那些年，我等待的那個男孩子: 林雪凝日記(12)

1-8-2000
今日係我第一次單獨同男仔去街，估唔到Jonathan肯陪我去行書店，我係第一次聽到話有男仔鍾意睇書。

真係估佢唔到，佢聽見我鍾意睇原振俠就知我鍾意黎明，無辦法啦，黎明就係咁靚仔

今日我因為約左Jonathan行街，所以唔返診所幫手，佢本來想話搭電車送我返屋企架，不過由西灣河搭電車返屋企真係好耐，所以我地決定搭到去上環果邊，再慢慢行返去，唔緊要啦，我今日著Cons，又唔係著涼鞋

落左電車我地慢慢沿海邊行返屋企，有幾下Jonathan隻手係掂到我隻手，果一刻我發現，佢對我有意思，不過我選擇守住自己隻手，暫時我15歲女，唔計屋企人，只有佢掂過我捉過我隻手

我地兩個行到球場，就見到Jasmine，仲有佢男朋友，應該係啦，佢打波打到塊面紅卜卜咁樣真係好得意，怪不得佢吸引到咁多男仔。Jasmine男朋友起身去洗手間果時，佢轉身就發現左我同Jonathan，突然間佢將自己成個人企係我面前，好似想阻我見佢男朋友咁，我同佢傾左幾句之後，就聽到佢男朋友問Jasmine係咪去佢屋企過夜。原來Jasmine已經同男朋友去到呢個關係，果個男仔一定係好好，如果唔係Miss孔係唔會俾Jasmine拍拖。


10-8-2000

今日補完習，我地三個同Jonathan睇戲同食飯。睇戲果時我坐佢隔離，有幾幕我都嚇一嚇，之後捉實佢隻手，佢都好細心咁拍一拍我，叫我唔好驚，就咁睇，我地兩個就係一對拍緊拖嘅情侶

睇完戲我地去食飯，成餐飯中Jonathan都好照顧我，仲引黎佢地兩個羨慕，我地幾個食完飯就打算去維園散步，去到球場果邊，我地遇上樂善堂班波牛。而我係遠距離中，認出左一個身影，佢係球場上著住件比其他人特別嘅衫，一個守門員，經過幾個撲球之後，佢地就好似完場，果位守門員就去左洗手間，同一時間，我地又再遇上Jasmine。今晚嘅Jasmine好奇怪，佢一向都係幾鍾意笑咁，但係今日佢見到我就好有攻擊性，好想快少少趕我走咁

然後….一個熟悉嘅身影係我眼前出現，雖然Jasmine好快跳上佢身上阻止佢望過黎我到，但我肯定我冇認錯人，唔通佢係Jasmine男朋友?

佢…唔係話會娶我架咩?不過我都冇資格話佢，我身邊而家有Jonathan



如果佢真係Jasmine男朋友嘅話….我同唔同佢爭好呢…