女神呢個稱號令我食左唔少仔(有甜）: 可笑

阿傑伸手比左張紙巾我，我仲諗緊個陣，原來我不知不覺咁流左眼淚。

我接過張紙巾，然後比佢用隻手捉住我隻手，但係我無反抗到，需要人嘅安慰嘅時候，就唔洗突登扮堅強。

人始終有軟弱嘅一面，唔洗刻意去忍瞞，話比人聽自己無事，想喊就喊，想叫就叫，想死就死。

忍瞞自己嘅情緒，到頭黎傷害嘅只係自己，咩都收收埋埋係無好結果，適當嘅發洩係必需嘅，除非你想自己患上抑鬱症。

阿傑：「估唔到作為女神嘅你，都會有啲咁嘅經歷。」



我：「係咪好可笑，一個可以將所有男仔玩到氹氹轉嘅女仔，原來一開始都係做比人玩個嗰。」

阿傑：「唔係，我明白你感受，因為我曾經都好似你咁，好鍾意一個女仔，最後先發現，原來我一直都做緊佢隻兵。」

我：「我都睇唔出你咁靚仔都會比女仔當係兵喎。」

阿傑：「係咁架啦，情場上面始終都係邊個認真邊個輸，因為個一次，我過左好耐都唔夠膽再愛人，直至我遇到你之後。」

我：「口花花啦你，我一直都唔覺得自己係幫人個嗰，玩人感情就有我份。」



阿傑：「唔係咁架，係你令到唔相信愛情嘅我再次Fall in love，就好似一個失明嘅人士終於睇得返野一樣。」

我：「是但你啦，不過我要走先啦，一陣約左人。」

然後同佢說了再見之後，我就搭車返屋企Hea下，準備一陣又再出街，日日都有咁多人約我，我諗我全部應約真係會死。

但係我宜家唔係同男仔出街，我無同大家講嘅就係，我係一個幾鍾意跳舞嘅人，平時都有係學校表演，所以我人氣先會咁高。

思思：「等左你好撚耐啦小姐，頭先又去左同邊個男仔出街呀？」



差唔多全部人到齊，只係差我一個。

我：「關你撚事咩，係跳嘅就快啲開始啦。」

無錯，女神係自己人面前都係會講粗口，只係你地平時無機會聽到女神講粗口咁解，咁樣你地就覺得佢好純潔，但一切都只係假象。

跳左一陣之後就休息十分鐘。

當我同思思係到飲緊水、睇緊IG嘅時候，有個男仔行左埋黎，佢叫做阿鈞，同我地都一齊跳左幾年舞。

阿鈞：「你一陣介唔介意完左之後，去同我食餐飯呀？」

思思：「介意呀，你自己一個人食啦。」

阿鈞：「吓...？我唔係問緊你喎...」聽到之後，我忍唔住笑到噴水。



我：「笑死，你唔好自作多情啦bb，你諗多左啦，宜家無人認同你呀。」

思思：「車，你兩個食爆佢啦咁，笑笑笑！！」然後佢就嬲爆爆咁行開左，成個小拳石咁。

阿鈞：「咁你係咪願意同我食飯呀？」

我：「唔要喎。」

阿鈞：「吓...？」

我：「講下咋，比你估到嘅話，我仲係Emily黎？」

阿鈞：「嚇死我啦，咁我地宜家繼續去跳舞先。」



然後我地就跳舞跳到夜晚八點幾就解散，我同思思互相屌左一陣就跟住阿鈞去食野。

佢帶我去食韓燒，拿唔好話我咩港女乜乜乜，因為係佢提議，我話好咋。

阿鈞：「你知唔知老鼠姓啲咩？」

我：「姓老？」

阿鈞：「係米呀！！因為米奇老鼠！！」

我：「哇哈哈！！你好幽默呀！！」

但其實我想講，難笑到仆街，但係女神最基本要做到嘅就係善解人意，就算人地啲笑話幾撚凍都好，都要比面笑下。