自從同Miss喺一齊，我就忽然變得好受歡迎: 第219章 Chloe與邱雅琳
等架車上咗highway，穩定落嚟我先不經意咁問石克隆：「尋晚周穎好鍾意你幫我預備俾佢嘅生日禮物同蛋糕，真係唔該晒，係呢，我總共要俾番幾多錢你？」
「小數目啫，你唔使俾番我，最緊要啱使又幫到你。」石克隆無可無不可咁講。
「唔得，蛋糕都算，條鍊點睇都唔平。」買已經假手於人，錢都唔俾咁點算係我送。
「咁又唔係喎，個蛋糕計落仲貴啲。」石克隆笑住話。
咁又係，如果太貴周穎可能反而唔鍾意，始終我唔係手頭鬆動嘅人：「咁你隨意收番少少都得啩，唔係第日俾周穎發現我錢都冇出過實嬲死。」
石克隆今次終於認同：「你又啱，咁你俾番兩百鈫我喇。」
我覺得石克隆一定唔會收我十足，兩百鈫對我嚟講都只係一個星期part time：「咁我而家俾埋你。」我從銀包攞錢出嚟，擺入前面個車頭櫃度：「今次當我爭你一個人情。」
「兩兄弟唔使講呢啲。」石克隆一貫豪爽咁答。
本來我仲想問下石克隆點解會知周穎鍾意啲咩，又點解可以咁短時間買到，但係我又唔肯定自己係咪想知道真相，又或者石克隆嘅解釋我又可唔可以接受，喺咁多唔確定下，架車又好快到咗醫院，所以我結果都冇問出口。
正如我始終都冇問清楚周穎同石克隆以前嘅事一樣。
我冇要石克隆好似上次咁喺醫院門口等我，因為預計都會留比較耐時間，石克隆話佢會返大學溫下書，叫我走嗰陣再call佢。
入病房嗰陣Chloe喺度睇緊電視，我嚟之前已經通知過佢，所以佢都冇太意外，而係用滿臉笑容嚟迎接我。
「你呢兩日點呀？」我兩手空空咁行去床邊，低頭錫咗Chloe額頭一下，我發現自己都幾粗心大意，周穎生日冇賣禮物都可以話事前唔知，嚟探Chloe都冇買下生果或者花真係有啲離譜。
之前探阿爸都係得兩疏蕉，事關阿爸仲昏迷緊，而阿媽又會預備必需品，搞到我對呢類人情世故冇晒警覺。
Chloe冇介意我乜都冇買，好開心咁仰頭同我親吻，著住病人衫嘅Chloe散發著另一種誘人嘅病態美，錫錫下就想有進一步行動，不過呢度始終係公眾地方，幾難忍都要忍住唔伸手入領口尋幽探秘。
相反Chloe就開放得多，打咗陣茄輪就用手隔住褲摸脹起嘅細佬，咁樣我就有啲尷尬，有啲驚咁縮後，讓細佬脫離Chloe嘅魔掌。
「你做咩縮呀，你唔鍾意我摸你咩？」Chloe天真爛漫咁問。
「唔係，不過呢度咁多人出出入入，俾人見到就唔好喇。」我口不對心咁講，其實唔係驚俾人見到，而係驚俾某人見到啫。
「你都會怕醜嘅咩？定係你驚俾邱姑娘見到咋？」Chloe一語中的，直接擊中我死穴。
「吓？咩邱姑娘呀，你講早兩日見到嗰個姑娘？都係㗎，佢個樣咁純品，見到我哋喺度親熱就唔好喇。」我儘力掩飾同邱雅琳嘅關係，雖然我有預感終有一日會俾Chloe知道一切。
「你唔使扮嘢喇，邱姑娘已經講晒你哋啲嘢俾我聽。」Chloe突然成塊臉黑晒，識咗佢咁耐，都從未見過佢個樣咁嬲，照計Chloe都冇必要嬲呀，我同邱雅琳都分咗手，我更加係最近先知邱雅琳專登飛咗嚟加拿大搵我。
我有啲手足無措，一時唔知點同Chloe解釋好，只係掹大個口得個窿咁望住佢。
「做咩唔出聲呀？唔敢講嘢呀？我話你知，我已經趕走咗邱姑娘，你唔會再有機會見到佢㗎喇。」Chloe眼神凶狠咁望住我，即使未完全康復，都好有中氣咁講。
我望住同認識中完全變咗一個人嘅Chloe，首次覺得自己玩大咗，未同Chloe一齊之前我已經知道佢呢啲有錢女唔簡單，相處後睇佢對付Judy同June嘅手法更加有「侍君如伴虎」嘅感覺，死喇，Chloe以後會唔會對周穎或者Miss Cheung下手㗎！
喺Chloe仲勁睥住我嘅時候，背後傳嚟邱雅琳溫柔嘅聲音：「點呀，今日有冇好啲呀？」
喺前一刻仲想殺咗我咁嘅Chloe，即時回復以往鬼靈精怪嘅表情，用充滿愉快嘅聲音答：「好好多喇，多得邱姑娘你咁悉心嘅照顧，我覺得我隨時都可以出院。」
「唔得，醫生話起碼要觀察多一個禮拜，你將來都想生BB㗎？如果唔check清楚，萬一有咩後遺症，第時後悔就太遲喇。」邱雅琳說話間經過我身邊，全程當我透明，其實佢咁刻意扮唔識我，反而令其他人更加懷疑。
果然Chloe掃咗我哋兩眼，就一副「你仲話你哋兩個冇嘢」表情。
喺頭先嘅短短幾分鐘，我知道已經唔覺意露咗饀，俾Chloe擢到，淨係睇我聽到佢話邱雅琳講晒我哋啲嘢出嚟、同邱雅琳俾佢趕走嗰陣個失望樣，都知我哋絕對有嘢喇。
我有啲後悔自己畢竟經驗淺，根本鬥唔過Chloe呢啲情場鬼見愁，而家我梗係知道邱雅琳不單冇爆我哋啲嘢出嚟，Chloe亦都冇趕邱雅琳走。
「但係我男朋友想我早啲出院陪佢喎，你睇下佢個樣幾可憐，不如你幫我囈下醫生，等我可以早啲出院。」Chloe幾句說話，就令到刻意唔望我嘅邱雅琳不得不轉頭望向我。
我望向邱雅琳略帶霧氣嘅雙眼，有啲百感交集，呢兩日我時不時都會忽然諗起佢，即使同周穎一齊都控制唔到，甚至搞嘢嗰陣都泛起佢個樣。
邱雅琳只係望咗我一眼，就有啲無法抑壓咁擰歪臉：「咁我幫你問下醫生，睇下可唔可以早啲出院。」講完就怱怱經我身邊衝咗出房。
Chloe對完全掌控全場嘅自己好滿意，微笑望向我：「你仲唔追？唔係又好似上次咁俾邱姑娘走咗去喇。」
我望住好似完全唔介意我同邱雅琳過往嘅Chloe，真係唔知佢究竟想點？