自從同Miss喺一齊，我就忽然變得好受歡迎: 第222章 邱雅琳到訪
打俾石克隆後，佢十分鐘唔使就過到嚟接我，如果冇石克隆呢個好朋友喺加拿大，所有嘢都會變得幾麻煩，諗起我仲成日覺得佢同周穎唔知有咩秘密咁，真係好衰。
出於歉意，我成程車同石克隆傾咗好多嘢，有以前嘅事，亦有現在嘅嘢，兩個男仔講講下就不自覺講咗去女仔身上，我發覺石克隆真係好專一，認定咗Amy係女朋友後就乜都以佢為先，好似一生只會愛一個人咁，相比起我呢啲見一個扑一個嘅，真係有啲無地自容。
「我唔似你可以同時應付咁多人，鍾意一個人要付出嘅心力實在太多。」石克隆好感慨咁話。
我唔知石克隆係讚緊我定串緊我，我甚至唔知自己係咪根本冇乜點付出過：「我諗比起佢哋，我付出嘅一定冇佢哋咁多。」
「呢啲咪係你嘅福氣囉，全校最靚嘅Miss俾你追咗，校花又對你死心塌地，連閱人無數嘅有錢女都馴服埋，而家仲話有個護士仔由香港追到你嚟加拿大，你都唔知幾生修嚟咁高嘅道行。」石克隆語氣豪爽咁講，雖然講到我艷福無邊，但係佢又唔見得有幾羡慕。
「其實專一都幾好吖，起碼唔使成日驚佢哋有日反目成仇，到時都唔知點算。」我諗起要同周穎、Miss Cheung交代邱雅琳單嘢，就有啲頭痛。
「有得煩總好過冇得煩，有咁耐風流，就要付出番少少代價喇。」石克隆露出招牌笑容：「等我初頭仲以為你好似當年咁毒，專登帶你去見識下。」
講起Rio，嗰次真係難忘嘅美好回憶，仲間接完咗我少時候嘅AV夢：「係呢，你而家仲有冇去玩。」
「而家冇喇，以前一個人就話間中要發洩下啫，有咗女朋友仲去啲咁嘅地方，俾Amy知道咪傷心死。」石克隆真係一個好男人。
你講到咁，想叫你帶我去充實下人生都唔得喇：「不如王小富聖誕嚟嗰陣帶佢去見識下。」
「王小富條友咁細膽，你又話佢有咗個咁有份量嘅女朋友，佢敢去咩？」石克隆果然清楚王小富，冇錯，我都認為佢唔會敢去，就算冇女友都未必敢去。
有時唔好話女仔傾起偈上嚟雞啄唔斷，我同石克隆兩個麻甩佬一樣傾到落車都未講完，如果唔係考慮到石克隆仲要揸成個鐘車出番Toronto，我都想叫佢去附近coffee shop坐低傾多陣。
又係一個星期嘅開始，今個星期除咗返學，仲有好多電話要打，Miss Cheung、周穎、Chloe、邱雅琳，逐個打去傾十五分鐘都要成個鐘，時間越嚟越接近考試，我一邊忙於溫習，一邊忙於應付幾個女仔。
第二個星期，一日我放學返屋企時，竟然喺屋外面見到Chloe架車停咗喺度，尋晚佢明明話仲未出得院，原來只係想俾個驚喜我。
我同司機位嘅保鑣大佬打咗個招呼，就去打開後座嘅門，點知坐喺車入面嘅唔係Chloe，而係仲著住護士服嘅邱雅琳。
見到我一臉意外，邱雅琳鼓起泡腮：「你係咪好失望呀？」
「梗係唔係喇，只係有啲意外，你嚟探我做咩唔預早通知我，等我咁晏先返。」同邱雅琳復合後都未有機會好好相處，我點會失望。
「咁你上車先吖，Chloe話幫我哋搵咗個地方。」邱雅琳笑番，有啲怕醜咁叫我上車。
一定係去開嗰間motel喇，Chloe都算唔話得，唔止唔介意邱雅琳嘅事，仲幫我哋安排好晒。
入到房，我冇好急色咁即刻對邱雅琳施暴，而係拖佢坐上床談下心先，原來邱雅琳今日入嚟唔係一早預定好嘅，而係臨時嘅決定。
Chloe下星期就可以出院，到時佢就會第一時間入嚟見我，喺佢未出院嘅呢個星期，佢就「好有心」咁拜託邱雅琳嚟探我，自從上次見完佢哋兩個之後，我一直都想搵機會再見下，只係呢排比較忙，一出一入又費時，我總唔能夠下下叫石克隆車出車入。
聽到Chloe終於可以出院，我都好欣慰，話晒佢入院都唔可以話完全唔關我事，而亦因為佢今次出事，令到我明白下下淨係掛住自己舒服係唔啱嘅，啲女嘅健康同感受都要兼顧埋。
呢個亦係我冇即時同邱雅琳搞嘢嘅原因，雖然我心裡面好想，身體上亦都明顯因為隔咗個幾星期清修生活而蠢蠢欲動。
邱雅琳將頭挨喺我左邊膊頭，雙手捉住我右手喺掌心無意識咁畫圈，我左手環抱邱雅琳略為單薄嘅左肩，鼻裡面貪婪地呼吸自佢身上透出嘅淡淡香氣。
暴風雨嘅前夕總喺出奇地寧靜，我同邱雅琳都好珍惜呢段短暫嘅溫馨時刻，因為大家都知道做完之後就係分別一刻，雖然好快又可以再見。
我忽然諗起一個問題：「你而家喺邊度住？」
「我喺downtown附近租咗間房，好近返工嘅醫院。」邱雅琳被我突然問起有啲意外，但係都好快答到。
Downtown環境麻麻，始終人流多，品流複雜，於是我提議：「我屋企樓下仲有一間房，如果你想可以搬過嚟住。」
邱雅琳搖搖頭：「我聽Chloe講你女朋友都係住喺你屋企，搬去你度梗係好，將來又可以有多啲機會見面，但係你女朋友可能唔鍾意。」
咁又係，而且我仲未同周穎交代，不過我更唔想邱雅琳住喺啲龍蛇混雜嘅地方，萬一有咩事，我一定會終生後悔：「你唔使替我擔心，你嘅事遲早都要同我女朋友講，最緊要係你嘅人生安全。」
「你對我好我知，只不過我覺得而家未係搬去你度嘅最佳時機，等遲啲我同你女朋友熟啲先再講。」邱雅琳事事為我著想，令我由衷地感動：「而且你唔使擔心我嘅住屋問題，因為Chloe話出院後請我去做佢私家看護，我會搬去同佢住。」
Chloe講得出做得到，居然真係請咗邱雅琳做看護。