自從同Miss喺一齊，我就忽然變得好受歡迎: 第九十九章 鬼屋行

因為太黑，基本上咩都睇唔到，我一手拖住周穎，一手摸黑前行，人類本能對黑暗心存畏懼，我本身唔算大膽，但係拖住周穎，令我有一種挺身而出嘅責任感，個人都大膽咗。

行咗幾步就忽然覺得條頸俾人好似呵氣咁吹咗一下，不其然起晒雞皮，為免嚇親周穎同Amy，我忍住口冇叫出聲，點知忽然聽到周穎「嘩！」一聲大嗌，雙手同時捉實我隻左手。

「有啲嘢舔我隻手。」周穎口震震咁話。

「嘩！」後面傳嚟Amy嘅叫聲，相信情況應該同周穎差唔多。

既然周穎雙手捉實我，咁Amy應該冇人拖：「Amy，你喺邊？我伸隻手俾你拖住。」我伸出右手向後摸索，等咗一陣先接觸到Amy冰冷嘅手掌。



Amy隻手同周穎一樣柔若無骨，始終大家都係花樣年華，原本我只係想拖住佢，但係突然Amy又大叫一聲，撲過嚟好似周穎咁捉實我隻右手。

本來我都唔係咁覺，俾Amy捉住之後，先feel到佢將我隻手夾咗喺佢對竹筍波中間，同樣情況亦喺俾周穎捉住嘅手上面出現，周穎就冇所謂，Amy始終唔太熟，所以我隻手唔敢亂郁，
之前佢都對我有少少誤會，費事以為我乘機搏懵。

我喺前面帶頭行，兩隻手都分別俾人向後扯住，唯有用腳探路，除咗黑猛猛同間中打燈彈出嚟夾硬嚇人嘅道具公仔，再冇咩發生喺我身上，反而周穎一時就話俾人捉住隻腳，一時就話俾人喺後頸吹氣，雖然Amy冇出聲，但係從佢驚叫嘅頻率，相信佢嘅情況都同周穎差唔得幾多。

集中嚇兩個女仔都啱嘅，性價比高好多，佢哋叫到咁大聲，出面啲人聽到一定以為好好玩，免費幫間鬼屋賣廣告。

我俾兩個女仔用對波係咁磨隻手，尤其對堅挺嘅竹筍波好有感，搞到我玩鬼屋都玩到扯晒旗，我都算正人君子，冇乘機抽下Amy水。



感覺行咗大概十零分鐘，出面開始見到微光，應該係出口位置，行近先發現係一間著咗黃燈嘅房間，長時間處於黑暗，啲光有少少刺眼，嚟到呢度Amy即刻放開我隻手，塊面唔知係驚定怕羞，變到紅晒。

我上前正準備打開出口嘅門，對門忽然俾人毫無預兆咁打開，嚇到周穎匿咗去我身後，而Amy就成個撲咗落我度，我冇俾開門嘅人嚇到，反而俾Amy咁撲過嚟頂到，成對竹筍波頂落心口，其實就唔痛嘅，仲幾舒服，而且扯起咗嘅細佬都幫我報咗仇，隔住褲頂咗Amy下面一下。

開門入嚟嘅係阿妹同Betty，專登整蠱我哋，見嚇到周穎同Amy，好開心咁指住我哋大笑。

「對唔住。」Amy同我講，我唔知佢為咩要道歉，可能因為覺得自己有啲失態。

「唔緊要。」我答，感覺上賺多過蝕，係俾人搞到扯起晒又冇得出火有少少遺憾。



離開鬼屋，阿妹好有興緻咁話要去玩埋其他鬼屋，我見周穎同Amy成副驚魂未定嘅樣，就叫佢兩個自己去玩，搵咗間Cafe同兩個女仔坐低等。

我買咗兩杯熱咖啡俾周穎同Amy定驚，周穎飲咗幾啖已經平伏落嚟。

「我去一去洗手間。」周穎同我講：「Amy你一唔一齊去？」

Amy搖搖頭，將咖啡杯放喺手心取暖。

周穎行開後，Amy忽然開口：「頭先唔好意思，我都未試過咁冇儀態。」

「好少事啫，你始終係女仔，呢啲場合梗係我哋男仔出嚟頂。」我微笑答。

Amy靜咗靜先再講：「上次喺圖書館我仲誤會咗你，對唔住。」可能見我冇趁機搏懵，所以對我改觀。



「你阿妹同我阿妹咁friend，我都當正你係friend，做得friend，唔使成日講「對唔住」嘅。」雖然我唔知Amy確實誤會咗我啲乜，但係既然佢咁講，我梗係扮大方。

Amy充滿感激咁向我點點頭，首次對我露出笑容：「咁我再次正式自我介紹，我係Amy，張可嵐。」Amy笑起上嚟好靚，因為佢平時冇咩表情，一笑就成個人唔同晒，有啲雨後陽光嘅清新感覺。

「我係Wesley，張子龍。」我答。

「我係阿Wing，周穎。」周穎啱啱返嚟，見我哋喺度響朶，都響埋一份。

跟住落嚟我哋三個就喺度吹下水，我嘅情況Amy都有聽Betty講過，知道我只係嚟加拿大短暫停留，阿爸冇事就返香港，佢聽到周穎專誠陪我過嚟好感動。

「阿Wing你對男朋友真係好好，Wesley有你做女朋友係天大福氣。」Amy一臉羡慕。

周穎聽Amy讚自己，即刻當正佢係閨蜜咁：「梗係唔係喇，阿龍喺香港好受歡迎，我可以同佢一齊先係福氣。」

Amy唔多信咁望向我，同我目光一接觸，忽然有啲驚咁擰轉面。



呢個畫面俾周穎見到，佢即刻別有深意咁望咗我一眼。

我見周穎個樣奸奸地咁好可愛，忍唔住想錫下佢，周穎意會到我嘅諗法咁，將手指放喺唇上面搖頭。

呢個時候阿妹同Betty喺Cafe門口行過，見到我哋即刻好大動作咁打招呼。

「睇嚟係回程嘅時候。」我見狀就話。

回程我改咗坐前排，三個女仔坐後排，因為見個個都好攰，為安全我都係坐前面睇住阿妹，以免佢恰著，最衰我冇車牌，唔係就可以分擔下。

喺後排嘅女仔上車嘅時候仲好興奮咁傾偈，但係冇一陣就瞓著晒，阿妹同我講咗陣無謂嘢都冇再出聲，個樣攰到就嚟瞓著咁，我本來都有少少眼瞓，但係見佢咁狀態嚇到唔敢瞓，打醒十二分精神𥄫住。

果然半個鐘喥，架車無端端斜斜向路壆駛去，我轉頭望向阿妹，佢對眼揼到得番一條線，都唔知係咪仲望緊馬路，扶住軚盤隻手慢慢向下滑落。



「阿鳯！」我大大地聲咁叫阿妹，隻手同時拉番軚盤去中間。

阿妹即刻驚醒，揸番正架車之餘仲驚出一身冷汗：「好彩阿哥你叫一叫我，唔係就大鑊。」

阿妹咁驚一驚之後就冇再恰眼瞓，同我講咗啲Amy同Betty嘅嘢，佢話Betty同佢同級，讀Grade 11，Amy就讀高一級嘅Grade 12，如無意外出年會入大學。

「如果touch wood阿爸醒唔番，你過嚟就會同Amy同級，不過呢度制度同香港唔同，你想出年如期入大學就可能要讀埋night school先趕得切。」阿妹解釋。

「咁都要喇，我唔想嘥多一年時間。」我亦都唔想變咗低周穎一級，況且我仲要快啲出嚟做嘢，賺錢娶Miss Cheung。

諗到呢度，其實我有少少迷惘，呢幾日同周穎過嘅生活如同新婚渡蜜月，無可否認令到佢喺我心裡面嘅地位大大提升，而如果我真係留喺加拿大，要同Miss Cheung分開幾年嘅話，我真係冇信心Miss Cheung咁好條件仲會等我。