自從同Miss喺一齊，我就忽然變得好受歡迎: 第九十八章 大瀑布之旅
喺行駛途中阿妹同Betty傾偈傾得好開心，反而我哋後排就好靜，周穎都曾經試過搵Amy傾偈，但係可能因為之前喺圖書館嘅事，Amy只係用「係」、「唔係」嚟作答，搞到周穎都幾冇癮，就冇再理佢。
周穎挨住我，睇睇下風景就瞓著咗，沿路大部分時間都只係得啲樹木，望住無盡嘅高速公路，我都恰著咗幾次。
車程本身要兩個鐘，但係中途某啲路段因上班時間而塞咗陣車，去到目的地都成11點。
首先當然去睇下聞名世界嘅大瀑布，喺壯觀嘅大自然環境下，我呢啲成日淨係識扑嘢嘅宅男顯得極其渺小，其實經過最近呢個幾月時間，我覺得自己已經進化咗少少，變成一個受歡迎嘅宅男。
風景係幾宏偉，但係睇嚟睇去咪只不過係啲水由高處流落低處，再沖入安大略湖，啲巨大聲響係幾震撼人心，不過就只係咁，周穎照舊表現興奮，周圍同我合照，阿妹就同Betty、Amy佢哋玩自拍，可能夠空曠，令人不禁心曠神怡，Amy都冇咁揦口揦面，有番少少微笑。
除開唔小心睇到佢少少胸，其實我當時只係喺度睇下教科書，擺得喺圖書館有幾咸吖，都唔知Amy喺咩環境長大，思想咁守舊，如果俾佢知道我平時同周穎嘅「日常」生活，咪連車都唔肯同我哋一齊坐。
瀑布叫做睇過，呢度話晒係遊客區，附近都有好多手信同特色舖頭，阿妹提議先食晏，然後就各隨喜好四圍行下，差唔多午飯時間，個個都肚餓，於是搵咗間裝潢充滿地道色彩嘅餐廳坐低。
待應俾咗張長方形枱我哋，四個女仔分坐兩邊，阿妹同Betty對坐，周穎同Amy對坐，而我就梗係坐主席位，即係周穎同Amy側邊。
Amy個樣係就係有啲唔滿意，不過出得嚟玩，成日繃緊塊面都好攰，所以頭先行完瀑布之後，表情已經放鬆咗啲。
「你成日揦埋塊面，唔驚好快有縐紋咩？」我見Amy鬆懈落嚟，忍唔住串下佢。
可能估唔到我會主動同佢講嘢，Amy先係有啲愕然：「你…關你咩事呀。」
「咁又唔關，我幾驚你話關我事呀。」我笑笑，轉向周穎：「阿Wing就唔同，成日滿臉笑容，咁先可以永保年輕。」
周穎笑得好甜咁望住我：「你唔好蝦人哋喇。」
「咪係，Amy係品學兼優生，嚟加拿大前喺星加坡留過學，無論普通話定英文都超流利，你啲英文咁屎，應該叫Amy幫你補下習。」阿妹當然幫番佢個friend嘅家姐。
「咦？我蝦佢咩？我好心俾啲建議佢咋喎。」同埋Amy越唔理我，我就好犯賤咁越想撩下佢。
「唔係吖，阿哥講下笑啫。」Betty個人唔止斯文，講嘢仲幾中肯，係外表唔太sharp，又冇遺傳竹筍波。
Amy啤咗我一眼，改變話題：「不如叫嘢食先。」
唔使煩就梗係叫lunch set，周穎起初驚食唔晒，諗住同其他女仔share，但係阿妹佢哋話啲嘢一般都好細碟，所以各自叫，結果我同周穎講話幫佢包底，佢先唔太願意咁叫咗個意粉餐。
啲嘢真係好細碟，或者應該話個碟就大，份量就好小，我唔知其他人飽唔飽，我就好似冇食過咁，考慮到價錢又唔係平，我冇再叫多份。一陣出去逛嘅時候實有好多小食買，如果有上次喺downtown啲熱狗車就仲正。
出餐廳後我哋分開兩批行，我同周穎去行附近商舖，阿妹哋就繼續參觀周圍啲景點，聽講仲話要去搭嗰啲載人近距離睇瀑布嘅小遊輪。
周穎話想買手信，於是我就同佢逛啲手信舖，都唔明點解去親呢啲舖頭都係得啲鎖匙扣同書鎮之類嘅老土手信，仲要大大隻字「Niagara Falls」咁印晒上去，驚死人唔知你到此一遊咁，計我話，落去瀑布裝樽水或者執舊石咪仲有紀念價值。
我將自覺有噱頭嘅諗法話俾周穎聽，周穎諗咗諗：「不過水同石頭證明唔到係呢度嘅嘢喎。」
吓？「咁喺上面寫番「Niagara Falls」咪得囉。」我懶幽默咁講。
「咁好啲。」周穎認真回應。
咁好咩？「不如都係買番鎖匙扣喇。」我作出明智嘅決定。
出咗商舖，仲有啲好似展覽館嘅娛樂設施，最不可思議嘅，就係呢度都有間「信不信由你」，睇落同山頂嗰間冇乜分別。
另外有一樣商舖比較多，就係鬼屋，唔知點解有成三間，望落就幾流，但係經過嗰陣會聽到裡面傳出嘅超級驚叫聲，叫到真係撞鬼咁，嚇到周穎都即刻捉一捉實我，所以話人嚇人真係會嚇死人。
「咦？你哋都有興趣玩鬼屋呀？」一把聲忽然喺側邊響起。
望向聲音發出處，見係阿妹佢哋，「咁啱經過之嘛。」我諗周穎頭先行過都俾人嚇親，唔會想玩啩。
「咁你哋玩唔玩呀？Betty同Amy話未玩過，諗住呢度應該唔會好驚，所以想試下。」原來係Betty同Amy想玩。
我正想拒絕，周穎已經話：「好呀，咁一齊玩吖。」
「你唔驚咩？」我有啲意外，仲以為周穎唔敢玩。
「驚㗎，以前不嬲都唔敢玩，咁但係而家有你喺度吖嘛，有你就唔驚。」周穎理直氣壯咁講。
「咁去買飛喇。」阿妹興緻勃勃咁話，Betty都好興奮，Amy個樣就有少少淆底，但係都扮晒鎮定。
買完飛去排隊，人唔算太多，不過為咗營造氣氛，每次只係放幾個人入去，我哋一行五人，自然係五個一齊入。
入口係一對裝飾殘舊，有啲老土嘅大門，阿妹同Betty擺明就係嗰啲膽生毛嘅唔識死後生女，一推門就衝咗入去，唔知大笑定大叫咁唔見咗人。
我推開門，裡面黑漆漆乜都睇唔到，只係喺頭頂高處有盞微弱紅燈引路，周穎話唔驚，但係見咁環境都當堂箍實我隻手，我望向被阿妹同Betty好冇義氣咁留低嘅Amy：「不如我哋一齊行喇。」
「好呀。」Amy個樣明顯唔想入去，但係又好倔強咁扮無嘢。
「我拖埋你吖。」周穎向Amy伸出友誼之手。
Amy點點頭，伸出手拖住周穎，於是我帶頭，周穎喺中間，Amy喺最後，一行三人進入漆黑一片嘅鬼屋。