見我個樣似嬲你咩？只係你都係時候詳細講清楚你哋嘅事俾我聽。」Chloe睇唔出有丁點不滿，似乎真係冇介意我同邱雅琳嘅事。
事到如今，我都冇再對Chloe隱瞞，將同邱雅琳嘅事從頭講咗一次，由王小富點我代替佢去見網友開始，到今日正式喺番埋一齊，原來我同邱雅琳之間嘅事即使未算曲折離奇，但係都夠寫番本愛情小說。
Chloe一直細心聆聽，由面露微笑到暗暗落淚，彷彿同我身同感受咁共同經歷多一次呢段唔算太長嘅愛情路。
講完後我靜咗落嚟冇出聲，Chloe唔知係咪太過投入，一時望住天花板發呆，為邱雅琳而流嘅兩行淚水仍然留喺臉上未乾。
天花板有咩咁好望呢？我循住Chloe嘅視線望向白色嘅天花，竟然見到盞燈旁邊有啲污漬，似乎係發霉喎，有冇搞錯呀，醫院唔係應該好乾淨㗎咩。
「邱姑娘咁遠走嚟搵你，呢段時間得一個人一定好孤獨好難過，既然你打算同番佢一齊，就要好好對佢。」Chloe喺我鬧緊醫院嘅時候忽然話。
「當然喇，不過你唔介意咩？」我望番Chloe，佢亦都咁啱同時望向我。
「你咁多女，個個都介意我咪好唔得閒。」Chloe講嘅說話同佢個認真樣完全唔夾。
個個好似你咁諗，好容易縱壞我㗎喎：「邱雅琳嘅事我冇諗過會發展成咁，不過嚟到呢個地步，我又唔忍心再拒絕佢。」
「你已經拒絕過佢一次，既然接受番佢就要好好地對佢，男仔係咁花心，睇我阿爸嗰幾十頭住家就知喇。」Chloe一副大徹大悟嘅樣。
我對Chloe另眼相看，原來喺感情上面，佢比我成熟得多，不管喺個人經驗定係從身邊人身上學到嘅，都比我多好多：「幾十頭住家咁誇張？我一定唔會，有你哋幾個我已經心滿意足。」
「你而家梗係可以咁講，到你處於我阿爸嘅環境下，就算你唔想，都會有無數你拒絕唔到嘅誘惑出現。」Chloe充滿不信咁講。
我想開口反對，只係就算以今時今日嘅身世，不斷出現喺面前嘅女仔，我都未曾拒絕過。
「明喇，你係咪趕住返Waterloo，我過幾日就出院，到時再去搵你，你唔使喺度陪我喇。」Chloe見我冇出聲，就有啲唔耐煩咁話。
我諗Chloe阿爸俾佢嘅印象真係好差，令到佢對男人或多或少有啲偏見同失望，而我嘅表現又確實未達標。
接受唔等如認同，Chloe明白我接受番邱雅琳嘅原因，唔代表佢鍾意多個姊妹。
「對唔住，喺你病緊嘅時候，仲令到你唔開心。」我真心同Chloe道歉。
Chloe抬頭望向我，眼神複雜咁嘆咗口氣：「雖然我知道個個男仔都係咁，以前啲男友唔好話一腳踏兩船，就算只係少少變心我都即刻飛咗佢，但係對住你…唉！我都唔知點解覺得只要分到你一點點嘅愛，已經好心滿意足，只要你對我好，即使你仲對無數其他女仔好都無所謂，我似乎開始明白我阿媽嘅心思。」
呢個問題我唔識答喎，整定啩：「我對你哋幾個都一樣，個個都咁鍾意，無論失去你哋邊一個，我都會永遠後悔。」其實係有分別嘅，喺我心裡面，Miss Cheung永遠排第一，周穎第二，Chloe同邱雅琳並排第三，但係冇咗任何一個都唔得就係事實。
我上前低頭錫咗迷惘嘅Chloe一啖，將佢個頭攬落個肚度，冇法喇，心口俾邱雅琳喊濕晒，唯有用住個肚先，而且坐喺床度嘅Chloe個頭嘅位置啱啱喺呢個高度。
Chloe攬實我條腰，將頭埋喺我個肚度，從肚上面微濕嘅感應，佢應該又係喊緊，俾女仔喊到成件衫濕晒，我都真係幾差，好彩今日著件衫係黑色，唔係咁樣兩笪濕晒都幾覺眼。
到Chloe離開我個肚嗰陣，臉上已經恢復平時嘅從容笑容：「好喇，你真係要走喇，頭先我講嘅嘢你當睇戲咁睇完就算，唔好擺喺心裡面。」
「唔係，我今次真係明，我唔會再令你哋失望。」咦？呢句說話我好似對唔同人講過無數次，係咪唔應該再講住呢？
「話唔定係我令你失望呢，將來嘅事冇人知嘅。」Chloe語不驚人誓不休咁話，的確，喺愛情路上，係冇永遠嘅贏或者輸家，當你以為自己穩操勝算嘅一刻，可能正墮入對方嘅設計中。
懷著忐忑不安嘅心情離開醫院，我俾Chloe最後嗰幾句話搞到有啲心緒不寧，喺香港嘅Miss Cheung、Toronto讀緊書嘅周穎、甚至剛重遇嘅邱雅琳同住緊院嘅Chloe，除咗表面上俾我見到嘅佢哋，背後仲有幾多嘢係我唔知嘅呢？
呢啲就係「以小人之心，度君子之腹」，我自己做得唔好，竟然仲夠膽死去懷疑其他人，不過我都係稍為諗諗，咁感性嘅嘢都係唔啱我，見一步行一步適合我多啲。
最壞情況，都係打回原形，變番以前嘅宅男，淨係呢段時間發生喺我身上嘅豐富經歷，已經夠我回味一生。