女神呢個稱號令我食左唔少仔(有甜）: 旅行(一)

黎到第二日，我執好個Look之後就準備出門口。

臨前門口之前見到家姐對房門關埋左，唔知佢仲係咪嬲緊我瞞住佢呢...

我都只係唔想佢難過姐，因為人知道事情嘅真相，換黎嘅永遠唔會係開心。

就好似你男/女朋友話要做野，但最後比你發現左佢其實係去同異性出街，我就唔信你會好開心佢同其他人玩唔會煩你。所以話，換黎嘅一直都係傷害。

不過點都好，每個人都應該有知情櫂，所以我都好矛盾，一方面覺得佢應該要知，一方面又唔想Hurt到佢。



去到集口嘅地點，大家都差唔多到齊哂，而且我地學校比較好人，唔洗好似有啲學校咁要着運動服去旅行，個嗰都可以執到好靚先出去。

思思：「喂你行快啲啦，成個世界都等你一個呀小姐。」佢好大聲咁向我個邊叫，驚死啲人唔知我遲到咁。

我：「屌你咩，你搞到我好撚柒呀。」我即刻衝過去捉住佢塊面整痛佢。

思思：「啊！！好痛呀！！啊啊！！！」佢叫左兩聲，搞到全部男仔都望哂過黎，個嗰淫樣都出哂黎。

老師：「好啦好啦，唔好再玩啦，我地要出發啦，因為唔知有無人同我地爭爐架。」



然後二十幾條友就開始行，即使已經中四，尾三嘅一次旅行，但仲係好似小學生一樣，成件事好歡樂。

好快就行到蝴蝶灣，一行到去就已經見到有幾班人燒緊野食，我諗應該係琴日Denis個間學校啲人，但係我就見唔到佢。

而咁啱就有五個爐無人燒，於是我地就去左霸爐，不過我其實都幾憎燒野食，又熱又麻煩。

啲男仔就負責起爐同埋燒野食，而我地女仔就係到圍威喂，無計啦，我地邊識呢啲野喎，連班主任都係到同我地吹緊水。

我：「哇~終於起到火啦，唔該哂你呀~」有時請男仔食下波餅，可以換到好多野，思思都明白呢個道理。



啲男仔食完波餅之後，個嗰都爭住燒野比我地食，而我同思思就坐底係到玩手機。

不過學校話手機只可以用黎影相，邊撚個會聽你講呀，講真個句。

：「咦？原來你係到，我都搵左你好耐啦。」有把男聲突然係我後面出現。

我拎一拎個頭，發現原來條友係琴日個嗰Denis，隻手仲拎住一個白色碗。

我：「乜又係你個陳生，做咩唔同自己啲朋友玩，要黎呢到玩呀？」

Denis：「首先我唔係姓陳，第二我個邊無乜野玩，第三我見到你地仲未搞掂，睇下你食唔食我個啲姐。」

我：「都唔知你有無落藥嘅，我先唔夠膽食呀。」

Denis：「無呀，我試一舊比你睇啦。」然後佢就拎起一舊放入口，個表情仲好浮誇。



我：「咁好啦，我唔客氣架啦。」

然後我就將佢啲野一舊一舊咁放哂落口，除左幾好味之外，我自己都好肚餓。

Denis：「哇，我原本諗住請食你一舊咋嘛，你居然食哂。」

我：「我係咁架啦，你知唔知有幾多男仔想燒野比我食呀，你好好彩架啦。」

Denis：「咁我真係萬分感激，謝娘娘恩賜。」

我：「免禮免禮，退下。」

跟住我地啲人都開始燒好啲野，而我就係個啲淨係識得等食嘅人，就好似有蝦唔會食，見到佢無蝦殼先食一樣。



思思：「喂你睇下，個間學校都有唔少靚仔靚女架喎，不如我地去同人做朋友囉？」

我：「做朋友？點解你講野成個mk妹咁，be frd okay？你都傻傻地，係都人地過黎啦。」

思思：「又係，我都係繼續食野先。」

我：「食食食，小心食肥你呀，咁樣遲啲堆男仔全部都淨係鍾意我架啦。」

思思：「你放心啦，我不嬲都出名食極唔肥，而且我唔似你唔做運動，我keep得仲好過你呀。」

鬥樣鬥仔鬥身材一直都係我地成日講嘅野，不過係好朋友先可以互相中傷對方，唔會計較。