自從同Miss喺一齊，我就忽然變得好受歡迎: 第214章 再遇故人
「你冇事吖嘛？我哋好耐冇見喇。」同Chloe都差唔多成個月冇見，聽日又係出Toronto同周穎嘅每月一聚：「不如我今次出嚟搵個時間去你屋企搵你吖。」
「今個星期都仲未得呀，要隔多一、兩個星期先得。」Chloe把聲聽落有啲有氣無力，好似病緊咁。
「其實你係咪病咗呀？我去探你吖。」我有啲擔心，Chloe唔係有絕症啩？
「我唔係病，不過都差唔多，你等我好番再慢慢同你講，我唔想要你擔心。」咩叫唔係病又差唔多呢？唔通係啲婦科病？
「真係探你都唔得？」我盡最後努力問多次，雖然我覺得Chloe都係唔會應承。
「我唔想你見到我而家個樣，你等多陣，我哋好快就可以再見面。」難得Chloe咁堅持，我都唯有接受。
起碼知道咗Chloe唔係因為感情上嘅問題而唔見我，只係身體上唔知出咗咩事，唔係病又病咗咁。
可能亂諗得太多，瞓覺嗰陣發夢Chloe同我講話佢有咗，我仲問佢點會呀，你唔係做足安全措施㗎咩？嚇到我大半夜一身冷汗醒咗，發現係噩夢先冇咁驚。不過諗深一層，呢個夢又唔係完全冇可能，唔通Chloe真係有咗，所以要處理好先再搵我？唔會去咗醫院落仔啩？
我第一時間想打俾Chloe問清楚，但係諗諗下又好似有啲戇居，結果都係放番低手機冇打到，或者我想像力太過豐富啫，Chloe如果有咗應該唔會粒聲唔出就走去落咗我哋個B嘅。
第二日上完堂又係石克隆入嚟接我走，我忽然諗起石克隆同Chloe都係有錢人，Chloe嘅事石克隆會唔會收到啲風呢：「克仔，你知唔知Chloe最近發生咗咩事？我已經成個月冇見過佢。」
「Chloe？佢入咗醫院做手術吖嘛，點去搵你呀，你冇去探佢咩。」石克隆竟然真係知情。
「吓？做咩手術呀？」我驚訝問。
「宮外孕吖嘛，都唔係第一次，之前都聽講佢試過，Chloe阿爸都傻嘅，個女咁細個就要佢戴子宮環，試多幾次第時就真係想生都難。」石克隆有啲唏噓咁話。
之後石克隆仲講咗啲咩我唔係好記得，因為上咗網search宮外孕嘅資料，原來宮外孕真係有機會係用咗子宮環嘅後果，簡單講就係你唔俾個阿B喺子宮裡面著床受孕，咁萬一受咗孕就必定係喺子宮外，發現及時嘅話，危險性其實唔高，做手術割咗個胚胎就冇事，不過如石克隆所講，呢啲始終係入侵性手術，仲會刺激到子宮，有過宮外孕嘅女仔唔單止好容易再發生，仲會影響第時拕唔拕到B。
當然呢方面唔可以全部怪晒Chloe阿爸，冇人叫你成日做嗰陣唔戴套啫，戴咗咪唔會宮外孕囉，咁個問題就嚟到我身上，邊個叫我咁鍾意中出啫，為咗自己舒服，就搞到啲女仔唔係戴環就食避孕藥同事後丸，食藥食得多都唔好喇，其實我係咪應該以後戴番套，做個負責任嘅男人呢！
「其實你平時同Amy做嗰陣有冇戴套㗎？」我咁問其實係想拉石克隆落水，如果佢同我一樣冇戴，咁我心裡面嘅罪疚感應該會少啲。
剛啱紅綠燈停車，石克隆用奇怪嘅目光望咗我一陣，然後一臉正氣凛然咁同我講：「喺結婚前，我係唔會同Amy發生性行為，結咗婚之後，都只會為咗生B先做，所以係唔會戴套嘅。」
嘩！有冇咁正義呀，喺呢個思想咁開放嘅外國環境下長大，竟然講得出唔認同婚前性行為呢種說話，我覺得Amy真係冇揀錯。
出到Toronto，周穎同Amy照舊仲未落堂，於是我問石克隆：「你知唔知Chloe住邊間醫院？呢兩日我想去探下佢。」Chloe唔想我探佢一件事，我身為男友，知道佢入咗院都唔探就講唔過去。
「就喺downtown附近之嘛，離UT仲好近。」石克隆話：「你想探嘅話我可以而家車一車你過去，探完返嚟仲趕得切接周穎放學。」
「有咁近？咁麻煩你車一車我過去，轉頭先再嚟接周穎。」我即刻話。
石克隆點點頭，五分鐘都唔使就去到醫院，呢間係位於多倫多市中心嘅全科醫院，入去一問就問到Chloe嘅病房號碼，懷住忐忑不安嘅心情，我搭𨋢上去相關病房樓層。
𨋢門打開，我好快就搵到Chloe間房，呢間係一間獨立病房，我伸手敲咗幾下，房裡面冇傳出任何回應，於是我就輕力扭開房門。
雖然Chloe咁有錢，但係呢間並唔係咩豪華病房，兩百多呎嘅房裡面除咗病床同床邊嘅儀器，就只有一張三座位梳化擺咗喺床尾對開位置。
我行近床邊，Chloe睇落瞓得好腍，略顯蒼白嘅臉上雙眉微縐，望落有種大病初癒嘅感覺，我不嬲都鍾意Chloe呢個冇化妝嘅清純樣，只係而家加多咗少少病容，憔悴得嚟更加令人心生憐愛。
唔知點解望住瞓喺床上面嘅Chloe，我忽然覺得好內疚，就算知道佢做完手術後應該冇咩事，仍然有種雙眼發熱，好似要同佢永遠分開嘅悲傷情緒湧上心頭。
我攝手攝腳行近Chloe，坐喺床邊輕輕捉起佢柔軟嘅手掌，Chloe手心好溫暖，呢隻手我拖過無數次，但係從未有一次好似今次咁唔想放開。
就算我再輕力，呢下動作都驚醒咗熟睡嘅Chloe，Chloe慢慢張開眼睛，眼神迷惘咁望過嚟，同我眼神接觸嘅一刻，即時有啲大反應咁睜開雙眼，嚇咗一大跳：「Wesley，點解你會喺度嘅？」
「因為我太掛住你囉。」我俯身上前按下想掙扎坐起嘅Chloe，輕吻咗佢乾澀嘅咀唇一下：「你唔好起身，同我乖乖地瞓喺度休息。」
「咦？你終於俾你男朋友嚟探你喇。」身後傳嚟一把熟悉嘅聲音，我即使唔回頭，都已經認出聲音嘅主人。
不過我仍然擰轉頭，望向身穿護士服，以為唔會再有機會見面嘅邱雅琳！