🏫 👩🏼‍❤仲講中學生「應否」拍拖？不如講下「如何」拍拖啦！🏫 【校園】【愛情】【鬥智】: Ch.2.2 小學同學

自從升上中學之後，我認識一班新臉孔，考完分班試嘅我入咗尖子班撞到David。中學嘅新生活，再加上受David樂觀性格嘅感染，我漸漸把過去嘅傷心事，拋諸腦後。

同時唔知點解升上中學之後多咗女仔搵我，通常學校旅行都搵埋我BBQ，又或者間唔中問我功課等等(當然最多異性緣嘅人仍然係Raymond)，所以我而加已經放下了Grace，連佢fb睇都唔睇。

不知道現在的Grace生活過成點呢？仍然同啊杰在一齊，做緊一個幸福的小公主，還是已經變成一隻自由自在嘅小鳥呢？

David：聽日大家食完野1點半喺地鐵站等

我：好呀咁A出口見





返到屋企嘅我做曬功課溫咗陣書，再食埋自己煮嘅簡單晚飯後，就試下wts雨晴。

我：Hi

過左5分鐘，佢就send左張唔知咩卡通人物嘅喊喊sticker。

我：咁我真係唔識你嘛。

雨晴：咁你而加又搵我做咩





我：想了解下你係咩人啫(一個溫馨笑臉

雨晴：小學同學~

然後佢又send第二張喊喊sticker：我以後要多d刷存在感先得。

我：其實我地係點樣識㗎？

雨晴：咪小五年嗰年
雨晴：有次喺電腦室見你偷玩忍豆，見到你個名叫小鼬




雨晴：然後我周圍問同學邊個叫小鼬，最後問到舞蹈班啲人
雨晴：知道你同Grace有交流，咁Grace咪介紹你比我囉~

唔⋯⋯佢知我名但係從未主動搵過我？定係大家見完一次就冇左件事？

雨晴：跟住有次放學見你地又喺電腦室玩忍豆，咁我咪問你攞email囉

我：最後我地點add fb架？

雨晴：小六嗰時我用你比我個email去搵你
雨晴：你咁都唔記得？！

Fb呢方面我真係對佢冇印象，嗰陣時啱啱開完ac擺喺度十年先睇一次，但⋯⋯佢果時叫咩名呢？

我：你果時fb名叫咩？





雨晴：Iris Lau，但我後來改名

原來如此⋯⋯唔怪之得今日佢比我睇佢嘅profile名已經叫做：月姬

再加上我升中一之後經常耐唔耐check frd list清幽靈，見冇樣冇icon又冇印象嘅，del。

嗯，就係中一嗰時del咗佢。

雨晴send錄音：雖然你del咗我，但我其實都檢討過自己咁耐以黎都冇同你交流過，結果諗諗下都係⋯⋯唉！算啦，自己都有責任。

雨晴嘅謎團已經解開。

人就係咁，見得果一次，第一印象又唔深，之後又唔交流，咁咪好快忘記囉，我諗想當年Grace都係咁樣而唔記得我。





雨晴：係呢你仲有冇搵Grace？

我：冇咗好耐啦，大家都唔同校啦。

之後我又了解下佢幾時入咗嚟嘉里讀書。

佢：今個月！

同我推測嘅一樣，果然係插班生，咁即係啱啱入嚟一個星期都冇啦。

呢個星期我返學放學都係忙緊自己野，八卦嘢唔理好正常。

諗返起小學時候嘅自己，都係因為遇到Kelvin，先至令到堅強起黎，我同Grace嘅緣份都因Kelvin而起。