自從同Miss喺一齊，我就忽然變得好受歡迎: 第213章 王小富嘅驚喜消息
同周穎一個月見一次係接受咗嘅事實，反而Chloe開始個個星期嚟搵我，而家因為不知名理由唔見咗影，著實令我有啲唔慣，話開學後努力讀書啫，咁喺Waterloo孤伶伶冇人冇物，梗係想間中見下活潑開朗嘅Chloe。
上落堂望見人來人往嘅時候，腦裡面就會泛起上次喺UT見到周穎俾人前呼後擁嘅景象，仲有嗰個Stephen同其他男同學，相信佢哋一有機會就會想辦法埋周穎身，除咗用傾電話同Whatsapp嚟維繫感情，就要靠石克隆幫手隔走呢啲狂蜂浪蝶。
因為只打算留一年，所以我冇乜意慾同班上嘅人混熟，事實上我本身都係一個幾摺嘅人，大學第一年讀啲科又唔使做group project，我樂得自由自在，只係有時會悶少少。
同屋嘅Peter成日借意問起Chloe啲嘢，感覺好似對Chloe有啲意思咁，我梗係冇啋佢喇，Chloe最近搞緊乜連我都唔知，知都唔會講俾你聽，對上幾次見Peter望Chloe嘅眼神，就知佢有啲嘢，唉！點解我啲女咁受歡迎，仲有喺香港嘅Miss Cheung，都唔知俾幾多新舊阿Sir溝緊。
以前喺香港好多唔同女仔喺身邊，日日新鮮反而冇諗咁多嘢，而家叫做生性咗，就要日日擔心啲女俾其他人撩，真係有咁耐風流就有咁耐折墜，仲要入咗嚟Waterloo見唔到佢哋。
至於肥婆June就仍然失踪，連喺大學都唔覺眼見到佢，而家唔止珍姐，雄哥有時都會同發哥吹噓自己個女近排fit咗又靚咗，唔通佢fit到連我撞到都唔認得，咁又真係好想見識下喎。
助教Miss Lee自從上次俾我意外撞破影咗相後，冇再喺落堂時叫我幫佢攞嘢返房，睇嚟嗰張相有啲用，令到Dr Malcolm唔敢再搞佢，望住身材出眾嘅Miss Lee，我就自然會諗起Miss Cheung，上次同Miss Cheung聯絡嗰陣佢confirm咗聖誕節會過嚟探我，呢個係平淡生活中比較令我驚喜嘅消息。
另一個消息有啲突然，係由王小富度得嚟嘅，上星期佢突然打俾我。
「我同阿悅聖誕節會去加拿大旅行，到時順便探埋你同Joyce吖。」聽到王小富叫邱雅悅時嘅親暱語氣我有啲毛管戙，但係Joyce？我印象中只係識得一個人叫Joyce，但係佢應該喺香港。
「Joyce？你講邊個Joyce呀？」我心裡面有啲不安，又有啲興奮，借意問清楚王小富。
「你唔好扮嘢喇，我同你都識又叫Joyce嘅咪得嗰一個，阿悅個細妹邱雅琳呀，人哋專登同你一齊過去加拿大，你唔係同我講你飛咗佢呀。」王小富講嘅果然係邱雅琳，但係我同邱雅琳喺香港嗰陣已經分咗手，而且更加唔知佢嚟咗加拿大。
「富仔，係你想問我嘢之前，你先詳細話俾我聽，邱雅琳係幾時同點解過咗嚟加拿大㗎？」我少有認真咁問王小富。
感受到我語氣裡面嘅凝重，王小富都聽話暫時冇問長問短：「喺你走咗冇耐，Joyce就同阿悅講，話喺加拿大搵咗份工，可以過去陪你讀書，初初阿悅都有啲反對，唔放心Joyce一個女仔獨自去外國生活，但係Joyce話你會照顧佢，阿悅見Joyce咁堅持，知道勸佢都冇用，就由得佢去搵你，但係聽你嘅語氣，你好似對呢件事一無所知。」
「邱雅琳有冇同你哋講我哋...而家係咩關係。」我本來想講「分咗手」，但係話到口邊，又發現有啲唔對路，王小富同邱雅悅好似都唔知我哋之間嘅事。
「你哋咩關係？咪男女朋友囉，你唔係同我講你哋分咗手呀？如果係Joyce就唔會專登去加拿大搵你喇。」王小富笑問。
既然邱雅琳冇將我哋分手嘅事話俾邱雅悅知，仲一個人走咗嚟加拿大，咁我都唔應該喺呢刻講件事出嚟，起碼要搞清楚邱雅琳現時嘅情況先：「你有冇邱雅琳加拿大嘅聯絡電話，我有啲嘢想搵佢。」
「吓？你連Joyce個電話號碼都冇？究竟你哋搞咩㗎，Joyce去加拿大冇搵過你咩？」王小富發覺越講越唔對路，反過嚟問番我。
「遲啲先同你解釋，你俾咗邱雅琳個電話我先。」我有啲急燥咁講。
「我冇Joyce電話呀，你真係要我就幫你問阿悅。」咁又係，王小富點會有邱雅琳電話，就算要聯絡都係經邱雅悅喇，況且佢邊敢自己聯絡人哋個靚女細妹。
「咁你有冇辦法係唔俾邱雅悅知嘅情況下，幫我攞到邱雅琳個電話號碼？」王小富都算，如果邱雅悅知道我同邱雅琳嘅事，唔知會有咩反應。
「冇辦法。」王小富好老實咁答，以前都覺得佢冇鬼用，同咗邱雅悅一齊之後，更加覺得佢成個小男人咁。
「咁算喇，我自己再諗辦法，我哋今日嘅對話你暫時唔好同邱雅悅講住，費事佢亂諗嘢，等你哋過嚟加拿大時，我先再同你哋講清楚。」我放棄同王小富糾纏，決定自己諗辦法搵邱雅琳。
「咁都得嘅。」王小富勉為其難咁講，冇再追問落去，王小富有做二五仔嘅前科，我對佢會唔會擺我哋嘅友情喺愛情之上呢點，係好有保留嘅，萬一佢講晒啲嘢俾邱雅悅聽，我都冇辦法。
我試下打咗邱雅琳以前喺香港個電話號碼，結果直接駁咗去留言信箱，我冇留言，因為唔知啲留言會唔會係邱雅悅幫佢聽。
唔好話加拿大，就算喺香港，要搵一個人都唔係咁容易，邱雅琳似乎對邱雅悅隱瞞咗我哋分開嘅事，仲追到嚟加拿大搵我，但係唔知咩原因，嚟到後又冇話俾我知，我冇佢聯絡資料啫，但係有留過自己嘅電話同電郵俾佢，我哋係和平分手，邱雅琳又係好女仔，做唔成情侶都仲可以做朋友。
聖誕節Miss Cheung會過嚟，而家連王小富同邱雅悅都過埋嚟，令到一個本來愉快嘅聖誕節假期，變得有啲複雜。