女神呢個稱號令我食左唔少仔(有甜）: 清醒

珮恩：「你終於醒啦！！！」

我：「係呀，我終於醒啦。」

宜家咁樣就同上次係陸運會感覺一樣，只係今次嚴重啲。

珮恩：「你知唔知醫生話你失血過多...好可能無命呀...」

佢攬到我實一實，仲不斷咁喊。



我都係第一次見我家姐流咁多眼淚。

我想摸下佢，但係我個人虛弱到連郁下隻手都無力。

原來經歷過接近死亡嘅一刻，你會發現所有關係係真定係假。

係呢到只係得兩個人黎睇我。

一個就係家姐，一個就係等我醒等到訓着左嘅阿傑。



我：「我想飲水...」

家姐即刻餵我飲，個感覺就好似返到去細個嗰陣一樣。

珮恩：「慢慢飲啦，唔急唔急。」

可能係家姐動作太大，搞到整醒左阿傑。

阿傑：「嗯...你醒啦...？」



我：「係呀...」

當佢想講野嘅時候，護士行左入黎，叫佢地出返去，唔好阻住病人休息。

雖然我家姐賴死唔走，但最後都係比阿傑一野抱住行出去。

結果，成間病房得返我一個人。

我想落地行下，但我發現我起都起唔到身。

所以都只可以死死氣咁訓係張病床到。

我：「估唔到我都有咁嘅一日。」

我從來都無諗過我會幫人擋刀，仲要唔係幫自己心愛嘅人擋。



又或者，我只係唔想悲劇重演。

悲劇，一次都嫌多，但係每日都發生一次。

比把刀插中個一刻，我以為自己真係會死。

我以為自己終於可以擺脫呢一個咁無聊，咁污糟，咁荒謬，咁虛假嘅世界。

你問我想唔想死，不如我問返你點解唔想？

我已經好攰，如果死亡可以結束呢一切，我諗我要死十次。

點都好，我宜家點郁都郁唔到架啦，當係抖返幾個月。