女神呢個稱號令我食左唔少仔(有甜）: 酒精

抖左差唔多半年，我終於似返個正常人。

期間家姐日日都黎睇我，我同佢嘅關係亦都比以前更加親近。

而阿傑雖然無日日，但係都有9成時間擺左落我到。

我望住佢嘅時候，唔知點解無左以前個種感覺。

以前我對住佢都可能會有少少心動。



宜家嘅我一啲感覺都無。

你問我鍾唔鍾意佢，我唔知，但係感覺係唔會呃人，有就有，無就無。

至少宜家嘅我無，可能係因為太耐無一齊出街掛。

我都唔知。

我亦都開始有少少迷失，我唔知自己到底追求緊啲咩。



出院第一樣我想做嘅事，就係飲酒。

於是夜晚大約七點半嘅時候，我自己一個人去左尖沙咀到飲酒。

叫左杯生啤之後，我就慢慢係到飲。

望住隔離唔係一班人，就係一對情侶係到飲酒。

相比之外，我的確係孤獨左啲。



不過我對呢啲野已經無所謂啦，好似周星馳咁講。

生亦何哀，死亦何苦。

有無朋友或者情人根本唔重要，重要嘅係我地享唔享受。

飲飲下，有條仔行左過黎撩我。

男仔：「做咩一個人係到飲悶酒呀？同男朋友鬧交呀？」

我無理到佢，繼續係到自斟自酌。

佢嘈左幾句之後，見我都係無理過佢，覺得無癮然後自己走左去。

對不起，這個晚上我需要的，是一個故事，不是男人。



當我諗住見第二杯嘅時候，我眼角望到有個男仔同我一樣，自己坐左係到飲悶酒。

佢時不時都會望下周圍，亦都會笑一笑。

可能其他人見到佢會覺得，佢宜家享受緊自己一個人。

但係我係佢眼神入面，望到嘅，

只有數之不盡嘅寂寞同埋傷心。

我拎住杯野行過去，坐左係佢對面。

佢見到一個唔識嘅人坐係佢前面，無任何驚訝或者奇怪嘅眼光，只係對我微微一笑。



我：「你都係，一個人？」我問佢。

男仔：「係呀。」

佢舉手，向酒保叫左杯Tequila Sunset。

等到佢杯酒黎左，我地先再開始對話。

男仔：「你呢？你咁靚，做咩會一個人係到飲酒？」佢飲左啖酒再講。

我：「有少少野諗唔通姐，而且靚唔代表唔可以一個人飲酒。」

男仔：「唔介意嘅講比我聽，雖然我可能比唔到啲咩意見。」

我：「無呀，只係最近唔知自己追求緊啲咩，個人好似無左目標一樣。」



男仔：「人一生追求嘅，唔係錢，就係愛情，唔會有第三個選擇。」

我：「就係我兩個都唔缺，所以先唔知，我對任何野都無哂感覺，之前我對一個男仔都仲會有少少心動，但係宜家見到佢，我一啲感覺都無。」

男仔：「有時就係咁架啦，當你對同一樣野耐左，就會變得麻木，不過講到尾，只係無新鮮感姐。」佢望住杯酒笑一笑。

我：「你好似經歷過唔少野咁喎，宜家有酒，只係差一個故事。」

男仔：「你介唔介意我問你一個問題？」

我：「唔介意。」

男仔：「你覺得，一段無可能結果嘅關係，係咪應該要放低？」



我飲啖酒，諗左一陣，再答佢

我：「我唔知。」