女神呢個稱號令我食左唔少仔(有甜）: 旅行(二)

食飽飽之後，本身啲人諗住開始玩，但係邊有人一食飽就即刻玩架，所以我地都係決定抖一陣先再玩。

其實學校旅行都無乜野好做，都係黎同班同學玩下，打下卡，吹下水咁，但偏偏無意義得黎又好有意義咁。

然後我地係抖個陣，有人拎左個水樽出黎，話想玩真心話大冒險，我自己覺得幾無聊，因為每次一揀真心話，第一句通常都會係。

「你鍾意邊個呀」「你覺得班上面邊個最靚仔/女」

好老實講，鍾意邊個關你撚事咩，假設我鍾意A，咁你會幫我溝佢咩，你最多咪同全班講Emily鍾意A，然後令到我尷尬難做姐。



所以我對呢隻game都係一般般，雖然我頭先踩佢，但的確可以幫助我地更加了解或者認識一個人，甚至會刷新自己原本對一個人嘅印象。

同埋咁多人都玩，你唔玩好樣衰架嘛，比人話唔合群，加上女神就係好隨和。

不過一路玩一路玩，好耐都未抽到我，我多數都係做聽同睇個嗰，我想講有啲人嘅問題或者叫人做大冒險嘅野都真係幾over左。

男仔A：「你有無試過同一個男仔拍拖，但係自己心入面又鍾意第二個男仔？」

女仔A：「Er...我...我...我...」佢口窒窒，好似唔太願意想講出黎。



思思：「唔想講就唔好講啦，我地唔會逼你架。」

男仔A：「唔得！！玩得就要講真心話，咩都唔講咁玩黎做咩？」

思思：「咁宜家人地唔想講呀嘛，宜家玩緊強姦遊戲咩？」

女仔A：「唔好嘈啦！！唔好嘈啦！！我...我有試過呀！！」

佢講完望一望另一個男仔，我諗應該就係佢男朋友，個嗰男仔好失望咁走左話唔想玩，個女仔A之後忍唔住喊，亦都走左話唔玩。



下下都要逼人講人地唔想講嘅野真係好咩？每個人都有私隱，我只係覺得無錯，隻Game係叫真心話，但唔係叫逼人講真心話。

有時啲人寧願將自己嘅野收收埋埋係心入面，唔講比人知，係佢地知道件事太過醜陋，或者太過傷心唔想講，所以寧願自己面對。

但總會有人唔明白佢地諗嘅係啲咩，佢地就覺得我地係朋友，甚至係屋企人，唔應該有私隱，應該咩都講哂出黎。

我只係想同呢啲人講，你地咁做係好撚仆街，係都要揭起人地嘅傷疤，或者黑暗嘅一面，係都要整到人地放低完之後又要再痛過。

有必要咩？你都唔會逼一個自閉症嘅人講野掛？你都唔會逼隻貓講人話掛？總之記住一句，勉強無幸福，人地唔想講就唔好逼人講。

過左一陣之後，唔知話我好彩都唔好彩，臨抽埋最後一個嘅時候，終於抽到我。

我：「我揀...大冒險啦。」因為我驚佢地又問啲好過火嘅問題，例如我幾時破處，老豆個樣野我唔想同人講。

佢地全部人圍威喂左一輪，終於得出一個結論，好似開緊五影大會一樣。



男仔B：「我地要你...係到唱首歌。」

我：「哦~唱歌姐，咁都好啲，仲以為你地唔知要我做啲咩添。」

女仔B：「等陣先，我地未講完，我地要你唱嘅係...「Wish you were gay」！！」

WTF，我從來都未試過唱英文歌，仲要係Billie Eilish嘅歌，一陣唱得衰實比人PO上網公審話我侮辱左Billie。

不過都要唱架啦，反正我都係最後一個，無所謂啦，於是我就拎起頭先用黎轉嘅水樽，當佢係支Mic。

Baby, I don't feel so good 
Six words you never understood
I'll never let you go
Five words you'll never say



我瞇埋隻眼黎唱，表面上扮到自己唱到好沉醉，實際上我唔夠膽睇佢地啲表情，佢地仲要全部人都靜哂。

I just wanna make you feel okay
But all you do is look the other way

好辛苦終於唱完，我先敢打開返隻眼，見到嘅係，由一開始得玩真心話大冒險個幾條友，變到有成兩十條友坐左係到拍手，有啲人仲要係其他學校。

我呆一呆，思思拍一拍我先識得反應過黎，同佢地講多謝。

Denis：「哇~女神唱得好好聽呀，唱多幾首黎聽下先啦女神。」

唔知點解，我開始有啲對呢條友反感，雖然佢頭先請我食野，但係佢好似有啲煩煩地。

然後其他人都開始附和佢，叫我繼續唱，我就算唔想唱，但要硬着頭皮咁繼續唱。



我真係好想講一句，要聽歌嘅話，去睇樹窿音樂會啦屌，最後唱到我聲都沙沙地。