🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.1.1 預感

今晚我只係去爭鮮籌司買左盒魚生飯就返屋企食。

講下我屋企先，我係單親家庭，父母一早離婚，由細到大都係由阿媽養，但屋企假假地都有返啲錢，由於我阿媽都經常去澳洲做生意，所以一年裡面都係得大日子 (例如聖誕、新年、清明，又或者學校家長日，諸如此類) 先會返黎屋企。

至於我平時每個月嘅生活費，阿媽每個月都會過一大筆數入我銀行戶口，所以我而加嘅生活同一個外國留學生冇分別。

返到屋企時已經係八點鐘，食埋個飯沖再埋個涼，就當然要執檯抹​檯打掃洗衫，因為屋企長期冇人管，所以我更加唔可以有得佢污糟邋遢。

夜晚10點正，做完家務嘅我，攤喺張梳化望住張board game cafe嘅傳單，回想起啱啱由落堂到返屋企時發生嘅事情。





呢間cafe名叫做New Age Cafe，佢冇中文名，要梗硬譯的話就叫做「新時代咖啡店」。

「特色桌遊，新開張優惠8折88蚊起，送飲品」宣傳單上嘅字眼。

可能我平時就比較中意研究神秘學知識，例如冥想、清明夢、靈魂出竅、因果定律、吸引力法則、占卜等等，所以頭先先至會咁敏感地覺得個預感暗藏天機，甚至同呢間cafe有關。

Base on因果論，我好可能因為經常捐款做慈善，所以有呢啲回饋？Base on 吸引力法則，我可能有一刻諗住拍拖，所以啲嘢話嚟就嚟？But anyway再考究個呢個問題冇意思，不如活在當下。

喺房間拎副 Rider Waite 塔羅牌出黎占卜，抱持好奇和客觀嘅心態去了解下今日個預感同呢間cafe有冇關係。





我合起雙腿盤坐在床上，鋪上一塊大正方形的黑布，然後把塔羅牌倒在布上，用好似打麻雀咁嘅動作洗牌。

洗完牌就當然攤定牌準備問問題，閉上眼睛讓自己安靜十秒，正式來了......

「請問嚟緊即將會兌現嘅預感係咩事? 」我在心裡默念，然後憑直覺抽咗一張。

「請問呢間cafe同呢個預感有冇關係? 」跟住我又抽多張。

最後揭開兩張牌睇，問預感果張出左 「The Lovers」，咦⋯⋯憑我感覺，再加埋老師教嘅牌義，第一刻諗到嘅係桃花運；而問cafe果張就出「two of cups」，呢張牌一直以黎都係被人比喻做「迷你版The Lovers」牌，牌義上大家可以話近乎一樣，只不過大果張真係形容大家拍緊拖，關係十分親密；而細果張就純粹形容大家淺層次的熱戀交心。





畫公仔畫得咁出腸，好明顯呢個預感就係講緊拍拖，而且指到明我唔去呢間cafe的話一定走寶。

自從我讀中學之後，就好少諗拍拖，即使我踏入左青春期對愛情有一定程度憧憬都好，我都係咁。

其實女朋友呢樣野呢，當你攪掂好自己嘅學業/事業，增值完自己到有返咁上下吸引力嘅時候，就好自然會黎，根本唔洗自己主動花心思去追。

我再望一望張傳單，佢寫：「優惠期去到31/3為止」唔⋯⋯仲有一個月嘅時間。

呢個「天機」，最後覺得：值得一去。