自從同Miss喺一齊，我就忽然變得好受歡迎: 第九十七章 再遇
瞓瞓下突然扎醒咗，或者係因為記掛住要煮飯嘅緣故，望向鐘發現只不過係四點幾，仲有足夠時間預備晚餐。
我小心翼翼起身，周穎瞓得好腍，冇俾我嘈醒，我幫佢𢫏好被，輕手輕腳行出房。
首先沖咗個涼，然後再去廚房煮飯，我唔係特別鍾意煮嘢食，不過叫做有少少天份，淨係靠睇書同上網都學得一手冧女廚藝，阿媽同阿妹都係女，對我嚟講絕對唔成問題。
牛扒同魚都只係調咗少少味，以保留本身鮮味為主，蔬菜就更簡單，只要食材夠新鮮，唔煮都已經好好食，不過為顯功架，我都有焗咗啲西蘭花，其他菜就整沙律。
做好晒準備，等阿媽同阿妹返到我就正式開始煎，阿妹比阿媽早咗半個鐘返，一返嚟就走去搞周穎，我聽到周穎嘅驚呼聲同阿妹嘅笑聲，有啲擔心周穎會怪我冇叫醒佢，等佢俾阿妹睇晒全相，不過阿妹啫，既係女仔又唔係外人，都冇乜所謂。
阿媽返到見唔使煮飯好開心，走咗去換衫梳洗等食飯，我煮好晒啲餸就叫佢哋出嚟，阿妹撓住周穎有講有笑，阿媽就微笑跟喺佢哋後面，阿妹以前成日話想有個家姐，而家睇落佢當正周穎呢位未來阿嫂係相關對象。
「阿龍，你啲廚藝進步咗好多喎，呢幾年成日煮俾人食呀？」阿媽試咗啲餸，講出咁嘅結論。
幾年就冇，最近幾星期就確係成日煮俾啲女食：「我煮俾自己食啫，邊有咁多人賞面食我啲餸呀。」
「我又唔信你齋煮俾自己食都可以有咁大進步，而且你實有煮過俾阿Wing食。」阿妹插咀。
「咁梗係有喇，阿Wing咩身份呀。」雖然唔算多，但係周穎都有食過幾次，評價仲唔錯。
「係呀，阿龍煮咩都好食。」周穎跟阿媽叫我做阿龍。
「煮咩都得？有冇咁勁呀，阿Wing你成日幫住阿哥，我以後改口叫你做大嫂㗎。」阿妹講笑咁講。
周穎聽到即刻笑到見牙唔見眼，我又唔抗拒嘅，阿媽加埋把口：「係就好囉，我哋可以做一家人，阿Wing你咁乖，一定可以管好阿龍。」邊方面先？某啲方面越管越大反抗㗎喎。
晚飯喺愉快氣氛中渡過，四個人有講有笑，話題圍繞住結咗婚之後生幾多個小朋友同搬唔搬出去住，周穎乜都冇意見，淨係話我鍾意就得。
食完飯阿媽第一個走咗去休息，阿媽年紀都唔細，阿爸出事後都係靠佢揹起頭家，唔止表面上要返多啲工，心理上都好大壓力。
阿妹同我哋吹多咗陣學校啲嘢就話要早啲瞓：「聽日去Niagara Falls，車程要成兩個鐘，我要養足精神揸長途車，你哋今晚都唔好「搞到」咁夜。」
周穎意會阿妹話裡意思，臉紅紅唔敢答話，我當然唔會尷尬：「成個晏晝咁多時間咩都搞完喇，我年紀大，今晚唔搞喇。」
「你咁咸濕，我又唔信你會唔搞，況且你有冇問過阿Wing有冇需要先？」阿妹對呢方面好有興趣。
「你搞掂你自己先喇，係喎，你聽日會唔會帶埋條仔去，費事你阻住我哋拍拖。」我反攻番阿妹。
「唔好講呢啲衰嘢，條死仔上星期俾我發現走去溝我個friend，俾我飛咗喇。」阿妹一啲唔開心都冇咁講：「講起我都唔記得話俾你哋聽，聽日我會帶個friend同佢家姐一齊去，佢哋嚟加拿大成年幾，都未去過Niagara Falls，橫掂有位，所以順便帶埋佢哋去，你哋唔介意呵？」
「唔介意，多啲人熱鬧啲都好。」我口裏面話阿妹阻住我哋，其實完全冇咁諗，都係諗住一班年青人好玩啲。我望向周穎，佢都點頭表示贊同。
執拾好廚房我哋就去刷牙瞓覺，周穎坐上床後冇即刻瞓低，表情好趣怪咁問：「今晚真係唔搞呀？」
我微笑反問：「今日耕田咁攰，晏晝又搞過，我諗住你要抖下咋。」
「我唔使抖呀，你想要嘅話，我好似尋晚咁幫你吖。」周穎講係咁講，但係個樣都唔係咁在狀態。
「傻女，你估我真係精力過盛，或者上親床唔搞就瞓唔著嗰啲人咩。」我摸下周穎個頭，然後示意佢同我一齊瞓低。
周穎一臉不可思議咁望住我，好似真係咁諗我咁。
我俾周穎搞到唔知好嬲定好笑：「我哋早啲瞓，聽朝有時間先晨運。」我錫咗周穎一啖，然後攬佢入懷。
周穎點點頭，錫番我之後就將頭埋落我胸口，唔夠五分鐘就發出規律嘅輕微鼾聲。
「乜我真係成日要搞嘢嘅咩？」我一邊自我反省，一邊喺反省中瞓著埋。
第二朝我哋係俾阿妹敲門叫醒嘅，佢冇直接衝入嚟，應該係驚見到我哋兩個唔知喺度做緊乜。
尋晚瞓得好好，好到今朝趕唔切晨運，周穎雖然俾人嘈醒，但係都應該有幾好嘅睡眠質素，兩隻美麗嘅大眼睛充滿神采。
因為趕住出門口，我哋只係求其食咗啲麵包，諗住去到Niagara Falls再食晏。
阿妹揸車，我同周穎就坐後排，雖然係阿妹，但係基於禮貌，本來我係應該坐前面，唔係就好似當咗佢係司機咁，不過阿妹話俾佢個friend坐前面都得，我留喺後排陪周穎就可以。
阿妹個friend唔係住得好遠，十零分鐘車程就到，行出嚟嘅係個著T恤牛仔褲，外表普通嘅短髮女仔，身型好高，應該比我仲高少少，跟喺佢後面嘅係衣著同佢差唔多，但係樣貌標青好多嘅...shit，呢個咪竹筍波！
阿妹好熱情咁同佢個friend打招呼，佢個friend雖然唔算靚女，但係勝在笑容親切，俾人一種好舒服同愉快嘅觀感，至於阿friend家姐，就用好鄙視嘅眼神望住我。
「呢位係我阿哥張子龍，N年前有個英文名叫Wesley，而家唔知仲有冇用，隔離嗰位靚女係佢女朋友Wing。」阿妹竟然仲記得我當年因為睇衛斯理覺得型而自改嘅英文名：「呢位係Betty，隔離係佢家姐Amy，Betty同我識咗唔係好耐，但係已經升級咗做Best friend。」
我哋四個互相打招呼，Betty表現友善，Amy就除咗對我有啲敵視外，對其他人都好有禮貌。
「不如你哋跟我叫阿哥算喇，Wesley個名咁娘。」阿妹一邊開車一邊提議。
「好呀，阿哥，多多指教。」Betty坐咗去前面，Amy就坐後右排，周穎坐中間。
「唔係呀，Wesley個名都幾好聽，又少人叫。」周穎雖然唔係講得好大聲，但係喺車廂呢啲密閉空間都冇人聽唔到。
「阿哥叫Richard你都話好聽㗎喇。」阿妹笑周穎。
周穎笑笑口冇答，表情分明就係同意阿妹所講。
而家係早上8點，我哋一男四女開始向Niagara Falls進發。