女神呢個稱號令我食左唔少仔(有甜）: 仆街

你地知唔知，愛情對人造成最大嘅影響係啲咩？就係會令到人迷失左方向，甚至連自己究竟係邊個都開始唔認得。

當你將自己個心交比其他人，換黎嘅係比佢狠狠咁割一刀。當你以為自己可以好好咁愛一場，換黎嘅係比佢糟蹋左一次又一次。

我聽人講，愛情可以好簡單，簡單到好似只係你愛我，我又愛你，咁我地就一齊拍拖。

不過佢又講，愛情可以好複雜，複雜到好似上演緊第三次世界大戰一次，互相猜測、互相忍瞞、互相攻擊，但卻互相相愛。

我仲好記得個一日，啱啱好上完堂嘅小息，我好興奮咁落到去阿彥嘅班房去搵佢，因為我琴日畫左幅畫想送比佢。



有時候，你會寧願兩隻眼一世都睇唔到野，都唔會想見到一啲你永遠都唔想見到嘅野。

我打開左佢班房對門，結果換黎嘅係，

佢同緊一個女仔係到咀緊，仲好似當無人係到，咀到忘哂形。

我：「阿...彥...？你...係...到...做...咩...？」我瞪大隻眼，希望上帝同我講，呢個係一場夢境。

阿彥：「Oh...Emily你黎左呀...？」佢拎轉頭，好尷尬咁望住我。



女仔：「你識佢架？」

我：「點解...你...會同佢...係到咀緊...嘅...？」

阿彥：「你聽我解釋先呀。」佢即刻行過黎想捉住我。

我：「我憎死你呀！！！」我好嬲咁掉左幅畫落地下，然後一路喊住咁行返上班房。

原來見到自己嘅另一半係你面前出櫃嘅感覺就係咁樣，原來呢個就係心痛嘅感覺，原來呢個就係心死嘅感覺。



我喊住坐返埋自己個位， 伏係張枱到不斷喊，其他同學都好愕然咁望住我，個嗰都係得個「望」字，無人夠膽問我發生咩事。

過左一陣之後我就聽到腳步聲，有人行左過黎，係到摸我個頭，但係我無望係邊個。

阿彥：「對唔住呀。」我一聽到係佢之後，個人即刻彈起。

我：「我唔想見到你呀！！！」我嘗試推開佢，但係佢用力捉實我隻手。

阿彥：「你聽我解釋先啦，件事唔係你諗咁架。」

阿彥：「其實頭先我同緊朋友玩真心話大冒險，我揀左大冒險，佢地要我同個嗰女仔咀咋。」

我：「真係...？咁點解你唔話比佢地聽你有女朋友...？點解你唔拒絕佢地...？」

阿彥：「我見佢地個嗰抽中左都有咀到，所以我先...不過我應承你，唔會有下次！！！」



我：「你要我點樣可以信你喎...」

阿彥：「傻豬，你仲記唔記得我講過啲咩呀？遇見你是我一生中最好的福氣，我唔會比呢份福氣消失。」

我：「求下你唔好再呃我...唔好再傷害我...」

阿彥：「咁你係咪原諒我啦？」

我：「嗯...不過我唔係咁容易就原諒人架！！尢其係我好着緊嘅人。」

阿彥：「知啦知啦，我應承你，我唔會再同其他女仔有接觸。」

當你真係好愛一個人嘅時候，就算佢出櫃，你諗嘅唔會係分手，而係佢點樣先可以返黎自己身邊。



又或者，你明知佢講嘅野係一個大話，你都會去相信，只係因為「愛情」會令人盲目，令到自己甘心比人呃。

我仲好記得，我地分手個一日，宜家諗返，簡直就係我人生中最低賤、最無自尊、最無地位嘅一日。

佢係個日專登約我出黎，我仲好期待佢會帶我去邊到玩，哈哈，哈哈哈，哈哈...哈...

阿彥：「我唔愛你啦，我地分手啦，一齊左咁耐，原來你都係比唔到我想要嘅野比我。」

我：「吓...做咩突然講啲咁嘅野...？係咪發生左啲咩事...？」

阿彥：「無事發生，只係我發現自己鍾意左第二個女仔，所以我決定要同你分手。」

我：「係咪我有咩做得唔夠好...？我可以改架喎...」我一路講，眼淚一路流落黎。

阿彥：「你咩都好好，只係我變左心，係我唔夠好至係。」



我：「唔係...我真係好鍾意你...同埋...你話過你呢世都唔會離開我架...」

阿彥：「甜言蜜語可以幫人，亦都可以傷人，但其實呢啲野，都只不過係自欺欺人。」

佢拎轉頭諗住走，我即刻衝過去攬住佢。

我：「我求下你...唔好走呀...唔好離開我...我愛你！！我好愛你呀！！！」

阿彥：「If you love me,，let me go。」

我：「唔得...我唔可以無左你...一次呀...我求下你你比多一次機會我呀...」

阿彥：「無機會架啦，你死心啦。」



佢用力將我推落地，係我面前撕爛我幅畫，頭也不回咁走左。

總會有一兩個仆街存在係你身邊，呢種人，話唔愛就唔愛，話分手就分手，話走就走。

佢地唔會在意其他人嘅感受，覺得自己玩夠就放手，理得你係開心定傷心，所謂仆街就係咁解。