自從同Miss喺一齊，我就忽然變得好受歡迎: 第220章 不確定嘅未來
不過喺呢一刻，我都係決定暫時放低心中嘅疑問，出去追番邱雅琳先：「我一陣再返嚟搵你。」
「你係返嚟至好講喎。」Chloe向我扮咗個鬼臉。
我對Chloe肯定咁點點頭，先轉身出房搵邱雅琳。
今次邱雅琳只係剛啱離開，我稍為尋找已經見到佢喺走廊轉角嘅身影。
我快步追上去，一轉彎就同唔知咩原因往回走嘅邱雅琳撞個滿懷。
「哎，sorry。」未知撞到嗰個係我嘅邱雅琳，剛開口道歉就發現真相，又轉身想走。
我伸手將邱雅琳拉番埋身，略微用力咁攬住佢：「你唔好再走喇。」
本來仲想爭扎嘅邱雅琳，聽到我咁講之後靜咗落嚟，低頭冇望我，由得我攬實佢。
我鬆出右手托起邱雅琳個頭，有啲唔人道咁迫佢望向我，只見佢雙目緊閉唔敢望我，但係就有兩道淚水喺眼角流出，分唔清係因為開心定傷心而流淚。
呢個樣真係好惹人憐愛，我忍唔住低頭錫落邱雅琳雙眼、鼻尖、咀唇。
雙唇接上後傳嚟久違嘅深刻感應，同一樣嘅親吻，錫落唔同女仔嘅時候總會有些許差異，而邱雅琳帶俾我嘅，就係最純真嘅初戀感覺。
邱雅琳個身微微顫抖，對於我嘅索吻並冇太大嘅反抗，我同邱雅琳沉浸喺咀上嘅親密接觸，彷彿忘記咗我哋仲企緊喺醫院嘅走廊度。
直到邱雅琳輕力拍打我心口，我先至張番開眼，發現周圍或遠或近都企咗唔少人，個個不約而同用怪異目光注射著我同邱雅琳。
「你跟我嚟。」邱雅琳拖住我隻手，領頭帶我往大堂走去，然後搭電梯上咗天台，今日天氣幾好，有陽光但係唔太熱，天台幾張長櫈上疏落地坐咗幾個病人，邱雅琳帶我去其中一張冇人嘅長櫈坐低。
坐低後嘅邱雅琳已經回復平常，只係塊臉有少少紅，本來佢想縮開仲拖住我嘅手，但係發現俾我牢牢捉實後，就放棄咗呢個多餘嘅想法。
微風吹起邱雅琳柔順嘅長髮，身穿白色護士服嘅佢有種仙女下凡般嘅脫俗氣質，當初如果唔係因為要嚟加拿大讀書，我都未必會同佢分開，而家既然邱雅琳嚟埋加拿大，我哋係咪又可以再喺埋一齊呢？
「你嚟加拿大做咩唔搵我？」諗咗好耐，我結果選擇用呢個疑問打開話題。
邱雅琳搖搖頭：「其實我嚟加拿大就係唔捨得你，但係嚟到之後我又唔敢搵你，我驚你會唔啋我、或者趕我走。」
吓？冇可能喇，你咁遠走到嚟，就算我真係唔再鍾意你，都唔會忍心唔理你，更何況我仲係好在意邱雅琳：「其實我同你分開後，一直都有成日諗起你，我同你分手唔係因為唔想同你一齊，而係因為我身邊已經有太多其他人，我唔想你為咗我浪費青春。」之前已經有周穎同Miss Cheung，而家仲多咗個Chloe。
「我唔介意，我從來都冇介意過。」邱雅琳眼神堅定咁望實我。
咁點呢？我係咪應該同番邱雅琳一齊呢？周穎同Miss Cheung雖然唔係太清楚邱雅琳嘅事，但係相信知道後都會接受，或者可能嘅話唔對佢哋講住，Chloe 更係好似冇乜所謂，不過如果我再同番邱雅琳一齊，我就唔可以再令佢傷心，我一個人，又係咪可以應付到咁多條女呢？
邱雅琳見我露出猶豫神色，眼神一暗，呢下表情真係令到我個心好似俾人用針拮咗一下咁痛，我當下抛開腦裡面紛亂嘅思緒，伸手將邱雅琳一擁入懷：「對唔住，我唔係唔想同你一齊，我只係覺得令到你太過委屈，我已經唔係一個唔完全嘅人，我俾唔到全份嘅愛你。」
「你當日話我可以搵到更好嘅人，但係我覺得我真係搵唔到，因為同你分開嘅呢段時間，我發覺自己個心根本容納唔到第二個，我可唔可以問多次當日嗰個問題？」邱雅琳將頭埋喺我心口，用微顫嘅聲音話。
我當然知道邱雅琳想問咩，當日我冇答，但係今日佢再問，我已經有確實嘅答案：「可以，你想問咩都可以。」
「我搵唔到比你更好嘅人，我可唔可以搵番你呀？」邱雅琳抬頭，滿臉淚水咁問我。
「可以，一定可以。」我用手不停抺去邱雅琳臉上嘅淚水。
邱雅琳聽到我嘅答覆後，更加失控地喊起上嚟，女人真係水造嘅，抺到我成手成袖濕晒都未喊完。或者喺我哋分開嘅呢幾個月，邱雅琳實在壓仰得太過厲害，一個女仔，走到一個陌生嘅外國地方追逐心愛嘅人，嚟到後，偏偏又驚會更加失望而唔敢主動聯絡對方，嗰種難受同孤獨，對一個弱質女子嚟講實在係太沉重。
直到邱雅琳安靜落嚟後，我先拍拍佢個頭：「傻女，咁大個人仲喊到成個細路仔咁，人哋唔知仲以為我對你做咗啲咩好過份嘅嘢。」
邱雅琳渲洩完情緒後，整個人明顯放鬆咗好多，聽我咁講即時反抗：「你係呀，你唔單止諗住抛低我喺香港唔理，如果唔係我嚟搵你，你仲一定唔會再搵我添呀。」
咁又未必，有時悶悶地可能都會想搵下你，不過呢啲咁渣男嘅說話諗下都覺得自己好衰：「我唔係唔想搵你，我係唔想害咗你。」
「你冇害我，只要可以同你一齊，你想我點、對我點都唔重要。」邱雅琳再次將頭埋番落我俾佢喊到濕晒嘅心口。
唉！難得我可以狠心放過一個好女仔，點解個天又要我再次傷害佢呢，係咪我個人唔夠堅定，其實應該再狠心啲拒絕多邱雅琳一次呢？望住邱雅琳楚楚可憐、清麗脫俗嘅靚樣，邊有男人可以拒絕佢㗎。
諗落我都係要加倍努力讀書，如果唔係將來點養咁多條女，雖然點睇佢哋都唔似要我養，仲可以倒轉養到我肥肥白白。