🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.1.2 預感

時間又回到星期一，天朗氣清，今日嘅我比起平日早10分鐘起身返學。

路上，總有d樣睇落似毒L嘅同學吹水。

同學A：Anna Yu話佢想今個星期六去New age cafe 啵！

同學B：你想追佢?

同學A：係呀，我夠忠誠專一，希望能夠好好愛佢、呵護佢，但唔知點解次次我text佢佢都唔理我。





Anna Yu? 十成九都係毒L們所講嘅maid/idol。

我又係聽到毒L係度講追女仔，佢地太天真了，以為忠誠專一嘅好男人就一定追到女。

不過，一聽到Anna Yu去New age cafe，又引起了我嘅注意，令我又回憶返星期六嗰一剎那的預感。

會唔會下個星期六我上去new age cafe 就係遇見Anna呢？

諗返起上星期六喺旺角，嗰條女同我宣傳佢間board game cafe，佢會唔會就係Anna呢？





塔羅所講嘅「the Lovers」，就係佢?

算喇，maybe 我諗多左，一切順其自然就好。

----------

08:50我入到學校自己班房，仲有10分鐘打先打鐘。

成間學校嘅建築都幾典雅、顏色方面都離唔開橙紅磚色（唔似PolyU嗰隻色）。





簡單介紹下我學校先，我讀嘅係一間私立學校，除左學校入面嘅老師、校長同校工係本地人之外，基本上英文老師、校董同校監都係外國西人。由於要俾錢先至有得讀, 所以入得黎讀嘅人都有返咁上下家底。

呢度嘅建築、氣氛、教育模式同外國啲三年制high school幾乎一樣，連校服同校規都抄足外國；雖然學生個個都會考DSE，但校園生活就一定唔會好似香城咁緊張。

返學真係好輕鬆，只要求你返朝早九點，晏晝放三點半，一日總共上六節課堂，中間夾住一個小息同埋一個lunch。

「早晨！今個星期你去咗邊度玩呀？」David走埋黎高興地問我。

David係坐喺我隔離位嘅同學，由中一到中三已經互相認識，呢3年大家都同班，由於經常交流，關係愈來愈好，所以到而加假假地都算係可以談心嘅兄弟。

「都係去左上塔羅牌班囉，仲有邊度去呀。」我回覆佢。

David：塔羅班有冇靚女昅呀？
(佢得意洋洋地說)





我：有嘅話而加一早出左pool啦。
(我微笑回答)

嗰個預感係話我知，我就黎出pool。

David：你就好啦，有錢學野，我留喺屋企玩「白貓」咋！
David：係喎，就黎要出年選科，你諗住讀咩？

我：phy，chem，ict

目前我都係諗住黎緊3年主打理科。有興趣嘅嘢，係會讀得開心啲。

「叮噹叮噹⋯⋯」

打鐘後，首先係班主任堂，每日嘅頭15分鐘係專門處理班務。





陳SIR: 嚟緊Open Day入面有一個話劇表演，年年都係drama club同學去做喇，但今年學校話想比機會其他同學試下，所以我地班需要三個人做演員。

每年學校open day 都係3月攪。

此時，有一位同學毫不猶豫舉起手。

譚家朗：就由我黎做。

譚家朗，又叫Raymond，是一個品學兼優嘅學生，係我地3A班男班長，佢就好似每個校園故事入面必定出現嘅所謂「完美人物」，舉例說：就好似多啦A夢入面嘅出木杉，好似火影忍者入面嘅宇智波佐助，喺學校入面學業第一、運動第一、品行A+、人又靚仔聰明、屋企有錢，好受女仔歡迎，係一個「男神」。

當個個一聽到佢話要參與活動時，就全班都熱烈鼓掌，而我就只係象徵式咁拍幾下。

陳SIR: 好，仲有邊兩個想做？





很快地女班長，同佢隔離嘅同座女仔都舉埋手。

陳SIR: 好，咁就由你地3個負責，今個星期要盡快採排。

Open day話劇演員已經搵齊，班主任課亦就咁完結，上完兩堂英文之後就到小息。

我落Canteen買水，跟住就搵張完全冇人坐嘅四人枱坐低⋯⋯

「仲咩咁dry自己一個人呀？」我擰轉頭望一望，原來係David，佢仲帶埋隔離3C班嘅Chris過嚟。