🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Issac的小學回憶(一)

以前我讀小學嗰時，因為唔識人際關係嘅野，所以攪到自己喺學校入面嘅人際關係一塌糊塗，我嘅名聲喺全級同學之間臭曬，只要一有人提起邊個叫Issac，就知係過街老鼠。

比同學玩，但自問自己良心冇咩對唔住人，喺老師眼中我係一個樂於助人，學業上聰明嘅好學生，所以連我自己都唔知點解會咁。

試過比同班同學玩我笑我，將我成個書包倒出黎；每次老師有活動要搵人時，同學都好鍾意推我出去試圖迫我參加，每次課堂上攪分組活動時，我永遠都做「餘數」，成日搵唔到人夾結果要老師出手先至勉強湊夠人。

最嚴重時，試過喺走廊度比三個同級其他班嘅同學圍住我，唔比我走，佢地仲想打我咁：

惡人A：點呀，我就係唔比你走呀，吹咩?





我嘗試走，但佢同另外兩個惡人左右圍住我。

惡人A身材肥胖，好似技安咁，至於另外兩個就中等身材。

惡人B：想走呀？隻抽呀！

跟住惡人B就扯我件衫，佢地準備想打我。

好彩呢個時候老師經過，佢地先至唔敢亂黎。





惡人C：哼！今次算你好彩！

由於欺凌問題愈來愈嚴重，所以最後我頂唔順之下，終於去搵駐校社工傾訴。儘管社工嘅介入，老師對我嘅關注，令到成班同學一時之間稍為收斂，但社工只係同D欺凌者傾得兩句，老師最多只係喺班上話同學兩句，就不了了之。所以同學冇耐又變回原狀，繼續欺凌。

我去見社工，反映自己點點點被欺凌時，社工凈係識講廢話，咩叫你唔好咁多仇恨，唔好咁記仇，心情唔好就打下波之類嘅廢話。至於我阿媽，就因為平時佢忙自己野，大家少交流，所以我對佢唔係完全信任。學校嘅敷衍、社工嘅無能、對家人嘅不信任，因此我長期活喺一種孤立無援嘅狀況，直至⋯⋯

小四下學期，有一次喺中國象棋比賽完左之後，Kelvin就坐喺參賽者等候區，佢坐我格離，然後同我搭訕：頭先嗰鋪贏定輸呀？

我：輸咗





佢個樣三尖六角，奸奸惡惡地，起初我對佢都幾忌諱。

同佢傾過兩句，知道原來佢係留班生，大我一年，全級入面讀最差果班嘅同學，於是令我更加起戒心，能避則避。但之後⋯⋯